Սեպտեմբերի 14-ին Լոռու մարզի Այգեհատ գյուղում տեղի է ունեցել Լոռվա ՀՅԴ կառույցի 10 նորագրի երդման արարողություն, որին ներկա էին ՀՅԴ Հայաստանի ԳՄ նախագահ Աշոտ Սիմոնյանը, ԳՄ անդամներ Գեղամ Մանուկյանը, Խաչիկ Ստեփանյանը և ՀՅԴ անդամ, ԱԺ «Հայաստան» խմբակցության պատգամավոր Արմունուհի Կյուրեղյանը:

Արարողությանն անդրադարձել է Գեղամ Մնաուկյանը. «Այսօր Լոռվա Այգեհատ գյուղում երջանկություն ունեցա մասնակցել Լոռվա ՀՅԴ կառույցի 10 նորագրի երդման արարողությանը: Նրանց համար խիստ պարտավորեցնող է հատկապես այս վայրում՝ Դաշնակցության հիմնադիրներից, Դաշնակցության բարոյական տիպար, մեր ժողովրդի ազգային ազատագրական պայքարի մեծ գաղափարախոսներից Սիմոն Զավարյանի շիրիմի մոտ Դաշնակցույթան մեծ ընտանիք ընդունվելու իրենց երդում տալը: Այն բարոյական պարտավորությունը, որ Զավարյանի հիշատակը բոլորիս վրա դնում է, անչափ պարտավորեցնող է: Սիմոն Զավարյանը ծննդով հենց այս գյուղից է, իր ամբողջ կյանքը նվիրել է Արևմտյան Հայստանի ազատագրմանը՝ անցնելով Կիլիկիայով, Արևմտյան Հայաստանով, ի վերջո 1913 թվականին հուղարկավորվեց Թիֆլիսի հայկական Խոջիվանքի գերեզմանատանը: 1998 թվականին միայն նրա աճյունը հնարավոր եղավ վերահուղարկավորել նրա ծննդավայրում»: