Վերջերս Ամերիկայի Հայ դատի վաշինգտոնյան գրասենյակը տեղեկացրեց, որ ԱՄՆ նախագահ Ջո Բայդենը կիսով չափ կրճատել է ավելի վաղ իր ստորագրած $45 միլիոն դոլարի օգնությունը Հայաստանին և չեղարկել է Արցախին ականազերծման համար տրամադրվելիք $2 միլիոնը: Կատարվածի մասին պարզաբանումներ ստանալու նպատակով lragir.am-ը զրուցել է ԱՄՆ Հայ դատի հանձնախմբի մամուլի քարտուղար Էլիզաբեթ Չուլջյանի հետ:

-Էլիզաբեթ, Հայաստանում այս լուրը, մանավանդ այս օրերին տիրող լարված մթնոլորտում, անհանգստություն պատճառեց: Ինչո՞վ է պայմանավորված ԱՄՆ նախագահի այս դիրքորոշումը:

-Երկու շաբաթ առաջ ԱՄՆ Կոնգրեսը Հայաստանին $45 միլիոնի, Արցախին՝ $2 միլիոնի ֆինանսական օգնության առաջարկ էր ներկայացրել, ինչը ստորագրեց Ջո Բայդենը: Այդուհանդերձ, օրերս նա որոշում կայացրեց չավելացնել Հայաստանին տրվող օգնությունը և հատկացնել այնքան, որքան նախորդ տարվա բյուջեով էր սահմանված՝ այն է՝ $24 միլիոն դոլար: Իսկ Արցախի օգնությունն ամբողջությամբ չեղարկեց: Մեզ համար սա անընդունելի է, քանզի Արցախը և Հայաստանը մինչ օրս շարունակական ագրեսիայի են ենթարկվում Ադրբեջանի կողմից և Հայաստանը, նամանավանդ՝ Արցախը, արժանի են ավելի մեծ չափով ֆինանսական օգնության:

-Կարծիք կա, որ այս քայլը կարող է Ուկրաինայի դեմ պատերազմում Հայաստանի, ԱՄՆ Հայ դատի և հայկական այլ կազմակերպությունների դրսևորած չեզոքության, Դոնբասին և Լուգանսկին Արցախի սատարման և նրանց հումանիտար օգնություն ուղարկելու փաստի հետևանքը լինել:

-Ոչ, դա այդպես չէ: Բայդենի այս որոշումը կապ չունի Ուկրաինայում տեղի ունեցող պատերազմի մասին Հայաստանի կամ Ամերիկայի հայկական կազմակերպությունների դիրքորոշման հետ: Ամերիկայի Հայ դատի հանձնախմբերը Հայաստանին և Արցախին վերաբերող խնդիրներից զատ, երբեք հանդես չեն եկել այլ երկրների կոնֆլիկտների մասին դիրքորոշմամբ: Նույն մոտեցումն ունենք նաև ներքին խնդիրների հարցում:

-Ի՞նչ եք կարծում, Հայաստանին առաջարկած ԱՄՆ ֆինանսական օգնության չափը հնարավո՞ր է փոխել, նաև հասնել Արցախին օգնություն տրամադրելու նպատակին:

-Անշուշտ, մեր գործունեության երեսուն տարիների փորձը վկայում է, որ դա հնարավոր է: Հայ դատի հանձնախումբը հաճախ է Կոնգրեսում իր ծավալած լոբբիստական աշխատանքի շնորհիվ փոխել ԱՄՆ նախագահի առաջարկած օգնության չափն ի օգուտ Հայաստանի: Մեր գերնպատակներից մեկն այսօր 2020-ի պատերազմից տուժած Արցախին ամերիկյան օգնություն տրամադրելու խնդիրն է: Մեր ջանքերը պետք է կենտրոնացնենք հաջորդ տարի ԱՄՆ բյուջեով Հայաստանի օգնության ավելացման և հումանիտար ծանր իրավիճակում ապրող Արցախին ֆինանսական աջակցություն տրամադրելու պայքարի վրա:

-Ադրբեջանին ռազմական օգնություն տալու 907 բանաձևի կասեցումն այդպես էլ տեղի չի ունենում, չնայած այն բանին, որ իր նախընտրական պայքարի ընթացքում Բայդենը կոչ արեց Թրամփին 907-ը ուժի մեջ թողնել: Ի՞նչ նորություն կա այս առումով:

-Առաջիկա 25 օրերի ընթացքում նախագահն այդ մասին որոշում կկայացնի: Ինչպես գիտեք, սկսած 2001թ.-ից, ամերիկյան բոլոր նախագահները որոշում են կայացրել շրջանցել «Ազատության աջակցության ակտի» Ադրբեջանի դեմ կիրառվող 907-րդ բանաձևը: Այս որոշումն այժմ նախագահ Բայդենի ձեռքում է: Եթե նա որոշի 907 բանաձևը ուժի մեջ թողնել, դա կլինի ողջունելի քայլ: Եթե ոչ, ապա մենք շարունակելու ենք ճնշում գործադրել Կոնգրեսում այդ որոշման դեմ, փաստարկելով մեր պահանջը Արցախի դեմ Ադրբեջանի և Թուրքիայի սանձազերծած պատերազմի, Հայաստանի սահմանների նկատմամբ Ադրբեջանի ագրեսիայի հանգամանքով: Մենք պետք է հասնենք նրան, որ ավտորիտար, կոռումպացված, նավթով հարուստ Ալիևի ռեժիմին տրամադրվի $0 ամերիկյան օգնություն:

Սառա Գասպարյան, Նյու Յորք