Այսօր, նոյեմբերի 25-ին ԱԺ «Հայաստան» խմբակցությունը նախաձեռնել է «Սահմանագծման եւ սահմանազատման հիմնախնդիրներ» թեմայով ԱԺ հայտարարության նախագծի վերաբերյալ խորհրդարանական լսումներ ԱԺ 3 խմբակցությունների, արտախորհրդարանական ուժերի ներկայացուցիչների, նախկին զինվորականների, հասարակական, մտավորական գործիչների, մասնագետների, վերլուծաբանների և փորձագետների մասնակցությամբ։

«Ահագնացող սպառնալիքները մեզ բոլորիս ստիպում են իրավիճակին համարժեք արձագանքել»,-սահմանգծման ու սահմանազատման հարցերով հրավիրված խորհրդարանական լսումների ժամանակ հայտարարեց «Հայաստան» խմբակցության ղեկավար Սեյրան Օհանյանը։

Նա նշեց, լսումների նպատակն է վեր հանել բոլոր այն խնդիրները, որոնք կապված են առանց համապատասխան պայմանների, առանց խաղաղության ու իրավապայմանագրային հենքի ՀՀ իշխանությունների կողմից ընթացակարգերի կոպիտ խախտմամբ, հապճեպ, թուրք-ադրբեջանական խաբկանքին համահունչ սահմաների ճշտման գործընթացի հետ։

Լսումները նպատակ ունեն նաև կանխարգելել ՀՀ իշխանությունների կողմից այս կորուստների ընթացքը։

ՀՅԴ Հայաստանի ԳՄ ներկայացուցիչ, ԱԺ փոխնախագահ, «Հայաստան» խմբակցության անդամ Իշխան Սաղաթելյանը խմբակցության հրավիրած ԱԺ լսումների ժամանակ ներկայացրեց Սահմանագծման եւ սահմանազատման հիմնախնդիրների վերաբերյալ ԱԺ հայտարարության նախագիծը, որը լսումներից հետո կլրամշակվի և կընդունվի։

Ստորեւ ներկայացնում ենք Հայտարարության նախագիծը․

«Հիմք ընդունելով Սահմանադրության 103-րդ հոդվածը, «Ազգային ժողովի կանոնակարգ» սահմանադրական օրենքի 98-րդ հոդվածը,

Հայաստանի Հանրապետության Ազգային ժողովը.

Դատապարտում է

ա) Ադրբեջանի կողմից Արցախի Հանրապետության տարածքների բռնազավթումը,

բ) Ադրբեջանի Հանրապետության զինված ուժերի կողմից Հայաստանի Հանրապետության ինքնիշխան տարածքների ներխուժումը, շարունակաբար ուժի գործադրումը կամ այն գործադրելու իրական սպառնալիքները,

գ) Ադրբեջանի կողմից ռազմական գործողությունների նաև դադարումից հետո գերեվարված, պատանդառված անձանց նկատմամբ արձանագրվող միջազգային իրավունքի կոպտագույն խախտումները, կեղծ դատավարությունների պատրվակով նրանց չհանձնելը, պատերազմական հանցագործություն համարվող գործողությունները:

Արձանագրում է, որ

ա) Ադրբեջանի կողմից վերը նշված հանցավոր գործողությունները շարունակվում են ուղեկցվելով Հայաստանի ու Արցախի տարածքների նկատմամբ հավակնություններով, այդ տարածքներում բնակվող խաղաղ բնակիչների նկատմամբ ահաբեկչություններով, բռնազավթված բնակավայրերում սրբավայերի ու պատմական հուշարձան հանդիսացող եկեղեցական կառույցների սրբապղծմամբ:

բ) Սահմանների որոշումը սահմանակից պետությունների բացառիկ իրավասության ոլորտն է, և որ սահմանները որոշվում են սահմանակից պետությունների միջև միջազգային իրավունքի վրա հիմնված համաձայնության միջոցով Միավորված Ազգերի Կազմակերպության «Միջազգային պայմանագրերի իրավունքի մասին» 1969թ. Վիեննայի կոնվենցիայի համաձայն, ըստ որի, ի թիվս այլ դեպքերի՝ առոչինչ է ուժի սպառնալիքի կամ այն կիրառելու միջոցով ցանկացած միջազգային համաձայնություն:

գ) Արցախի ժողովրդի՝ իր պատմական տարածքում ինքորոշման իրավունքի երաշխավորված իրացումը և Արցախի բռնազավթված տարածքների դեօկուպացիան տարածաշրջանում խաղաղության հաստատման գլխավոր նախապայմանն է ԵԱՀԿ Մինսկի խմբի նախագահության ձևաչաւիոփ

դ) 44-օրյա պատերազմում անմիջական ներգրավվածություն ունեցող պետություններից Թուրքիան շարունակում է բացահայտ աջակցել Ադրբեջանի ագրեսիվ գործողություններին մնալով անպատիժ,

ե) Հայաստանի Հանրապետության գործադիր իշխանության ներկայացուցչի կողմից ստորագրված առնվազն քաղաքական և ռազմական նշանակություն ունեցող միջազգային փաստաթղթերը դե ֆակտո իրավական հետևանքներ են առաջացնում, ինչի արդյունքում բացահայտ շրջանցվում են Հայաստանի Հանրապետության Սահմանադրության 117-֊րդ հոդվածի 1-ին մասի 2-րդ կետի հիմնադրույթները:

Առաջնորդվում է Հայաստանի Հանրապետության Սահմանադրությամբ, որի համաձայն Հայաստանի Հանրապետության տարածքի փոփոխությանը վերաբերող հարցերը լուծվում են բացառապես հանրաքվեի միջոցով, ինչպես նաև Հայաստանի Հանրապետության Գերագույն խորհրդի 1992թ. հուլիսի 8-ի որոշմամբ:

Գտնում է, որ

ա) Ադրբեջանի Խորհրդային Սոցիալիստական Հանրապետությանը ապօրինի բռնակցված Արցախը չի կարող ընդգրկվել Ադրբեջանի տարածքային ամբողջականության շրջանակներում: Ընդ որում, Ադրբեջանը իր Սահմանադրությամբ չի ընդունել, որ հանդիսանում է Ադրբեջանի Խորհրդային Սոցիալիստական Հանրապետության իրավահաջորդը:

բ) Հայաստանի Հանրապետությունը չունի որևէ միջազգային-իրավական պարտավորություն հիմք ընդունելու որևէ քարտեզով արձանագրված սահմանները, առավել ևս, երբ այն չի համապատասխանում միջազգային լավագույն փորձին:

գ) Հայաստանի Հանրապետությունը պաշտոնապես ներկայացնող որևէ անձ, այդ թվում գործադիր իշխանության ղեկավարը կամ այլ ներկայացուցիչը, չի կարող գրավոր կամ բանավոր համաձայնության գալ խախտելով Արցախի Հանրապետությանը և Հայաստանի Հանրապետությանը վերաբերող վերը նշված հիմնարար իրավական նորմերը: Այդպիսի ցանկացած համաձայնություն ի սկզբանե առոչինչ է:

դ) Հայաստանի Հանրապետության և Ադրբեջանի Հանրապետության միջև վեճերը կարող են լուծվել բացառապես խաղար միջոցներով առանց ուժի և ուժի սպառնալիքի կիրառման:

Պահանջում է Հայաստանի Հանրապետության կառավարությունից.

ա) զերծ մնալ որևէ բանակցությունից, գրավոր կամ բանավոր համաձայնություններից, որոնք կխախտեն Հայաստանի Հանրապետության Սահմանադրության պահանջներն ու հայ ժողովրդի հավաքական կամքը արտահայտված Անկախության հռչակագրով:

բ) Հայաստանի Հանրապետության և Ադրբեջանի Հանրապետության միջև սահմանագծման և սահմանազատման վերաբերյալ հարցը որևէ կերպ չտարանջատել Արցախի ժողովրդի՝ իր պատմական տարածքում ինքորոշման իրավունքի երաշխավորված իրացումից:

Կոչ է անում միջազգային կազմակերպություններին, բարեկամ երկրների խորհրդարաններին դատապարտել Ադրբեջանի Թուրքիայի կողմից իրականացված ն շարունակվող հանցագործությունները, ձեռնարկել վերջիններիս նկատմամբ իրավական պատասխանատվության ենթարկելուն ուղղված գործողություններ»։

Փաստաթղթի վերաբերյալ ելույթներում մասնակիցները ներկայացրել են իրենց առաջարկությունները եւ դիտողությունները:

Նրանք ողջունել են հայտարարության նախագիծը` նշելով, որ բովանդակային առումով այն համապատասխանում է այսօրվա հրամայականին եւ ունի իրավաքաղաքական նշանակություն: Կարծիք է հնչել, որ Ադրբեջանի հետ համապարփակ խաղաղության պայմանագիր չունենալու պարագայում սահմանազատման որեւէ գործընթացի սկսումը ժամանակավրեպ է եւ հակասող Հայաստանի ազգային շահերին: Նշվել է, որ թշնամի պետության հետ ճանապարհ բացելուց առաջ պետք է լուծել անվտանգության հարցը: Բանակի կարողությունների վերականգնման հարցում անհրաժեշտ է համարվել ունենալ համազգային կոնսենսուս: Կարեւորվել է մեր երկրի ռազմավարական եւ ռազմական կարողությունների վերականգնումը:

Բանախոսները պահանջել են իշխանությունից հրապարակել առաջիկայում ստորագրվելիք փաստաթղթերը:

Ելույթներում արտախորհրդարանական քաղաքական ուժերն անդրադարձել են երկրի առջեւ ծառացած մարտահրավերներին, ներկայացրել դրանց լուծման իրենց ուղիները:

Ամփոփելով լսումները` ԱԺ փոխնախագահ Իշխան Սաղաթելյանը կարեւորեց հնչած ելույթներն ու առաջարկները:

«Շատ խոսվեց միասնության մասին , մենք բազմաթիվ անգամ հայտարարել ենք, կրկին հայտարարում եմ՝ սա մեկ ուժի, մեկ մարդու, մեկ կազմակերպության խնդիր չէ, սա հայ ժողովրդի խնդիրն է։ Այստեղ կան բազմաթիվ մարդիկ, կուսակցության ներկայացուցիչներ, տարբեր ոլորտների մարդիկ, մեզ բոլորիս միավորել է Հայրենիքի փրկության գաղափարը։ Այս օրերին կարևոր խնդիրներից է ձևավորել պահանջ՝ ցույց տալով, որ այս իշխանությունները չունեն մանդատ երկիրը տանելու նոր զիջումների, նոր կապիտուլյացիայի։ Բազմաթիվ անգամ իշխանականները հնչեցրել են՝ «ժողովրդի կողմից ունենք վստահություն, անելու ենք այն, ինչ ուզելու ենք», մեր խնդիրն է, որ մեր պահանջը դարձնենք ժողովրդական պահանջ և ցույց տանք որ չունեն այդ մանդատը»,-ասաց Իշխան Սաղաթելնաը։

Ավարտելով խոսքը ԱԺ փոխնախագահն ընդգծեց․

«Մենք առաջնորդվում ենք մեկ սկզբունքով՝ ով մեր ծրագրերին դեմ չէ, ով մեզ դեմ չէ մենք իր կողքն ենք, իր հետ ենք՝ հանուն Հայաստանի և Արցախի»

https://youtu.be/Zx0PoOBOq1o

https://youtu.be/oxTeKtQu7jg