Այսօր՝ ապրիլի 23-ին, Հայոց ցեղասպանության 107-րդ տարելիցի նախօրեին, Երևանի Հանրապետության հրապարակից մեկնարկեց ՀՅԴ Հայաստանի Երիտասարդական և «Նիկոլ Աղբալյան» ուսանողական միությունների նախաձեռնած ավանդական ջահերով երթը: Ջահերով երթն այս տարի կրում էր «Զարթնի՛ր լաո» խորագիրը։

Հանրապետության հրապարակը բազմամարդ էր։ Պայքարի ջահակիրները երգում էին երթի խորհրդանիշ «Զարթնիր լաո» երգը։

Ջահերով երթին ներկա էին նաև ՀՀ երկրորդ և երրորդ նախագահներ Ռոբերտ Քոչարյանն ու Սերժ Սարգսյանը։

Ելույթ ունեցան ՀՅԴ ԳՄ ներկայացուցիչ Իշխան Սաղաթելյանը եւ ՀՅԴ ՀԵՄ ԿՎ նախագահ Գոռ Սարգսյանը։

Իշխան Սաղաթելյանն հայտարարեց, որ այսօր պետք է ամբողջ աշխարհին ցույց տալ և ապացուցել` մենք տեր ենք Արցախին, մենք տեր ենք մեր պետականությանը և տեր ենք հայ ժողովրդի ապագային, որի համար պատրաստ ենք պայքարել, իսկ ապրիլի 25-ից մենք ամբողջ Հայաստանով կմեկնարկի անդադար բողոքի ակցիաներ, քայլեր և գործողություններ:

Երբ Հայաստանը գտնվում է թրքացման, Արցախը՝ հայաթափման ճանապարհին․ իր ելույթում նշեց ՀՅԴ ՀԵՄ ԿՎ նախագահ Գոռ Սարգսյանը, որպես դաշնակցական երիտասարդ՝ մենք ձեզ առաջարկում ենք պայքար, պայքար հանուն մեր արժանապատվության, պայքար հանուն ուժեղ պետության։

«Զարթնիր լաո» կոչով ջահերով երթի մասնակիցները Հանրապետության հրապարակում այրեցին Թուրքիայի ու Ադրբեջանի դրոշները։

Ապա երթը «Պայքար, պայքար, պայքար» վանկարկումներով շարժվեց Ծիծեռնակաբերդի հուշահամալիր։

Նրանք իրենց հետ տանում էին Հայաստանի, Արցախի եւ այն երկրների դրոշները, որոնք ճանաչել են Հայոց ցեղասպանությունը։

Ծիծեռնակաբերդի հուշահամալիր հասած երթի հազարավոր մասնակիցները մեկ րոպե լռությամբ հարգանքի տուրք մատուցեցին Մեծ Եղեռնի ավելի քան 1,5 միլիոն զոհերի հիշատակին: Անմար կրակի մոտ խոնարհվեցին Հայոց ցեղասպանությունը ճանաչած երկրների դրոշները: Երթի մասնակիցները ծաղիկներ զետեղեցին անմար կրակի շուրջ, տեղի ունեցավ հոգեհանգստյան կարգ:

Այսօրվանից լաոն զարթնում է, այսօրվանից մենք պետք է բացենք նոր արշալույս. ասաց Իշխան Սաղաթելյանը՝ Ջահերով երթի ավարտին Ծիծեռնակաբերդի հուշահամալիրում։

Նա փաստեց, որ հայ մարդն ամբողջ աշխարհին ցույց տվեց, որ ինքը տեր է իր իրավունքներին, ինքը պատրաստ է պայքարելու իր երկրում ապրելու իրավունքի համար, ինքը տեր է Արցախին, ինքը տեր է իր անժամանցելի իրավունքներին։

Սաղաթելյանն ասաց՝ այսօրվանից յուրաքանչյուրն իր սրտում, իր մեջքին կկրի խաչը, որը պատկերված էր 1992 թ-ին Շուշին ազատագրողների թիկունքին, և որն այսօր գծված է ջահակիրների մեջքին, որովհետև սա սրբազան պայքար է։

Նրա կոչով բոլորը երդվեցին․ «Ես Արցախի կողքին եմ»։