Կառավարութեան ծրագիրը արցախեան հարցի լուծման համար գերակայ կը նկատէ կարգավիճակն ու անվտանգութիւնը: Հայկական կողմը, իր մօտեցումի բանաձեւումներուն մէջ անհրաժեշտութեան առջեւ է աւելի յստակ հիմնադրոյթներ ամրագրելու:

Այսպէս`

Ա.- Արցախահայութեան ինքնորոշման հանրաքուէն եւ Սահմանադրութիւնը ելակէտային նշանակութիւն ունին բանակցային փիլիսոփայութիւնը զարգացնելու համար: Այս պարագային անկախութեան հռչակագիրը Արցախի Հանրապետութեան մասին յստակ իրաւադրոյթ է: Իսկ Սահմանադրութիւնը արցախահայութեան այսօրուան փաստացի սահմաններուն ամրագրումն է` դարձեալ հանրաքուէով: Թէ՛ կարգավիճակի եւ թէ՛ անվտանգութեան հարցերով հանրաքուէով վճռորոշուած իրողութիւն գոյութիւն ունի արդէն:

Բ.- Երկիրներու պարագային միջազգային օրէնքի տարածքային ամբողջականութեան յարգումը ունի արցախեան ընկալում: Խօսքը հիւսիսային Արցախի մասին է: Հիւսիսային Արցախի ազատագրումը ըստ էութեան թէ՛ կարգավիճակին եւ թէ՛ անվտանգութեան հետ սերտօրէն կապուած խնդիր է:

Գ.- Հայաստանի Հանրապետութիւնը պաշտօնական ամրագրումներով կը հանդիսանայ Արցախի անվտանգութեան գլխաւոր երաշխաւորը: Այդպիսով կը բացատրուի Երեւանի իբրեւ կողմ մասնակցութիւնը բանակցութիւններուն: Գլխաւոր երաշխաւորի կարգավիճակի իրաւականացումը տեսք կը ստանայ Հայաստանի եւ Արցախի հանրապետութիւններուն միջեւ ռազմաքաղաքական դաշինքի կնքումով: Դաշինքը կամ գլխաւոր երաշխաւորութիւնը անվտանգութեան հետ կապուած ըլլալով նաեւ կարգավիճակի միջազգայնացման կամ միջազգային ճանաչումին հետ կը կապուի: Իրողապէս եւ իրաւականօրէն` Արցախի անկախ հանրապետութիւնն է, որ կ՛ապահովէ արցախահայութեան անվտանգութիւնը:

Արցախեան շարժման 31-ամեայ նշումներուն բանակցային ելակէտային հիմնադրոյթներու բանաձեւումը որոշ հրամայականի ուղենիշեր կը ներառէ իր մէջ: Մանաւանդ երբ աշխուժացած են արտաքին ակնկալութիւններն ու շրջանառութեան մէջ դրուող «փոխզիջումնային» բանաձեւերը:

aztagdaily.com