Այսօր, ապրիլի 5-ին Ազատության հրապարակում տեղի ունեցավ «Պաշտպանելով Արցախը՝ պաշտպանենք Հայաստանը» խորագրով՝ «Հայաստան» եւ «Պատիվ ունեմ» խմբակցությունների նախաձեռնած բազմամարդ հանրահավաքը։

Հանրահավաքին միացել էին մի շարք քաղաքական ուժեր, ընդդիմադիր հասարակական գործիչներ։ Հանրահավաքի նախաձեռնողները քաղաքացիներին կոչ էին անում կանգնել Արցախի եւ Հայաստանի պաշտպանության դիրքերում։

ՀՅԴ անդամները Մատենադարանի հարակից հրապարակից երթով շարժվեցին դեպի Ազատության հրապարակ։

Հանրահավաքի մասնակիցների ձեռքին կային պաստառներ. «Արցախը երբեք չի լինելու Ադրբեջանի կազմում», «Թուրքն իմ թշնամին է», «Հայաստանը թուրքական միջանցք չէ», «Նիկոլը չի ներկայացնում հայկական շահը», «Recognize Artsakh»:

Նրանք վանկարկում էին «Հայաստա՛ն, ոտքի», «Առանց Նիկոլ Հայաստան», «Արցախը չի լինելու Ադրբեջանի կազմում»։

Մեր հայրենիքը Վտանգի տակ է․ հայտարարեց ՀՅԴ անդամ Սևակ Նազարյանը եւ հավելեց, որ այս գործընթացը չի դադարելու, քանի դեռ այս իշխանությունները շարունակում են իրենց զիջողական քաղաքականությունը և մենք՝ բոլորս, այս հարցը չենք լուծել այստեղ՝ Երևանում։

«Հայաստան ոտքի», «Արցախ ոտքի» , «Հայազգ ոտքի» վանկարկում էին քաղաքացիները։

Այսուհետ հանդուրժելու տեղ չունենք, չենք հանդուրժելու ո՛չ մեր երկրի բզկտմանը, ո՛չ էլ բզկտողներին․ իր ելույթում ասաց «Հայաստան» խմբակցության պատգամավոր Վահե Հակոբյանը։

Պատգամավորը նշեց, որ գրեթե մեկ տարի է, ինչ Ադրբեջանը գտնվում է Հայաստանի սուվերեն տարածքում, և որևէ մեկն այսօր այս երկրում չի կարող երաշխիք տալ, որ իրենց մտքով չի անցնի ավելի խորանալ կամ այլ տեղերից մտնել Հայաստանի սուվերեն տարածք՝ չհանդիպելով որևէ դիմադրության։

Ելույթներով հանդես եկան ԱԺ պատգամավորներ Արամ Վարդեւանյանը, Տիգրան Աբրահամյանը, Հայկ Մամիջանյանը։

Ազատության հրապարակում խորհրդարանական ընդդիմության հրավիրած հանրահավաքը եզրափակիչ բանաձև ընդունեց, որն ընթերցեց ԱԺ «Պատիվ ունեմ» խմբակցության պատգամավոր Աննա Մկրտչյանը։

Այսօր այս հրապարակից հայտարարում ենք նոր պայքարի սկիզբը. իր ելույթում ասաց ՀՅԴ Հայաստանի ԳՄ ներկայացուցիչ «Հայաստան» խմբակցության պատգամավոր, ԱԺ փոխխոսնակ Իշխան Սաղաթելյանը։

«Ինչ պետք է անել․ սա ձեր բոլորի գլխավոր հարցադրումն է։ Հրապարակում հիմա կան բազմաթիվ մարդիկ, օնլայն հարթակում, հեռուստացույցով հետևում են հազարավոր քաղաքացիներ։ Պետք է ամեն ինչ անենք, որ այդ քաղաքացիներին բերենք փողոց, պարզ ձևակերպեմ՝ բոլոր նրանք, ում համար թանկ է մեր հայրենիքը, պետք է իջնեն փողոց և միանան այդ պայքարին։ Պայքարը ավարտին հասցնելու ենք այն օրը, երբ բոլորը միանան մեզ և այդ օրը հեռու չէ։ Ասում եք՝ ծրագիր ունե՞ք, ասում եմ՝ այս, կարո՞ղ ենք երկիրը այս վիճակից դուրս բերել, ասում եմ՝ այո»։

Իշխան Սաղաթելյանը նշեց, որ հանրահավաքը պայքարի մեկնարկն է և այն շարունակական է լինելու։

Վերջում նա հայտարարեց, որ հանրահավաքը ավատելու են հետևյալ կերպ․ «Հիմա միասին դուրս ենք գալիս Ֆրանսիայի հրապարակ և փակում են հրապարակի չորս մուտքերը, դադարեցնելու ենք երթեկությունը, դա կտևի մեկ ժամ։ ֆրանսիայի հրապարակի մեջտեղում կզետեղենք Արցախի դրոշը, սա կլինի մեր առաջին նախազգուշական քայլը։ Սա մեր պայքարի սկիզբն է, մենք պայքարում ենք հանուն Արցախի դրոշի, հանուն եռագույնի, հանուն միասնության և վաղվա հաղթանակի»։

Հանրհավաքի մասնակիցներն ուղղվեցին դեպի Ֆրանսիայի հրապարակ, որտեղ տեղադրվեց Արցախի Հանրապտության մեծ դրոշը։

Կարճ ելույթով հանդես եկավ Իշխան Սաղաթելյանը, որն ասաց, որ չորս տարի առաջ այս օրերին այս հրապարակից սկսվեց Հայաստանի պետականության կործանման ընթացքը։

Նա հավաքվածներին առաջարկեց, որ վաղվանից Հայաստանի բոլոր քաղաքների հրապարկներում բարձրացվի Արցախի դրոշը։

«Սա սկիզբն է մեր պայքարի, և այն լինելու է շարունակական։ Այս պայքարը կանգ չի առնելու մինչև իր վերջնական հաղթանակ»,– հայտարարեց Իշխան Սաղաթելյանը նշելով, որ այսօրվա ակցիան սրանով ավարտվում է, իսկ պայքարը՝ ոչ։

https://youtu.be/_CzIc3tcYTo

https://youtu.be/jfzWRXlxK3M