Ռուսական եւ ամերիկեան պաշտօնական յայտարարութիւնները միաժամանակ կը խօսին Ուաշինկթըն-Փեքին-Մոսկուա եռակողմ հանդիպումի հաւանականութեան մասին: Հանդիպումին կայացումը անշուշտ տակաւին չէ հաստատուած, սակայն հիմնական օրակարգին շուրջ կայ ընդհանուր մօտեցում: Ենթադրեալ եռակողմը պիտի քննարկէ Ուքրանիա-Ռուսիա պատերազմը դադրեցնելու օրակարգը: Յստակ չէ տակաւին, որ թէական համաձայնութիւնը ժամանակաւոր հրադադարի՞, թէ՞ տեւական խաղաղութիւն հաստատելու պիտի վերաբերի:

Այս բոլոր հարցականներով հանդերձ եւ տրուած ըլլալով, որ եռակողմի մասին յայտարարութիւնները պաշտօնական են, կարելի է որոշ հետեւութիւններ արձանագրել:

Առաջին. այս յայտարարութիւնները` հնչած միաժամանակ թէ՛ Սպիտակ տունէն եւ թէ՛ Քրեմլինէն, կը կատարուին Թրամփի շրջադարձային որոշումէն ետք` Ռուսիոյ պատժամիջոցներու սահմանափակման եւ ռուսական վառելիքի ուղղութեամբ կայացած գործարքի առումներով: Այս կ՛ենթադրէ, որ մերձեցման քայլերու նպատակը չի սահմանափակուիր միայն նոյեմբերեան միջանկեալ ընտրութիւններէն առաջ վառելանիւթի գիներու կտրուկ նուազում ապահովելով, այլ կ՛ուղղուի դէպի աւելի հեռահար թիրախներ:

Երկրորդ. այս գործարքէն հիմնովին դժգոհ էր Ուքրանիան, որուն նախագահը այլ անձով փոխարինելու յորդոր փոխանցեց Միացեալ Նահանգներու նախագահը` ընդգծելով, որ ան համաձայնելու եւ գործարք կնքելու ունակութիւն չունեցող նախագահ է: Հիմա, անմիջապէս կը նկատուի այն, որ Ուքրանիոյ վերաբերող հիմնական օրակարգի քննարկումին կամ ենթադրաբար կայանալիք համաձայնութեան Ուքրանիան բացակայ է:

Երրորդ. Չինաստանը ցարդ լուռ է. ո՛չ կը հաստատէ, ո՛չ ալ կը հերքէ նման հանդիպումի մը հաւանականութիւնը: Չինաստանի մասնակցութիւնը սակայն ոչ միայն Ուքրանիոյ գծով կրնայ աւելի վճռական բովանդակութիւն տալ կնքուելիք համաձայնութեան, այլ նաեւ ընդհանրապէս աշխարհաքաղաքական տարողականութիւն տալ համաշխարհային ինչպէս տնտեսական-ուժանիւթային, այնպէս նաեւ ռազմաքաղաքական հիմնական իրադարձութիւններուն: Ի վերջոյ այս եռակողմին մէջ տեսականօրէն խաղը կ՛ընթանայ 2-1 յարաբերակցութեամբ:

Չինաստանն ու Ռուսիան գործընկերներ են, իսկ Չինաստանն ու Միացեալ Նահանգները` տնտեսական սուր մրցակիցներ: Փեքինի լռութիւնը նաեւ զգուշաւորութեան եւ վերապահութեան նշան է, կատարուելիքին կարճաժամկէտ հաւանականութեան նկատառումով:

Չինաստանի նման երկրի մը ներգրաւումը ժամանակաւոր պայմանաւորուածութիւններու հետ կրնայ համատեղելի չըլլալ:

Չորրորդ. առաջադրուող եռակողմը կը շրջանցէ նաեւ Ուքրանիոյ պատերազմին զօրակցական առաջին ճակատի վրայ գտնուող Եւրոպան, որուն յենասիւններէն Ֆրանսան կը դիմակայէ տնտեսական եւ ներքին կայունութեան լրջագոյն խնդիրներ: Ֆրանսան, որ համաեւրոպական հակառուսականութեան յառաջատար դիրքը վերցուցած էր:

Այս բոլոր հանգամանքները նկատի ունենալով հանդերձ պէտք չէ բացարձակօրէն հետեւցնել, որ եռակողմը կը կայանայ, եւ համաձայնութիւնները կը հաստատուին: Հակառակ Թրամփի շրջադարձին, ամերիկեան ընկերութիւնները վերստին հետախուզական տուեալներ տրամադրեցին Քիեւին, յարձակումները շարունակելու Ռուսիոյ տարածքին:

Սակայն եռակողմի եւ անկէ բխելիք համաձայնութիւններու կայացման պարագային, իրավիճակի հիմնական փոփոխութիւններ կը սկսին երեւալ ոչ միայն Ուքրանիոյ պարագային, այլ նաեւ աշխարհագրական տարբեր միջավայրերու մէջ. առաջին հերթին` Իրանի: Հոս եւս պէտք չէ մտահան ընել 2-1 յարաբերակցութիւնը եւ տեսնել Չինաստանի հիմնարար դերը:

Վերադառնանք ամերիկեան եւ ռուսական համաժամանակեայ յայտարարութիւններուն եւ այնտեղ նկատենք երանգային տարբերութիւններ: Ըստ ամերիկեան մամուլին, Ռուսիոյ դաշնութեան նախագահը առաջարկած է իր ամերիկացի եւ չինացի գործընկերներուն հետ յառաջիկայ ամիս եռակողմ հանդիպում ունենալ` քննարկելու համար Ուքրանիոյ հակամարտութիւնը:

Մոսկուան պաշտօնապէս հաստատած էր տեղեկատուութիւնը:

Միացեալ Նահանգներու արտաքին գործոց նախարարը եռակողմի կայացման հաւանականութիւնը պաշտօնապէս չէ հաստատած, սակայն աւելցուցած է, որ ծրագիրները այդ ուղղութեամբ տակաւին վերջնական տեսքի չեն բերուած: Ան նոյնիսկ հաստատած է. «Չեմ գիտեր, արդեօք հանդիպումը վերջնականապէս հաստատուա՞ծ է»:

Ռուսիան առաջարկած է, Ուաշինկթընը վերջնական չէ հաստատած, Չինաստանը լուռ է:

Թէկուզ այս պատկերը, յամենայն դէպս նախադրեալները կը խօսին համաձայնող բուն կողմերու եւ շրջանցուող կողմերու մասին:

«Ա.»
«Ազդակ»