Քայլարշաւ Լիբանանի մէջ` Հայոց ցեղասպանութեան 104-ամեակին առիթով
25 Ապրիլ 2019 Հայոց ցեղասպանութեան 104-ամեակին առիթով եւ կազմակերպութեամբ Լիբանանի հայ քաղաքական երեք կուսակցութիւններուն, երէկ Լիբանանի մէջ տեղի ունեցաւ քայլարշաւ մը, որուն մասնակցեցան աւելի քան քսան հազար լիբանանահայեր։Քայլարշաւը ընթացք առաւ Պուրճ Համուտէն, երեկոյեան ժամը 6։20-ին եւ հասաւ մինչեւ Անթիլիասի մայրավանք։
Լիբանանահայութիւնը քայլարշաւով վերանորոգեց իր պահանջատէր կեցուածքը եւ յարգեց Հայոց ցեղասպանութեան զոհերուն յիշատակը։
Անթիլիասի մայրավանքին մէջ տեղի ունեցաւ Հայոց ցեղասպանութեան 104-ամեակին նուիրուած ոգեկոչումի ձեռնարկ մը, որուն ընթացքին նախագահական պալատի հարցերու պետական նախարար Սելիմ Ժրայսաթի լիբանանահայութեան զօրակցելով շեշտեց Հայոց ցեղասպանութեան միջազգային ճանաչումի անհրաժեշտութիւնը, ինչպէս նաեւ Անթիլիասի մայրավանքը ողողած բազմահազար լիբանանահայութեան փոխանցեց Լիբանանի հանրապետութեան նախագահ զօր. Միշել Աունի ողջոյնը։
Ապա Մեծի Տանն Կիլիիկոյ Արամ Ա. կաթողիկոսը լիբանանահայութեան փոխանցեց իր պատգամը՝ հաստատելով, որ հայ ժողովուրդը կը մնայ պահանջատէր եւ ոչ ոքի գութը կը հայցէ, այլ՝ իրաւատէրի հանգամանքով իր իրաւունքները կը պահանջէ։ Արամ Ա. կաթողիկոս պահանջատէր լիբանանահայութեան ուղղած իր խօսքին մէջ յայտարարեց. «Յիշեցում օր է ցեղասպանին, որ մեր ժողովուրդին համար ընդունելի չէ երբեք իր ցաւակցութիւնը»։
Արամ Ա. կաթողիկոսը ընդգծեց Միջազգային ընտանիքին կողմէ արդարութեան կառչած մնալու կարեւորութիւնը։
Ոգեկոչման ձեռնարկը աւարտեցաւ «Սարդարապատ» յաղթերգով։
