Հայ դատի օրակարգերը շատ են, թեև վերջին զարգացումների բերումով առաջնային տեղ է գրավում Արցախի հարցը, նաև Հայաստանի սահմանամերձ շրջանների անվտանգության հարցը, և այդ պատճառով էլ այս պահին Գորիսում ենք գտնվում՝ Սյունիքում Yerkir.am-ի հետ հարցազրույցում ասաց ՀՅԴ Լիբանանի Հայ դատի մարմնի ատենապետ Վահրամ Էմիյանը, ով մասնակցում էր ՀՅԴ Հայ դատի հանձնախմբերի և գրասենյակների 5-օրյա խորհրդաժողովին Երևանում, Գորիսում ու Ստեփանակերտում։

«Պատահական չէ այս ընտրությունը և այցը Ստեփանակերտ, որպեսզի տեղի ժողովուրդը իրեն մենակ չզգա և տեսնի, որ աշխարհով տարածված կազմակերպություն կա, որն աշխատում է ինչ-որ բան դրական փոխելու, աշխատում է հանուն իրենց անվտանգության, բարօրության»,-ասաց նա։

Վահրամ Էմիյանը նշեց, որ խորհրդաժողովի օրակարգային հարցերը բազմապիսի են՝ քննարկումների ժամանակ տեղեկություններ են փոխանցվում, որոնք մեծապես օգնում են՝ գտնելու այն մարտավարությունները, լավագույն ձևերը, որ ավելի արդյունավետ դառնա պայքարը, և օգտակար լինի տեղի ժողովրդի համար։

Հայ-թուրքական բարեկամության որևէ հնարավորություն Լիբանանի Հայ դատի մարմնի ատենապետը չի տեսնում։

«Թուրքիան իր բնույթով հայ ժողովրդի թշնամի է, իր էությամբ, պետություն է, որ ստեղծվել է Ցեղասպանության ժխտման վրա, այսպիսի պետությունը, բնականաբար, չի կարող որևէ բարիք բերել մեր ժողովրդին»,-վստահ է Վահրամ Էմիյանը։

Լիբանանն էլ, անշուշտ, թուրքական իշխանության այդ չակերտյալ «բարիքները» վայելել է, ասաց նա, սով է եղել երկրում, մասնավորաբար, քրիստոնեական շրջաններում, բազմաթիվ զոհեր են ունեցել այդ սովի պատճառով, այնպես որ նրանք լավ գիտեն ինչ է նշանակում Թուրքիա։

Թուրքական պետությունը պատեհապաշտ է, փաստեց Վահրամ Էմիյանը, և ջանում է այս իրավիճակներում կարելի եղածին չափ իր շահն ապահովել և միջամտել ներքին հարցերին։

Աննա Բալյան

Ամբողջական հարցազրույցը՝ տեսանյութով․

https://youtu.be/H-a1lZ3GGw0