Ծերակոյտի բանաձեւին քննարկումին ընթացքին, Մենենտեզ անընդունելի նկատեց հիւսիսային Սուրիա ներխուժելու Թուրքիոյ քայլը, ինչպէս նաեւ ռուսական հակահրթիռային համակարգեր գնելու Անգարայի որոշումը: Ան այս առիթը օգտագործելով դարձեալ յիշեցուց իր պաշտօնակիցներուն, որ պէտք է վաւերացնեն նաեւ թիւ 150 բանաձեւը` ճանչնալու համար Հայոց ցեղասպանութիւնը:

Թրքական Հակազդեցութիւնը

Թուրքիոյ արտաքին գործոց նախարարութիւնը հրապարակեց յայտարարութիւն մը, որուն մէջ կը քննադատէ Ծերակոյտին կողմէ հակաթրքական պատժամիջոցներ նախապատրաստող բանաձեւին որդեգրումը:

Նախարարութիւնը ամերիկեան այս նախաձեռնութիւնը որակեց իբրեւ «անյարգալից վերաբերմունք»` Թուրքիոյ ազգային անվտանգութեան հարցին մէջ ինքնուրոյն որոշումներու նկատմամբ:

«Մենք Միացեալ Նահանգներու Քոնկրեսին կոչ կ՛ուղղենք խելամիտ եւ կառուցողական դիրքորոշում որդեգրելու, որպէսզի չվնասուին մեր հասարակաց նպատակները, որոնք վերջին շաբաթներուն ընթացքին բարձրագոյն մակարդակով հաստատուած են», նշուած է յայտարարութեան մէջ:

Նախարարութիւնը կը նշէ. «Ամերիկեան Քոնկրեսի երկու պալատներուն մէջ վերջին շրջանին տարուող ջանքերը ներքին քաղաքական հաշիւներու ծիրին մէջ են, եւ անոնց կ՛աջակցին Թուրքիոյ դէմ եղող շրջանակներ»:

Թուրքիոյ նախագահութեան բանբեր Իպրահիմ Քալըն յայտնեց, որ Ծերակոյտի արտաքին յարաբերութիւններու յանձնախումբին կողմէ նշեալ բանաձեւի որդեգրումը «որեւէ ազդեցութիւն պիտի չունենայ «Էս-400» համակարգերու օգտագործման վրայ»` աւելցնելով. «Բանաձեւին` յանձնախումբէն Ծերակոյտի լիագումար նիստին փոխանցուիլը եւ Ծերակոյտին կողմէ որդեգրուիլը բացառուած չէ»:

«Էֆ-35» հալածիչներու ծրագիրը այլեւս թեքնիք հարց չէ, այլ` Միացեալ Նահանգներու ներքին քաղաքականութեան գործիքի վերածուած է», նշեց Քալըն:

aztagdaily.com