Այսօր, մայիսի 28-ին Սարդարապատից և Բաշ Ապարանից մեկնարկել է «Դիմադրություն շարժման ավտոերթերը։

Շարժման մասնակիցները այսօր, մայիսի 28-ին Բաշ Ապարանում ծաղիկներ են խոնարհել եւ հարգանքի տուրք մատուցել զորավար Դրոյի հիշատակին:

Մեկ այլ խումբ էլ այցելել է Սարդարապատի հուշահամալիր: Եւ Ապարանից եւ Սարդարապատից «Դիմադրության» շարժման մասնակիցները ավտոերթով ուղեւորվել են Երևան:

Ժամը 18-ին Ֆրանսիայի հրապարակում տեղի կունենա համապետական հանրահավաք:

ՀՅԴ Հայաստանի ԳՄ անդամ, ԱԺ «Հայաստան» խմբակցության պատգամավոր Արծվիկ Մինասյանը՝ Սարդարապատում լրագրողների հետ զրույցում ասել է․ Քանի այս իշխանությունը կա՝ մենք սահմանին ունենալու ենք լարվածություն, ունենալու ենք նոր զոհեր, նոր կորուստներ։

«Չկա Հայաստանի համար խորհրդանշանակ ու կարևոր մի օր, երբ ադրբեջանական հրոսակախմբերը չիրականացնեն հերթական հանցագործությունը։ Սա այս իշխանության վարած քաղաքականության հետևանքն է և ամենօրյա վարքագիծը։ Քանի այս իշխանությունը կա, Ադրբեջանն իր այս լկտիությունը ավելի է շարունակելու»,- ասաց Մինասյանը։

Նա մաղթեց, որ հաջորդ Մայիսի 28-ը նշենք առանց Նիկոլ Հայաստանում։

ՀՅԴ անդամ, ԱԺ «Հայաստան» խմբակցության պատգամավոր Թադևոս Ավետիսյանը Սարդարապատի հուշահամալիրում հարգանքի տուրք մատուցելուց հետո լրագրողների հետ զրույցում ասաց․ Երբ ասում ենք՝ խաղաղության օրակարգն ու սահմանազատումը պարտադրված է, դա պարբերաբեր երևում է։

«Երբ մի փոքր մթնոլորտը փոխվում է և հայը փորձում է ցույց տալ իր ինքնությունը՝ միանգամից պարտադրանքը երևում է՝ երևում է կրակոցներով, երևում է թուրքի՝ մեր տարածք ներխուժելով, նոր զոհերով, նոր վիրավորներով։ Այլ կերպ ասած՝ ծնկած խնդրելով, աղերսելով, երբեք խաղաղություն մենք չենք ստանա․ սա ուղիղ հայրենազրկման ճանապարհն է և մենք դրան պարբերաբար ականատես ենք լինում»,-ասաց նա։

Հայի հավաքական ուժը պարտադրված է հաղթանակի՝ սա կարևոր է ոչ միայն Սարդարապատի հերոսամարտի օրերի, այլև այսօրվա իմաստով՝ վստահ է Թադևոս Ավետիսյանը։

Ես ակնածանքով եմ այստեղ, շատ հպարտ եմ, որ Հայաստանում տակավին սիրում ու հարգում են իմ պապին․ ասաց Դրաստամատ Կանայանի թոռը՝ Ֆիլիպ Կանայանը, որը «Դիմադրություն» շարժման մասնակիցների հետ ծաղիկներ խոնարհեց Ապարանում՝ Դրոյի գերեզմանին ու մասնակցեց ավտոերթին։

Նրա հետ էր ՀՅԴ անդամ, Արդարության մարտիկ Համբիկ Սասունյանը, որն ասաց․ «Ես շատ հպարտ եմ, որ գտնվում եմ նույն կուսակցության մեջ, որ Դրոն է եղել»։

Ֆիլիպ Կանայանը ԱՄՆ-ում է ապրում՝ Տեքսաս նահանգում․ Սասունյանը վստահեցրեց, որ նա ազգային գործերի նվիրյալ է, փաստաբան։

Նշենք, որ ՀՅԴ Հայաստանի Գերագույն մարմնի անդամ, ազատամարտիկ, Ղարաբաղյան երեք պատերազմների մասնակից Իգոր Սարգսյանին ոստիկանները բերման են ենթարկել Սարդարապատի հուշահամալիրից՝ այն բանի համար, որ համարձակվել է փորձել հարգանքի տուրք մատուցել Սարդարապատի հուշահամալիրում Նիկոլ Փաշինյանի շքախմբից մի քանի քայլ հեռավորությամբ։

Նա իր անհամաձայնությունն է հայտնել Փաշինյանի ապազգային, զիջողական քաղաքականությանը, գոռացել՝ «Նիկոլ, դավաճան», որից հետո նրան բերման են ենթարկել ոստիկանության բաժին։

Ազատամարտիկին 3 ժամ պահել են բաժանմունքում, մինչև վարչապետն անցել է, նոր ազատ են արձակել։ Որից հետո Իգոր Սարգսյանը նորից, ընկերների հետ, բարձրացել է Սարդարապատի բարձունքը և կատարել իր ուխտը։