Լոս Անջելեսի քաղաքային խորհրդի անդամ Փոլ Կրեկորյանը «Ապառաժ»-ի հետ զրույցում ասել է.

«Համաժողովը Արցախի համար դեպի զարգացում տանող առաջընթաց քայլ է։ Այն մեծ արժեւորվում է նաեւ հայկական սփյուռքի համար, որովհետեւ մենք կարողացել ենք ամբողջ աշխարհով մեկ ներկայացնել Արցախը եւ երկրագնդի մարդկությանը հավաքել այստեղ։ Համաժողովը Սփյուռքի համախմբման եւ Արցախի միջազգային ճանաչման գործընթացներում մեծ խթան է հանդիսանում։ Մեր կարեւոր քայլերից մեկը Արցախի վրա ադրբեջանական պրոպագանդայի կանխարգելումն է։ Անցած ամիս ՀՀ վարչապետ Նիկոլ Փաշինյանին հյուրընկալեցի Լոս Անջելեսի քաղաքային խորհրդարանում, որի համար Ադրբեջանի դեսպանը փորձեց խոչընդոտել հանդիպմանը, համոզելով, որ վարչապետն առանձնապես խոսելու է Արցախի մասին։ Որպես ԱՄՆ-ի ժողովրդի կողմից պաշտոնապես ընտրված խարհրդարանի անդամ՝ ես իմ լծակներն օգտագործեցի եւ դեսպանին ասացի, որ պարոն Փաշինյանը կարող է ազատ խոսել ցանկացած թեմաների շուրջ։ ԱՄՆ- ն մեծ դեր ունի Արցախի միջազգային ճանաչման գործում։ Լոս Անջելեսը լինելով Ամերիկայի ամենամեծ քաղաքներից մեկը՝ ճանաչել է Արցախի ժողովրդի ինքնորոշման իրավունքն ու անկախությունը։ Մենք Շուշիի հետ համագործակցության պայմանագիր ենք կնքել՝ ընդհանուր համագործակցության մակարդակով հաշվի առնելով կյանքի բոլոր ասպեկտները։ Կցանկանայի առանձնացնել ամենագլխավորը՝ Շուշիի երիտասարդներին անվճար կրթություն ստանալու հնարավորություն ընձեռելը»,- ասել է Փոլ Կրեկորյանը: