Այսօր՝ ապրիլի 29-ին Գյումրիի Շառլ Ազնավուր հրապարակից մեկնարկեց «Դիմադրության» շարժման իրազեկման բազմամարդ երթը։

«Հայաստան» խմբակցության ղեկավար Սեյրան Օհանյանը երթի մեկնարկին հայտարարեց, որ 44-օրյա պատերազմից հետո իշխանությունները երկիրը տանում են դեպի թրքահպատակության:

Նրա խոսքով՝ իշխանությունները բանակցային գործընթացի ձախողմամբ Արցախը և ողջ ժողովրդին տարել են պատերազմի:

«Խելացի լայն ներգրավվածություն ունեցող բանակցային գործընթացը նրանք փոխարինեցին մարտական գործողութուններով և պատերազմով և թույլ տվեցին, որ թուրք-ադրբեջանական զինուժն ահաբեկիչների հետ պատերազմ սկսեն Արցախի դեմ, և նույնիսկ դուրս գան ՀՀ սահմաններ»,-ասաց Սեյրան Օհանյանը և շարունակեց. «Պարտության արշավն այս իշխանությունների օրոք շարունակվում է, քանի որ նրանք ոչ մի եզրակացություն չարեցին պատերազմից»:

Սեյրան Օհանյանը նկատեց, որ գործող իշխանությունները, գտնվելով ճնշումների ներքո, երկիրը տանում են կեղծ «խաղաղության դարաշրջան»:

Այս պայքարը չի ճանաչում որևէ կուսակցական պատկանելություն, խմբային պատկանելություն, այս պայքարն ունի մեկ նշանաբան՝ հանուն հայի, հանուն Հայաստանի, հանուն Արցախի, հանուն հայ ժողովրդի․ իր ելույթում հայտարարեց ասաց ՀՅԴ ԳՄ անդամ Արծվիկ Մինասյանը։

«Այս պայքարի նպատակն է հանել այն ատելությունը, որ այս իշխանությունը 4 տարում սերմանեց մեր մեջ, հանենք այն զզվանքը, որ այս իշխանությունը փոխանցեց հայ մարդուն, հանենք այն պարտության ոգին, որ այս իշխանությունը դրեց մեր մեջ, որովհետև հայ ժողովուրդը չի պարտվել, Հայաստանը չի պարտվել և մենք ձեզ հետ միասին պետք է ունենանք ուժեղ Հայաստան, և մենք ձեզ հետ միասին «ո՛չ» ենք ասում անամոթ կառավարությանը»,-ասաց Արծվիկ Մինասյանը։

«Պայքար, «Պայքար», «Պայքար» վանկարկեցին երթի մասնակիցները։

Երթի մասնակիցները շարժվեցին դեպի Գյումրու հրապարակ, որին հարակից եկեղեցում տեղի ունեցավ մոմավառություն:

https://youtu.be/XcwV1Z-HOoo