Սեպտեմբերի 30-ին 5-րդ ալիքի «Հարցազրույց հաղորդաշարի հյուրն էր ՀՅԴ Հայ Դատի Կենտրոնական խորհրդի նախագահ Հակոբ Տեր-Խաչատուրյանը: Նա խոսել է օրերս Երևանում տեղի ունեցած Հայ Դատի հանձնախմբերի և գրասենյակների համահայկական խորհրդաժողովում տեղի ունեցած քննարկումների, ընդունված որոշումների և առաջիկա 2 տարիների անելիքների մասին: Անդրադարձ է կատարվել նաև ՀՅԴ Հայ դատի պայքարի և ՀՀ իշխանությունների վարած քաղաքականության միջև անհամաձայնություններին, ընդհուպ հակասություններին, որոնք նորանոր դժվարություններ են ստեղծում ոչ միայն աշխարհասփյուռ հայության իրավունքների պահպանման, այլև Հայաստանի Հանրապետությանը, որպես պետություն, իր քաղաքական առաջնահերթությունները առաջ մղելու գործում:

Քննադատելով ազգային ուժերի ու կառույցների նկատմամբ Հայաստանի իշխանությունների որդեգրած դիրքորոշումները՝ Հակոբ Տեր Խաչատուրյանը մասնավորապես խոսել է Հայ Յեղափոխական Դաշնակցության և Հայաստանյայց Առաքելական Սուրբ Եկեղեցու դեմ ծավալված արշավի մասին՝ դա գնահատելով որպես մի երևույթ, որ կվերանա անցողիկ իշխանությունների հետ:

Յակոբ Տեր-Խաչատուրյանն անդրադարձել է նաև տարածաշրջանային մի շարք խնդիրների, ներկայացրել «Թրամփի ուղու» (TRIPP) անորոշությունները և սպառնալիքները հայ-իրանական սահմանի փակման համատեքստում: «Հայաստանը, բնականաբար, չի կարող դեմ արտահայտվել ճանապարհների ապաշրջափակման ծրագրերին, բայց պետք է հստակություն լինի այս հարցում: Որքա՞ն է լինելու, օրինակ, այդ ուղու լայնությունը, ի՞նչ է ներառելու այն իր մեջ, արդյոք միայն ճանապարհ թե՞ նաև հաղորդակցության այլ, էլեկտրոնային միջոցներ և այլն, չգիտենք: Ի վերջո դրանով կարող է փակվել հայ-իրանական սահմանը, ինչը կնշանակի, որ դա միջանցք է, որ մենք տրամադրել ենք Ադրբեջանին: Այսօր տակավին պայմանագրի կողմերն են TRIP-ը տարբեր կերպ ընկալում՝ մեկն ասում է «Զանգեզուրի միջանցք», մյուսը՝ միջանցք, հետո իրեն ուղղում՝ չէ, ոչ թե միջանցք, այլ ճանապարհ: Հստակություն չկա այս հարցում»,- ասել է Հակոբ Տեր-Խաչատուրյանը:

Առանձին անդրադարձ է կատարվել նաև Ադրբեջանում և Արցախում հայկական մշակութային արժեքների ոչնչացման, Բաքվում պահվող հայ ռազմագերիների իրավունքների պաշտպանության ուղղությամբ ՀՅԴ Հայ Դատի հանձնախմբերի և գրասենյակների ծավալած գործունեությանը:

Մանրամասները՝ տեսանյութում