Նիկոլ Փաշինյանը եւ նրա հետնորդները զբաղված են բռնապետություն հաստատելով, ժողովրդավարությունը քայքայելով եւ հայրենիքը վերջնականապես թշնամուն հանձնելով: Այս մասին հայտարարեց պատգամավոր, «Հայաստան» խմբակցության քարտուղար Արծվիկ Մինասյանը նույն դաշինքի պատգամավոր Արմեն Չարչյանի կալանքի վերաբերյալ դատարանի որոշմանը նվիրված մամուլի ասուլիսին: Հիշեցնենք, որ ըստ օրենսդրության, ժողովրդի ընտրյալը կարող է ձերբակալվել միայն ԱԺ հաստատմամբ եւ գլխավոր դատախազի առաջարկությամբ: Իշխանությունները զերծ են մնացել նման «ձեւականություններից»:

Արծվիկ Մինասյանն արձանագրեց, որ այս կերպ իշխանություններն արդեն ունեն երեք պատանդ պատգամավոր: Նրա խոսքով` ընդդիմության դեմ հարուցված բազմաթիվ քրեական գործերն անմիջական քայլեր են բռնապետության հաստատման ուղղությամբ: «Նրանք չեն վարանում բարձրաձայն խոսել այդ մասին, դա ամրագրված է նաեւ այսպես կոչված կառավարության ծրագրում: Սեւ ու սպիտակով գրված է, որ դատարանը, հետաքննությունը եւ ոստիկանությունը պետք է կատարեն կառավարության ցանկությունները: Դա ոչ միայն ներքին եւ միջազգային օրենսդրության խախտում է, այլեւ` դիկտատուրայի ուղղակի հաստատում եւ քաղբանտարկյալների բացահայտ ապօրինի հետապնդում: Այս հարցերը կդրվեն միջազգային կառույցների առջեւ եւ կստանան իրավական եւ քաղաքական շարունակություն: Հարձակումները չեն կանգնեցնի «Հայաստան» դաշինքին եւ չեն ստիպի նրանց շեղվել ընտրված ուղուց` հանուն Հայաստանի եւ Արցախի անվտանգության»,- վստահեցրեց Մինասյանը:

Պատասխանելով կառավարության ծրագրի վերաբերյալ դաշինքի դիրքորոշման մասին հարցին, որը կներկայացվի վաղը, Մինասյանը նշեց, որ պրոֆեսոր Չարչյանի ձերբակալության հարցում իշխանությունների նպատակը դաշինքին հիմնական աշխատանքից` ամբողջ ճշմարտությունը խորհրդարանում ասելուց շեղելն է, բայց դա չի հաջողվի: «Մնացած մանրամասները` վաղը»,- խոստացավ Մինասյանը:

Հարցին, թե ինչու իշխանությունները չանցան խորհրդարանական պատժամիջոցների ճանապարհով եւ արդյո՞ք դա ընդհանրապես անհրաժեշտ է` հաշվի առնելով Ազգային ժողովի մեծամասնությունը, Մինասյանը նշեց, որ դա ծայրահեղ վտանգավոր գաղափար է: «Այդ տրամաբանությամբ նրանց նույնիսկ պետք է չէ օրենքներ ներկայացնել խորհրդարան: Չէ որ նրանք մեծամասնություն են»,- պարզաբանեց պատգամավորը: