ՀՅԴ Հայաստանի ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը Գորիսում՝ «Հայաստան» դաշինքի հանրահավաքի ժամանակ, շնորհակալություն հայտնեց Գորիսի, Սյունիքի ժողովրդին պատերազմի օրերին իրենց խիզախության, մասնակցության, իրենց հայրենի հողը պինդ գրկելու և պահելու համար։

Նա նաև շնորհակալություն հայտնեց պատերազմից հետո սյունեցիների այն կեցվածքի համար, որ ցույց տվեցին այս ազգադավ իշխանությանը։

«Մեր երկրում պտտվում է մի ուրվական՝ ամոթի, խայտառակության և պարտության ուրվականը․ հունիսի 20-ին մենք պետք է փակենք այդ ամոթի և խայտառակության էջը և հայ ժողովրդի համար բացենք նոր, հզոր, ուժեղ Հայաստանի էջը»,-ասաց Իշխան Սաղաթելյանը։

Նա նշեց, որ այս օրերին Քաջ Նազարը, որ հայտնվել է ՀՀ իշխանության ղեկին, պտտվում է գյուղերով, քաղաքներով և անընդհատ մի միտք է արտահայտում՝ եթե ժողովուրդը ցանկանա իրեն գնդակահարել, ասում է, որ ինքը պատրաստ է։

«Իհարկե, ինքն արժանի է դրան, բայց կրկին չի հասկանում, որ մենք ջունգլիներում չենք ապրում և մեր երկրում անարխիա չի լինելու, մեր երկրում լինելու է արդարադատություն և ինքը և մնացած բոլոր պատասխանատուները գնդակահարությունով չեն պրծնելու, իրենք պետք է պատասխան տան շուռնուխեցի Արարատին իր տունը կորցնելու համար, պետք է պատասխան տան Արցախի 10 հազար քառ․ կմ կորստի համար, պետք է պատասխան տան Շուշիի և Հադրութի համար, պետք է պատասխան տան մեր 5000 զոհերի համար, հետևաբար, այո՛, մեր երկրում լինելու է արդարադատություն և բոլորը պետք է իրենց արածների համար պատասխան տան, որ մեր երկրում այլևս դավաճանություն չլինի»,-ասաց Իշխան Սաղաթելյանը։

Նա նշեց, որ իերնք այս ընթացքում փորձում են ընտրություններին բովանդակություն տալ՝ խոսում են երկրի զարգացումից, հնչեցնում են կոնկերտ ցուցանիշներ, հստակ ասում են, որ 1 տարվա ընթացքում լուծելու են մեր բանակի վերակազմակերպման հարցը և 3 տարվա ընթացքում բանակի սպառազինության հարցը, ասում են, որ փոխելու են կառավարության կառուցվածքը և վերականգնելու ենք գյուղատնտեսության ու մշակույթի նախարարությունները, ասում են, որ 3 տարում լուծելու ենք ոռոգման խնդիրը, նշում են առողջապահության, կրթության, սոցիալական ոլորտներում ինչ ծրագրեր են անելու, բայց հակառակ կողմը կրկին շարունակում է վայրահաչոցները, լաչառությունը, թե՝ չկա որևէ բովանդակություն։

«Որովհետև ասելիք չունեն, մեր երկիրը բերել, հասցրել են անդունդի եզրին։ Մենք շարունակելու ենք չարձագանքել այդ վայրահաչոցներին և խոսելու ենք Հայաստանից և Հայաստանի ապագայից»,-ասաց Իշխան Սաղաթելյանը։

Նա հավելեց՝ կեցցե՛ Գորիսը, կեցցե՛ Սյունիքը, կեցցե՛ Արցախը, կեցցե՛ հայ ժողովուրդը, դեպի ուժեղ Հայաստան։

Ելույթը՝ տեսանյութում․

https://youtu.be/hctNq2nDlGc