Իշխանությունն արդեն երեք տարի վախի մթնոլորտ սերմանելը, սեւ ու սպիտակի բաժանելը, հասարակության մի մասին մյուս մասի դեմ հանելը, քաղաքական գորիչներին, կուսակցություններին թիրախավորելը սովորություն է դարձրել: Այս մասին, այսօր՝ հուլիսի 17-ին, դատարանի շենքի մոտ լրագրողների հետ զրույցում նշեց ՀՅԴ անդամ Գեղամ Մանուկյանը՝ անդրադառնալով նրան, որ ոստիկանությունը տասնյակ մարդկանց է բերման է ենթարկել կառավարության շենքի մոտից:

«Այսօր բացառություն չէր, ուղղակի այսօր մի խայտառակ միջադեպ արձանագրվեց, երբ կարմիր բերետավորների մի մեծ խումբ հարձակվել էր Գեղամ Նազարյանի վրա, ուղղակի ցուցադրաբար գետնին էին պառկեցրել, տեսնկարահանել, որ երեւի շեֆին զեկուցեին, որ տեսեք, գետնին ենք պառկեցրել»,-ասաց նա:

Դիտարկմանը, որ եթե երեկ ՀՅԴ-ի երիտասարդները ակցիա էին անում ԵՄ-ի կողմից անտարբերության եւ լռության դեմ, այդ դեպքում ինչո՞ւ նման ակցիաներ չեն կազմակերպվում ՌԴ-ի դեմ, Գեղամ Մանուկյան արձագանքեց. «ՀՅԴ երիտասարդական կազմակերպության անդամ Քրիստինե Վարդանյանը դրան շատ հանգամանալից բացատրություն տվել է: Բնականաբար, կան մարդկանց մի խումբ, որ հակադաշնակցական մոլուցքով է տարված եւ ինչ էլ լինի, պետք է քննադատի: Հիմա իրենց աչքը կարելի է կոխել, որ պատերազմի առաջին, թե երկրորդ օրն էր, որ ՀՅԴ ուսանողական միության անդամները տարբեր երկրների դեսպանտների դեմ, միջազգային կազմակերպությունների դեմ բողոքի գործողություններ էին անում: Իսկ երեկ եւ այսօր ՀՅԴ ուսանողական միությունը երկու մատնանշում էր անում. նախ ուր էին այդ եվրոպացի դիվանագետները պատերազմի ժամանակ, երբ հումանիտար աղետ էր, չթույլատրված զենքեր էին օգտագործում, եւ նաեւ, ինչու էին եվրոպացի դիվանագետներն այդքան մեծախոսությամբ զբաղվում, բայց երբեք ուշադրություն չեն դարձնում Հայաստանում մարդու իրավունքների, քաղաքական ազատությունների ոտնահարման երեւույթներին»:

Գեղամ Մանուկյանը հայտարարեց, որ անատանելի է դառնում այն մթնոլորտը, որը կա Հայաստանում. «Այսօր վարչապետի պաշտոնը զբաղեցնողը բողոքում է, թե Ադրբեջանը պատերազմական տրամադրություններ ունի, խոսում է անվտանգությունից, Երասխում է իրավիճակը լարված, Սյունիքում է վիճակը լարված, ու այսպես գլխատել սյունյաց աշխարհը: Իշխանությունն ամբողջ Հայաստանում պետական հեղաշրջման նոր մի փուլ է սկսել ՏԻՄ ղեկավարների, տարբեր ուսումնական հաստատությունների ղեկավարների, ընտրություններին ոչ իրենց տեսակետն ունեցող մարդկանց, գործիչների դեմ տոտալ արշավի: Նման զանգվածային հարձակումն ուղղակի աննախադեպ է:

Բանը հասել է այնտեղ, որ ԱԳ առաջին տեղակալ նշանակված Արմեն Գրիգորյանը ԱԳՆ-ում առաջին իսկ հանդիպմանը խոսում է ՔՊ-ի նախընտրական ծրագրով առաջ շարժվելու մասին: Վստահ եմ՝ այնտեղ նտած տասնյակ կարգին դիվանագետներ ուղղակի գետինը մտան»:

Նշենք, որ Երևանի առաջին ատյանի դատարանի Շենգավիթի նստավայրում քննվում է Սիսիանի համայնքապետի՝ Արթուր Սարգսյանի կալանքի հարցը։ Արթուր Սարգսյանին մեղադրանք է առաջադրվել՝ ՀՀ քրեական օրենսգրքի 308-րդ հոդվածի 2-րդ մասով և 314-րդ հոդվածի 1-ին մասով՝ պաշտոնեական լիազորությունները չարաշահելու և Պաշտոնեական կեղծիք կատարելու համար։

Դատարանի դիմաց հավաքվել են հասարակական, քաղաքական գործիչներ՝ իրեն աջակցությունը հայտնելու Ա. Սարգսյանին։

Սիսիանի համայնքապետ Արթուր Սարգսյանի նկատմամբ 2 ամսով կալանավորման միջորդությունը դատարանը՝ դատավոր Մարինե Մելքոնյանի նախագահությամբ, բավարարեց: Այս մասին քիչ առաջ դատարանի մոտ լրագրողներին հայտնեց նրա պաշտպան Էմին Խաչատրյանը:

«Գնացին կլասիկ սխեմայով. ձերբակալությունը ճանաչեցին ոչ իրավաչափ: Առանց որոշմանը ծանոթանալու էլ հասկանում եմ, որ ապօրինի որոշում է կայացվել, որովհետեւ մենք շատ ծանրակշիռ փաստական հանգամանքներ էինք ներկայացրել, որով բացառվում էր մեր պաշտպանյալի կալանավորումը: Հետագայում ավելի մանրամասն ծանոթանալուց հետո կհայտնենք ավելին: Միանշանակ բողոքարկվելու է վերաքննիչ դատարան»,-ասաց նա