«Դիմադրություն» շարժման մասնակիցներն այսօր, մայիսի 25-ի վաղ առավոտյան հավաքվել էին Ֆրանսիայի հրապարակում, որտեղից մեկնարկեց երթ Երեւանի փողոցներով: Այս անգամ երթի կանգառը Բաղրամյան 26-ն էր՝ ՀՀ նախագահի նստավայրը։

Նախագահականի շենքի մոտ «Դիմադրություն» շարժման մասնակիցները ՀՅԴ ԳՄ ներակայացուցիչ Իշխան Սաղաթելյանի հրահանգով շրջափակեցին շենքը։

Փակում ենք այդ շենքի բոլոր մուտքերը, քանի որ երկրում պրոցեսներ են տեղի ունենում, բայց այդտեղ նստած անձը ոչ թե ՀՀ նախագահ է, այլ ընդամենը ՔՊ ներկայացուցիչ․ հայտարարեց նա։

Շարժման մասնակիցների նպատակն էր թույլ չտալ, որպեսզի աշխատակիցները մտնեն նախագահականի շենք։

«Հայաստան» խմբակցության պատգամավոր Գեղամ Մանուկյանը հայտարարեց, որ շարժումն ամեն օր պատրաստվում է պետական տարբեր կառույցների շենքեր շրջափակել։

Նա նշեց, որ այդ շենք՝ ՀՀ նախագահի նստավայր օրերով կարող է որևէ աշխատակից չմտնել, որովհետև այդ մարդիկ չեն կատարում Սահմանադրությամբ իրենց վերապահված գործառույթները։

Իրավիճակը լարվեց, ցուցարարների եւ ոստիկանության աշխատակիցների միջեւ հրմշտոց սկսվեց: Բերվեցին ոստիկանական լրացուցիչ ուժեր։

Ոստիկանները փորձեցին հեռացնել ցուցարարներին դարպասների մոտից։

Իշխան Սաղաթելյանը կոչով դիմեց շարժման մասնակիցներին․ «Ամեն ինչ նորմալ է, գիծը պահեք, ամեն ինչ մեր ուզածով է, ոչ ոք չի շարժվում: Շենքը շրջափակված է, մենք մեր աշխատանքն ենք անում»:

Նա տեղեկացրեց, որ ՀՀ նախագահի նստավայրից բացի շրջափակված է նաև ՀՀ անվտանգության խորհրդի շենքը․ «ՀՀ անվտանգության խորհրդի շենքը նույնպես շրջափակված է, որովհետև դա մյուս պետական հաստատությունն է, որը որևէ կերպ առնչություն չունի ՀՀ և հայության շահերի հետ»-, ասաց նա։

Նա վստահեցրեց, որ մուտքերը փակելուց հետո որևէ աշխատակից ներս չի մտել և ոչ մեկը դուրս չի եկել։ Այս տարածքում է գտնվում նաև Համահայկական հիմնադրամը, նրանք ևս չեն կարողացել շենք մտնել։

Իշխան Սաղաթելյանը առաջարկեց, որպեսզի պատգամավորները բարձրանան ԱԽ շենք, եւ անձամբ փոխանցեն ժողովրդի պահանջը այդ դավաճաններին»։ Սակայն պարզվել է, ներսում մարդ չի եղել․ «Աշխատանքի չեն կարողացել գալ, այդ պատճառով էլ ձեզ ընդունող անձ չկա»,- ցուցարարներին հայտնել են ոստիկանները։

10 րոպեից դադարեցնում ենք շրջափակումը և շարունակում մեր երթը.«Քանի որ այս շենքերում անտերություն է՝ այլևս անիմաստ է շրջափակման մեջ պահել, ես կոչ եմ անում մեր հայրենակիցներին, ովքեր այս պահին գտնվում ենք ՀՀ անվտանգության խորհրդի շենքի դիմաց և ՀՀ նախագահական նստավայրի մյուս մուտքերում, դադարեցնել շրջափակումը, միանալ մեզ»,-հայտարարեց Իշխան Սաղաթելյանը։

«Դիմադրություն» շարժման երթը կանգ առավ կառավարական ամառանոցների մոտ. «Հայաստանում պետական իշխանություն չկա, կա ժողովրդի իշխանություն և ոստիկանություն։ Եկեք ոստիկանությանը ողջունենք և վստահեցնենք, որ Նիկոլի իշխանությունը երկար չեն կարող պահել»,-հայտարարեց Իշխան Սաղաթելյանը։

«Դիմադրություն» շարժման խաղաղ անհնազանդության ակցիաները շարունակվում են․ շարժման մասնակիցները փակել են Պարոնյան-Մաշտոց փողոցների խաչմերուկը։

Ոստիկանները կոչ են արել դուրս գալ երթեւեկելի հատվածից, ենթարկվել ոստիկանների օրինական պահանջներին, սակայն ցուցարարները նստել են փողոցի մեջտեղում:

«Հոգնել չկա, պայքարելու ենք մինչև վերջ։ Մեզ ո՛չ արևն է խանգարում, ոչ՝ անձրևը, գնալու ենք մինչև վերջ։ Մեր տրամադրությունը մարտական է»,- ասել են «Դիմադրություն» շարժման մասնակից երիտասարդները։

Շուրջ 30 րոպե խաչմերուկը շրջափակման մեջ պահելուց հետո երթի մասնակիցները շարժվել են դեպի Ֆրանսիայի հրապարակ:

Նշենք, որ «Դիմադրություն» շարժման հանրահավաքը այսօր երեկոյան կմեկնարկի Գարեգին Նժդեհ հրապարակից՝ ժամը 19։00-ին, իսկ մինչ այդ, 16։00-ին Ֆրանսիայի հրապարակում տեղի կունենա միջոցառում՝ «Հայաստան» եւ «Պատիվ ունեմ» խմբակցությունների մասնակցությամբ։

https://youtu.be/D9uPvVSg7j8