ԼՈՍ ԱՆՋԵԼԵՍ, ԿԱԼԻՖՈՐՆԻԱ — Հայ Երիտասարդաց Դաշնակցութեան Արեւմտեան Միացեալ Նահանգների շրջանը (AYF-WUS) սեպտեմբերի 24-ից 27-ը գումարեց իր 52-րդ տարեկան Պատգամաւորական ժողովը։ Բոլոր 13 մասնաճիւղերի պատգամաւորները հաւաքուել էին ՀԵԴ «Քեմփ Բիգ Փայնզ»-ում՝ քառօրեայ ժողովի ընթացքում վերանայելու անցած աշխատանքային տարուայ միջոցառումները, ծրագրերն ու նախաձեռնութիւնները եւ քննարկելու առաջիկայ տարուայ կազմակերպական ծրագրերը, առաջնահերթութիւններն ու նպատակները։

Ժողովին ներկայ էին ՀՅԴ Կենտրոնական կոմիտէի, ՀԵԴ Պատանեկան միութեան Կենտրոնական վարչութեան, ՀԵԴ ճամբարի կառավարման խորհրդի եւ ՀԵԴ Կանադայի Կենտրոնական վարչութեան ներկայացուցիչները։

Քննարկումների առանցքում էին անդամների ներգրաւուածութեան ընդլայնման, համայնքի հետ կապերի եւ հասարակական-քաղաքական գործունէութեան խորացման, հայ երիտասարդութեան համար աւելի ամուր հիմքերի ստեղծման, ինչպէս նաեւ բազմազան ծրագրերի եւ նախաձեռնութիւնների միջոցով Հայրենիքի հետ կապերի ամրապնդման ռազմավարութիւնները։

ՀԵԴ Արեւմտեան Միացեալ Նահանգների Պատգամաւորական ժողովը վերահաստատեց կազմակերպութեան հաւատարմութիւնն իր հինգ հիմնասիւներին եւ ընդգծեց ՀԵԴ-ի էական դերը Հայրենիքի քաղաքական ու մշակութային կեանքում։

52-րդ տարեկան Պատգամաւորական ժողովն աւարտուեց նոր Կենտրոնական վարչութեան ընտրութեամբ, որի կազմում ընդգրկուեցին Անժելիք Ալեքսանդրը, Մանուկ Մինասեանը, Դալար Անդոնեանը, Նայիրի Ղազարեանը, Սարգիս Սերայտարեանը, Թալար Տէրտէրեանը եւ Ալիք Քալաշեանը։

Նորընտիր Կենտրոնական վարչութեան անունից Անժելիք Ալեքսանդրը յայտարարեց. «ՀԵԴ 52-րդ տարեկան Պատգամաւորական ժողովը վերահաստատեց միասնականութեան, յառաջընթացի եւ ծառայութեան հանդէպ մեր անսասան յանձնառութիւնը։ Մենք արժեւորեցինք մեր այսօրուայ դիրքը՝ միաժամանակ նոր տեսլական սահմանելով հայ երիտասարդութիւնն ու մեր Հայրենիքն ամրապնդելու համար։

Ժողովը վերահաստատեց այն արժէքները, որոնք մշտապէս առաջնորդել են ՀԵԴ-ին՝ զօրացնել երիտասարդներին, ծառայել մեր համայնքներին եւ հայկական ոգին փոխանցել սերնդից սերունդ։ Մենք հեռանում ենք ընդհանուր նպատակով միաւորուած եւ աւելի հզօր ու փոխկապակցուած հայկական ապագայ կերտելու վճռականութեամբ»։

1933 թուականին հիմնադրուած Հայ Երիտասարդաց Դաշնակցութիւնը Միացեալ Նահանգների ամենամեծ եւ ամենաազդեցիկ ամերիկահայ երիտասարդական կազմակերպութիւնն է, որը նուիրուած է Սփիւռքի հայ երիտասարդութեան շրջանում հասարակական, քաղաքական, կրթական, մարզական եւ մշակութային գիտակցութեան զարգացմանը։