«Ես քո անունը կրող դպրոցի սանիկն եմ եւ 1000 աշակերտների անունից եկել եմ ասելու՝ ծնունդդ շնորհավոր, լեգենդար հերոս», – այս խոսքով հանդիսավոր միջոցառումը բացել է հերոսի թոռը, որն այս տարի հաճախել է 1-ին դասարան:

Միջոցառման ընթացքում ցուցադրվել է հերոսի գործելաոճի մասին պատմող ‹‹Գոյամարտ›› հեռուստածրագրի պատրաստած ‹‹Բեկորը›› տեսաֆիլմը, որտեղ ներկայացվում է, թե ինչպես է նասեփական օրինակով վարակում շրջապատին՝ մարտադաշտը դարձնելով սրբավայր, հայրենքի պաշտպանությունը՝ գերնպատակ:

Աշոտ Ղուլյանի մարտական ընկեր Էդուարդ Աբրահամյանի խոսքով՝ Բեկորը ընտանիքի լավ հայր էր, որպես հրամանատար՝ խիզախ, բարի ու հավասարակշռված, եւ ամեն անգամ ցավալի էր տանում վաշտի զինվորների վիրավորվելն ու զոհվելը:

Հերոսի ծննդյան 60-ամյակի կապակցությամբ Արցախի ազատամարտիկների միության նախագահ գեներալ-մայոր Սամվել Կարապետյանի երախտիքի խոսքը ներկայացրել է Արցախի ազատամարտիկների միության աշխատակազմի ղեկավար Էդուարդ Խաչատրյանը.

«Արցախյան գոյապայքարի նվիրյալ, լեգենդար հրամանատար Աշոտ Ղուլյանը կդառնար 60 տարեկան: Նա իր կյանքով եւ անմնացորդ նվիրվածությամբ կերտեց ազատության ճանապարհը: Կենդանության օրոք լեգենդ դարձած զինվորականը կատարեց իր առաքելությունը՝ սեփական կյանքի գնով ազատագրելով հայոց ոստան Արցախը: Բեկորն այն նվիրյալներից է, ով մեծ ներդրում ունեցավ հայոց բանակի կազմավորման եւ ստեղծման սուրբ գործում: Մեծ խորհուրդ ու նշանակություն ունի արցախյան ազատամարտի նվիրյալ՝ Աշոտ Ղուլյանի մարտական ճանապարհը»:

Էդուարդ Խաչատրյանը վարչության կողմից հուշանվեր է հանձնել Աշոտ Ղուլյանի ընտանիքին:

Միջոցառման ժամանակ գեղարվեսատական կատարումներով հանդես են եկել ՊԲ «Ասպետ» համույթն ու Աշոտ Ղուլյանի անունը կրող Ստեփանակերտի թիվ 2 հիմնական դպրոցի սաները:

Հասմիկ ՀԱԿՈԲՅԱՆ

aparaj.am