Եւ եթէ այդպէս է, ուրեմն պէտք է փորձել վերլուծել այս յայտարարութեան առաջադրանքները: Նախ եւ առաջ կայ ընտրապայքար` Եւրոպայէն աջակցութիւն սպասող կողմին եւ երկրին դէմ խառնաձեւ (հիպրիտային) պատերազմ յայտարարած միաւորին միջեւ: Այլ խօսքով` Արեւմուտքի եւ Ռուսիոյ Դաշնութեան:

Կողմերուն հասցէականութիւնը պարզ կը դառնայ, որովհետեւ կը տրուի Մոլտովայի խորհրդարանական ընտրութիւններուն օրինակը: Իսկ այստեղ արդէն այնքան բացայայտ կը դառնայ ըսուածը, որ Քալլաս «չարամիտ ազդեցութիւն» ձեւակերպումը կ՛օգտագործէ: Ակնկալուած օժանդակութիւնը Մոլտովայի նկատմամբ Եւրոպայի տրամադրած աջակցութիւններն են:

Այս բոլորին յետագիծը տեսանելի է: Ըստ այս տրամաբանութեան, ընդդիմադիր դաշտին դէմ կատարուող բռնաճնշումները, Սամուէլ Կարապետեանէն մինչեւ սրբազաններ եւ քաղաքական հայեացքներու համար բանտարկուածներ, անցնելով եկեղեցւոյ դէմ կիրարկուող արշաւէն, պէտք է ընկալել նախապատրաստութիւն 2026-ի խորհրդարանական ընտրութիւններուն: Այս բոլորը ոչ միայն եւրոպական կառոյցներուն կողմէ չեն նկատուիր մարդու իրաւունքներու, տեսակէտի, արտայայտութեան ազատութեան դէմ ճնշումներ, այլ նաեւ կ՛ողջունուին այս ձեւով: Ասոնք կը նկատուին «չարամիտ ազդեցութեան» դէմ պայքարի միջոցներ, որոնք ստացած են եւ խորհրդարանական ընտրութիւններուն ընդառաջ պիտի ստանան Եւրոպայի օժանդակութիւնը: Քալլաս յիշած է նիւթական աջակցութեան մէկ չափաբաժինը, անուղղակիօրէն ըսելու համար, որ որքան սաստկանան ռուսական ազդեցութեան դէմ Երեւանին առնելիք քայլերը, այնքան կը բազմանան նաեւ ֆինանսական օժանդակութիւնները:

Այս շրջածիրին մէջ աւելորդ պիտի չըլլայ յիշելը, որ Երեւանը յառաջիկայ մայիս 5-ին պիտի հիւրընկալէ Հայաստանի Հանրապետութիւն – Եւրոպական Միութիւն առաջին գագաթնաժողովը: Եւրոպական Միութեան բարձրաստիճան ղեկավարներ եւ առաջին դէմքեր, որոնց շարքին` Եւրոպական խորհուրդի եւ եւրոպական յանձնաժողովի նախագահները:

Անկախ գագաթնաժողովը Երեւանի մէջ կազմակերպելէ, յատկանշական է թուականը` մայիս 5: Ուղիղ մէկ ամիս առաջ յունիսի ընտրութիւններէն: Այն օժանդակութիւնը, որուն համար դիմած էր Երեւանը, կը ստանայ նաեւ գագաթնաժողովի ճամբով:

Այս հանգամանքները կը բացայայտեն Երեւանի մէջ տեղի ունեցող քաղաքական, տնտեսական, եկեղեցական իրադարձութիւններու շարժառիթներուն առանցքները:

«Ա.»
«Ազդակ»