Այսօր, հոկտեմբերի 2-ին, ՀՅԴ Հայաստանի երիտասարդական և ՀՅԴ «Նիկոլ Աղբալյան» ուսանողական միությունների կազմակերպությամբ՝ ՀՀ ԱԱԾ շենքի դիմաց բողոքի ցույց իրականացվեց:

Ցույցի մանակիցները պահանջում են չարտահանձնել ՀՀ տարածք ներխուժած, երեխաների ու նրանց մոր վրա հարձակված ադրբեջանցի զինծառայողին, ենթարկել պատասխանատվության, փոխանակել Բաքվում գերության մեջ գտնվող մեր հայրենակիցների հետ։

Մասնակիցների ձեռքին՝ «Հայ գերիների վերադարձը առաջնահերություն», «Հաջորդը կարող է լինել ձեր ընտանիքը», «Պետության դերը կանխելն է, ոչ թե արձանագրելը», «Սյունիք–տուր ադրբեջանցիների համար, հովանավոր՝ ԱԱԾ» գրությամբ պաստառներ կային:

ՀՅԴ ՀԵՄ Կենտրոնական վարչության անդամ Տարոն Մանուկյանը հայտարարեց, որ մեծ ամոթով են այսօր այստեղ կանգնած, քանի որ կանգնած են ԱԱԾ շենքի դիմաց, որ պահանջեն՝ մեր սահմանը խախտած ադրբեջանցուն, որն իր երեխաների ներկայությամբ կրակել է հայ կնոջ վրա, չարտահանձնեն Ադրբեջանին․ «Հայտնվել ենք մի իրավիճակում, որ ադրբեջանցի զինծառայողը կրակ է բացում հայ մոր վրա, և հնարավոր է արտահանձվի՝ որպես բարի կամքի դրսևորում, ինչպես տեսել ենք նախորդ անգամները։ Մեր պահանջը հետևյալն է՝ նա իրավունք չունի հանձնվել թշնամուն, միակ նախապայմանը նրա՝ Ադրբեջանին հանձնվելու փոխանակումն է մեր որևէ հայ զինծառայող գերու հետ։ Այլ պայման մեզ համար անընդունելի է»։

Անդրադառնալով Հիքմեթ Հաջիևի հայտարարություններին՝ ՀՅԴ ԵՄ կենտրոնական վարչության անդամ Ստելլա Հունանյանն ասաց․ «Խոսքս ուղղում եմ Հաջիևին․ եթե դուք հայ ժողովրդի հետ խաղաղություն կնքելու քայլեր եք անում, ապա բաց թողեք հայ գերիներին։ Հայ երիտասարդությունը դա կընկալի խաղաղություն կնքելու լավագույն փաստացի ապացույցը։ Հակառակ պարագայում ձեր բոլոր թեզերը պարզապես կեղծ են»։

ՀՅԴ Հայաստանի ԳՄ անդամ Գառնիկ Դանիելյանը լրագրողների հետ զրույցում անդրադառնալով նրան, որ հնարավոր է Սյունիքի Շաքի գյուղում հայ կնոջ վրա կրակած ադրբեջանցի զինծառայողին արտահանձնեն Ադրբեջանին՝ ասաց. «Ուզում հիշեցնել ձեզ Սյունիքում պահնորդական ծառայություն իրականացնող անձի սպանության գործը, երբ փառք ու պատվով, դափնիներով հանցագործին ճանապարհեցին Ադրբեջան, և այնտեղ գրեթե հերոսացրեցին այդ անձին, ոնց որ հերոսացնում են Ռամիլ Սաֆարովին և իր նմաններին. սրա ամբողջ պատասխանատվությունը ընկնում է ՀՀ իշխանության վրա։ Իշխանությունների թողտվության պարագայում է, որ նման բաներ լինում են, և անհետևանք լինելու պատճառով այս ամեն ինչը կրկնվում է։ Ցավոք սրտի, այս երևույթները շարունակական են լինելու, որովհետև մեղավորները չեն պատժվում, Հայաստանն էլ այնպես է գործում, կարծես որևէ մի բան չի կատարվել»։

Դանիելյանի խոսքով՝ տեղի ունեցածը պետք է նախ ուսումնասիրվի և գնահատական ստանա Հայաստանի Հանրապետությունում, իսկ հետագա բանակցությունների ընթացքում պետք է հաշվի առնվի նաև տուժած ընտանիքի դիրքորոշումը։

«Նա նախ պիտի դատապարտվի Հայաստանում։ Մեր հասարակությունը տեղի ունեցածի մանրամասներից տեղյակ չի։ Գործը ծածկադմփոց է արվում։ Բավարար, հանրային հնչողություն ունեցող գործերը հանրային իրազեկում չեն ստանում»,- ասաց Դանիելյանը։

Խոսելով Հայաստանի անվտանգության խնդիրների և արտաքին աջակցության վերաբերյալ խնդիրների մասին Դանիելյանը նշեց, որ Հայաստանի անվտանգային հարցերը չի կարող ՌԴ-ն կամ ԱՄՆ-ն լուծել։

«Կան հարցեր, որ մենք պիտի լուծենք։ Ամերիկան չի գալու մեր տեղը մեր հայուհուն պաշտպանի, մեր երեխաներին պաշտպանի։ Այսինքն՝ ո՞վ պետք է գա մեզ, մեր տները պաշտպանի։ Առաջին հերթին մենք պետք է հասկանանք, թե ինչ խոր ճգնաժամի մեջ ենք»,- նշեց նա:

ԱԱԾ շենքի դիմաց ցույցն ամբողջությամբ՝ տեսանյութում