Մի ասացվածք կա՝ ինչքան ասում ես հալվա, դրանից բերանը չի քաղցրանում։ Չես կարող ասել՝ ես ուզում եմ խաղաղություն և ակնկալել, որ դրանից խաղաղություն կհաստատվի։ Այլընտրանքային նախագծեր խմբի նախաձեռնած «ՀՀ քաղաքական և իրավական մարտահրավերները» թեմայով կոնֆերանսին ասաց ՀՅԴ անդամ Արթուր Խաչատրյանը։

«Խաղաղության հասնելու համար պետք է լինես ուժեղ։ Եթե խաղաղություն ես ուզում պետք է պատրաստվես պատերազմի, սակայն պատրաստ լինել պատերազմի, չի նշանակում սկսկել պատերազմ, նշանակում է՝ կանխել պատերազմը և թույլ չտալ, որ քո հակառակորդը քո դեմ պատերազմ սկսի»։

Խաչատրյանի խոսքով, իշխանությունները հասարակությանը ստիպում են հաշտվել պարտության հետ։

«Նա խոսուն բան ասեց․ ասեց ժողովուրդը ինձ տվել է մանդատ Արցախի հարցում խաղաղություն հաստատելու համար, դա ասում է մի մարդ, որը սրանից երեք տարի առաջ ասում էր ես չեմ կարող Արցախի ժողովրդի անունից բանակցել, որովհետև Արցախի ժողովուրդն ինձ իր անունից խոսելու մանդատ չի տվել, իսկ ինքը ինչից վերցրեց՝ նոյեմբերի 9-ի խայտառակ կապիտուլյացիոն հայտարարությունից հետո Արցախի ժողովուրդը իրեն տվել է մանդատ։ Նա պատերազմի ավարտից հետո՝ 8-9 ամիս անց այդպես էլ Արցախ չի գնացել, որովհետև գիտի իրեն ինչպես է ընդունելու արցախցին»։