Դուք համարո՞ւմ եք, որ Հայաստանը անվտանգ երկիր է, սահմանները պաշտպանվա՞ծ են, ձեր կյանքը լավացե՞լ է, եկամուտներն աճե՞լ են, ունե՞ք լավ աշխատանք, երկրում կա՞ համերաշխություն, հանգստւթյուն, սեր իրար նկատմամբ: Մենք, ցավոք, բոլոր հարցերի վերաբերյալ ունենք միայն «ոչ»: Ո՞վ է այս ամենի մեղավորը: Ի՞նչ պետք է անենք մենք՝ կառուցելու անվտանգ երկիր: Մենք պետք է հեռացնենք այս իշխանությանը եւ այդ մարդուն․ հայտարարեց դաշինքի առաջնորդ, ՀՀ երկրորդ նախագահ Ռոբերտ Քոչարյանը Երեւանի Նոր Նորք վարչական շրջանի ընտրողների հետ հանդիպմանը։

Նա նշեց, որ ինքը 24 տարի է ապրում է Երեւանում: Նրա խոսքով՝ իրենք աշխատանքով փոխել են քաղաքի տեսակը, փորձել են անել ամեն ինչ՝ ավելի ժամանակակից, ավելի աշխույժ ու շնչող քաղաք ունենալու համար:

«1997-1998 թվականներին քաղաքում եղել է ընդամենը 3 լուսավորված փողոց։ Հիմա մենք վերադառնում ենք քաղաքը նորից շինհրապարակի վերածելու համար, աշխատատեղեր ստեղծելու, ձեր կյանքի որակը բարելավելու համար։ Սա է մեր նպատակը, և դրա համար կա մեկ խոչընդոտ, որին պետք է վռնդել այստեղից»,-ասաց նա։

Քոչարյանը հայտարարեց՝ տարբեր ձևերով փորձում են խանգարել «Հայաստան» դաշինքին, ապա վստահություն հայտնեց՝ չեն կարողանա։

«Բայց նաև գիտեմ, որ բազմաթիվ մարդկանց ազատել են աշխատանքից․ ասում եմ միանշանակ՝ կառավարության ձևավորման հաջորդ օրը բոլորը վերականգնվելու են իրենց աշխատանքներում և կոմպենսացվելու են նրանց կրած կորուստները, որ ունեցել են իրենց քաղաքական հայացքների պատճառով։ Մեր ճակատագիրը մեր ձեռտքերում է։ Դուք եք որոշելու՝ ինչպիսի Հայաստան ունենալ»,-հայտարարեց Ռոբերտ Քոչարյանը։

https://youtu.be/bo_lW-iXlYM