Հարգելի բարեկամներ,

Բոլորիդ երախտապարտ ենք այն բանի համար, որ դժվարագույն փորձությունների օրերին դուք մեզ հետ եք եղել, երբ թվում էր, թե Արցախը դատապարտված է։ Երախտապարտ ենք նրա համար, որ աջակցել եք արցախահայության՝ ազատության և արդարության հանդեպ ձգտմանը, նրա համար, որ նպաստում եք Արցախի միջազգային կապերի զարգացմանը։ Արցախի ճակատագրում ունեցած ձեր ավանդը անգնահատելի է։ Եվ այսօր, զարգացնելով համագործակցությունը, մենք տարածաշրջանում ապագա խաղաղության հիմքերն ենք դնում։ Ես անկեղծորեն հավատում եմ մեր համագործակցության հեռանկարներին, քանզի նրա հիմքում ընկած է ընդհանուր արժեհամակարգի նկատմամբ հավատարմությունը, որտեղ առանցքային դեր են խաղում ազատության, հավասարության, մարդու իրավունքների իդեալները, ինչպես նաև ձգտումը դեպի արդարություն, խաղաղություն և զարգացում։ Այսօր մենք այստեղ ենք հավաքվել, որպեսզի գնահատենք մեր համագործակցության ներկայիս ընթացքը, մտքեր և նոր գաղափարներ փոխանակենք՝ փոխգործակցության զարգացման ուղիների վերաբերյալ։ Հուսով եմ, որ այսօրվա քննարկումների արդյունքում կստեղծենք մշտապես գործող հարթակ՝ նոր առաջարկների քննարկման և իրագործման համար։

Ամփոփելով կցանկանայի վստահություն հայտնել, որ այսօրվա մեր միջոցառումը միջազգային հանրությանն ուղղված ազդակ կդառնա առ այն, որ Արցախի մեկուսացումն ու նրա քաղաքացիներին միջազգային համագործակցության հնարավորություններից զրկելը անթույլատրելի է։ Մեր խորին համոզմամբ՝ մեկուսացումը պատերազմի շարունակումն է, մինչդեռ համագործակցությունը խաղաղության հիմքն է։ Եվ մեր բոլորիս ընդհանուր խնդիրն է աշխատանք տանել այս հիմքի ամրապնդման ուղղությամբ՝ հանուն ողջ տարածաշրջանի խաղաղ ապագայի։ Շնորհակալություն ուշադրության համար. համաժողովին մաղթում եմ արդյունավետ աշխատանք»: