Խաղաղությունը չեն մուրում, խաղաղությունը պարտադրում են, իսկ խաղաղությունը պարտադրելու և երկրում կայունություն, անվտանգություն ունենալու համար պետք է ունենաս ադեկվատ ղեկավարություն, ով ծնկի չի եկել թշնամու առաջ, վերակազմակերպես բանակը, և կարողանաս պաշտպանել քո հայրենիքը, այլ տարբերակ պարզապես չկա: Այս մասին ասել է ՀՅԴ Հայաստանի ԳՄ ներկայացուցիչ Իշխան Սաղաթելյանը «Եռաբլուր» զինվորական պանթեոնում, ուր ՀՅԴ անդամներն այցելել են 2016թ. ապրիլյան ռազմական գործողությունների մասնակիցների հիշատակը հարգելու համար։

«Բայց այսօրվա մեր քաղաքական գիծը գնում է այլ ուղղությամբ․ մենք այսօր արդեն զորք չենք ուղարկում Արցախ, փորձ է արվում ժողովրդին տրամադրել կեղծ խաղաղության, որը տանելու է հերթական պատերազմի»,-արձանագրել է Իշխան Սաղաթելյանը։

Նա ընդգծել է, որ պատերազմը չի ավարտվել, կա հարաբերական հրադադար, այս օրերին, խայտառակ կապիտուլյացիայից հետո էլ թշնամին շարունակում է ոտնձգությունները, այս ժամանակահատվածում մենք ևս ունեցել ենք կորուստներ, այսօր ևս թշնամին մեր առաջ պահանջներ է դրել, հետևաբար, պետք է լինել զգոն։

«Իսկ այն մարտահրավերները, որ մեր առջև կան, պարզապես այսօրվա քաղաքական իշխանությունը ի վիճակի չէ այդ մարտահրավերներին դիմակայել։ Հեռացման մեր պահանջներից մեկը բխում է նաև դրանից․ իրենք վտանգավոր են և դա փաստ է»,-ասել է Իշխան Սաղաթելյանը։

«Եռաբլուր» պանթեոնում այսօր ամփոփում են նաև դաշնակցական գործիչ, Մերձավոր Արևելքում Արցախի ներկայացուցիչ Կարո Քեբաբջյանին։

«Ընկեր Կարոն մեր դաշնակցական այն ընկերներից էր, որը Հայաստանի անկախությունից հետո անմիջապես նետվեց դեպի հայրենիք և անցնող 30 տարիների ընթացքում ծառայեց իր ժողովրդին, Հայաստանին, Արցախին։ Նվիրյալի, լավ ընկերոջ, լավ հայի օրինակ է։ Կորուստը մեծ է»,-ասել է Սաղաթելյանը։

Անդրադառնալով արտահերթ ընտրություններին՝ Իշխան Սաղաթելյանն ասաց․ «Եթե մինչեւ ընտրություններ չստացվի ազատվել այս չարիքի կառավարությունից, ընտրությունը լինելու է այն վերջին կետը, որի միջոցով պետք է ազատվել այս դավաճաններից։ Օրինակ, եթե ՀՅԴ-ն որոշի մասնակցել այդ ընտրություններին, առաջնորդվելու է միայն այդ սկզբունքով՝ հեռացնել այս սրիկա դավաճաններին, փոխել երկրի քաղաքական կուրսը եւ փրկել հայրենիքը: Ինքն ամեն ինչ անելու է, որ վերարտադրվի, բայց շանս չի ունենալու, որովհետեւ, վերջին հաշվով, մեր ժողովրդի աչքի առջեւ է այս ամենը տեղի ունեցել․ ինչքա՞ն կարելի է խաբել, մոլորեցնել»:

Նա նշեց, որ Փաշինյանի հիմնական թեզը լինելու է հետևյալը, իբրև թե՝ ինքը խաղաղություն է բերել, իսկ ընդդիմադիրներին ներկայացնելու է իբրև պատերազմի ուժեր:

«Սա իրենց հայտնի թեզն է դեռ 1996-ից: Բայց ակնհայտ է, որ մեր ժողովրդին կոտորել են եւ պատերազմի են բերել այդ «խաղաղասեր ուժերը»: Խաղաղությունը չեն մուրում՝ պարտադրում են, իսկ դա կարող ես պարտադրել ուժեղ պետությամբ: Իրենք ամեն ինչ անելու են այս ամենը մոռացության տալու եւ թուրքերի հետ նոր էջ սկսելու համար»,-ասաց Իշխան Սաղաթելյանը

Մանրամասն՝ տեսանյութում

https://youtu.be/v6c8A81G7k0