Ապրիլի 29-ին եռօրյա այցով Արցախում էր ՀՅԴ Բյուրոյի ներկայացուցիչ Հակոբ Տեր-Խաչատուրյանը:

Այցի ընթացքում հանդիպումներ են կայացել ՀՅԴ Արցախի ԿԿ, ԱՀ ԱԳ նախարարի, ՀՅԴ անդամների, երիտասարդների հետ: «Ապառաժ»-ի հետ զրույցում ՀՅԴ Բյուրոյի ներկայացուցիչը նշել է, որ իր նախորդ այցի հետ համեմատ բնակչության տրամադրության փոփոխություն է նկատում:

«Ես Արցախում եղել եմ նաև դեկտեմբերին: Այն ժամանակ բոլորն ավելի ընկճված վիճակում էին: Այս անգամ տարբերությունը զգալի է հատկապես Ստեփանակերտում. եռուզեռ կա, մարդկանց վերադարձը նկատելի է: Տա Աստված, որ այդ վերադարձը մշտական բնակության նպատակով լինի և արտագաղթը կասեցվի: Անցյալ անգամ հուսահատություն էի տեսել, հիմա վճռականություն եմ նկատում: Մենք էլ փորձում ենք միջոցներ գտնել, որպեսզի ժողովրդին դուրս բերենք այդ վիճակից և կրկին նրանց մեջ արմատավորենք վճռականությունը և հարատև պայքարի համոզմունքը»,- ասել է Հ.Տեր-Խաչատուրյանը:

Ըստ նրա՝ Դաշնակցության կառույցները, ՀՅԴ Հայ Դատի գրասենյակները նախորդ ամիսների ընթացքում աշխատանքներ են ծավալել, որպեսզի համաշխարհային հանրությունը տեսնի, թե ինչպիսին է Թուրքիայի, Ադրբեջանի հարձակողական դիմագիծը և ամուր կանգնի Արցախի կողքին:

Ստեփանակերտում ՀՅԴ Բյուրոյի նախաձեռնությամբ Հակոբ Տեր-Խաչատուրյանը հանդիպել է Արկադի Ղուկասյանի, Բակո Սահակյանի և Արայիկ Հարությունյանի հետ:

Ապրիլի 30-ին Արցախի արտաքին գործերի նախարար Դավիթ Բաբայանի հետ հանդիպման ժամանակ հիմնականում քննարկվել է արտաքին ուժերի հետ աշխատանքների համադրման հարցը:

Նույն օրը Հակոբ Տեր-Խաչատուրյանն ու Դավիթ Իշխանյանը հանդիպել են Արցախի խորհրդարանական մյուս ընդդիմադիր ուժերի ղեկավարների՝ «Արցախի Ժողովրդավարական Կուսակցության» նախագահ Աշոտ Ղուլյանի և «Արդարություն» կուսակցության համանախագահ Հակոբ Հակոբյանի հետ։ Հանդիպմանը մասնակցել է նաև Արցախի Անվտանգության խորհրդի քարտուղար Վիտալի Բալասանյանը:

Ապրիլի 30-ին՝ Արցախ կատարած այցի վերջին օրը, ՀՅԴ Բյուրոյի ներկայացուցիչը մասնակցել է նաև Ստեփանակերտում ՀՅԴ պատանեկան ճամբարի փակման արարողությանը:

«Պատանիներից յուրաքանչյուրի հայացքի մեջ տեսնում եմ վճռականություն, ապագայի նկատմամբ հավատ և իրենց պատրաստակամությունն ամեն գնով աշխատելու, որ Արցախը մնա կանգուն և իրականանա Արցախի ամբողջականության վերականգնումը»,- նշել է Հակոբ Տեր-Խաչատուրյանը:

Արցախ կատարած այցն ուներ նաև ներքին կազմակերպական ուղղվածություն. կայացել է հանդիպում Արցախի կուսակցական շրջանակների հետ:

Ավարտելով հանդիպումները՝ Հակոբ Տեր-Խաչատուրյանը ՀՅԴ Արցախի Կենտրոնական Կոմիտեի անդամների հետ ամփոփել է այցի արդյունքներն ու նոր մարտահրավերներին դիմակայելուն միտված անելիքները։