«Դիմադրություն» շարժման մասնակիցներն այսօր՝ մայիսի 30-ին հերթական անհնազանդության ակցիան են իրականացնում Երեւանում: Նրանք հավաքվել են Ֆրանսիայի հրապարակում, ապա երթ սկսել:

«Փաստաթուղթը հրապարակել ենք․ սա հստակ հնարավորություն է, որ բոլորը իրենց դիրքորոշումը հայտնեն այն հայանպաստ փաստաթղթի և մինիմալ պահանջների մասին, որ այսօր դրված է սեղանին»,- երթի մեկնարկից առաջ հայտարարեց ՀՅԴ Հայաստանի ԳՄ ներկայացուցիչ Իշխան Սաղաթելյանը։

Նա տեղեկացրեց, որ երթով շարժվում են տարբեր նախարարություններ, պետական գերատեսչություններ։ Ընդդիմադիր պատգամավորները հստակ կդնեն խնդիրը՝ կհասկանանք՝ ով է կիսում այս պատասխանատվությունը, ու ով ինչ դիրքորոշում ունի։

Սա նաև լավ հնարավորություն է շատ պաշտոններ զբաղեցնող անձանց՝ տարանջատվելու Նիկոլից և չկրելու այս պատասխանատվությունը․ ասաց նա։

Երթը կանգ առավ Կառավարության 3-րդ մասնաշենքի առջև․ Խորհրդարանական երկու ընդդիմադիր խմբակցության պատգամավորներ կբարձրանան նախարարությունների շենք՝ կհանդիպեն կոնկրետ նախարարներին և կհասկական՝ իրենք կո՞ղմ են, թե՞ դեմ Հայտարարությանը. ասաց Իշխան Սաղաթելյանը:

Կառավարության 3-րդ մասնաշենքի մուտքի մեծ թվով ոստիկաններ շղթա են կազմել եւ փակել մուտքը:

Փոխոստիկանապետ Կամո Ցոցուլյանն ասաց, որ կճշտի նախարարների հետ՝ արդյոք պատրաստ են ընդունել պատգամավորներին, որից հետո թույլ կտան ընդդիմադիր պատգամավորներին մուտք գործել շենք:

Ակցիայի մասնակիցները սկսկեցին վանկարկել «Նիկոլ դավաճան», «Նիկոլ հողատու», «Առանց թուրքի Հայաստան», «Նիկոլ, կանգնիր պատի տակ»։

Ոստիկանների թիվն ավելացավ․ այստեղ եկան բազմաթիվ կարմիրբերետավորներ։ Հրմշտոց սկսեց ակցիայի մասնակիցների ու ոստիկանության աշխատակիցների միջև։ Քիչ անց ոստիկանները հետ քաշվեցին, իրավիճակը հանդարտվեց։

Ոստիկանները խաղաղ ակցիայի մասնակիցներից մի քանիսին բերման ենթարկեցին։ «Դիմադրություն» շարժումը ավարտեց ակցիան Կառավարական 3-րդ մասնաշենքի մոտ։

Ընդդիմադիր պատգամավորներին այդպես էլ թույլ չտվեցին մտնել շենք՝ հանդիպելու նախարարներին։ Իշխան Սաղաթելյանը հայտարարեց․ իրենց տեղեկություններով նախարարները տեղում չեն, այդպիսով նրանք կողմ են, որ Արցախը մնա Ադրբեջանի կազմում։

Սաղաթելյանը ակցիայի մասնակիցներին կոչ արեց երթը շարունակել։

Լրագրողների հետ զրույցում ՀՅԴ Հայաստանի ԳՄ անդամ, ԱԺ «Հայաստան» խմբակցության պատգամավոր Աշոտ Սիմոնյանն ասաց․ ակնհայտ է, որ կառավարության անդամները ևս մեկ անգամ փաստեցին, որ իրենք գերի են այս իշխանության ձեռքում, չունեն համարձակություն սեփական կարծիքը հայտնելու․ «Միգուցե որոշները համարձակություն ունենային հայտնելու այնպիսի կարծիք, որ օրվա իշխանությունների դուրը չգար, դրա համար կանխեցին մեր հանդիպումը»,-հայտարարեց նա։

Շարժման մասնակիցները երթով շարժվեցին Հանրապետության փողոցով: Նրանք քայլերթ կատարեցին Կառավարության շենքի շուրջ եւ կրկին վերադարձան Կառավարության 3-րդ մասնաշենքի մոտ․ իրավիճակն այստեղ կրկին լարվեց, բախումներ սկսվեցին ցուցարարների ու ոստիկանների միջեւ:

Բախումների հետեւանքով պատառոտվեց Իշխան Սաղաթելյանի շապիկը՝ ինքնազգացողությունը վատացավ։

Ոստիկանները բռնի ուժ են կիրառել yerkir.am-ի գլխավոր խմբագիր Վահե Սարգսյանի նկատմամբ․ հարվածներ հասցրել մարմնի տարբեր հատվածներին, պատռել վերնաշապիկն ու փորձել բերման ենթարկել։

Ոստիկանների բիրտ գործողությունների հետևանքով շատ քաղաքացիներ տարբեր աստիճանի մարմնական վնասվածքներ են ստացել․ որոշներին տեղափոխել են հիվանդանոց: Կան բազմաթիվ բերման ենթարկվածներ։

Ոստիկանները բիրտ ուժ են կիրառել նաեւ մի շարք ընդդիմադիր պատգամավորների նկատմամբ։

Նիկոլ Փաշինյանի հրաժարականը պահանջող «Դիմադրություն» շարժման մասնակիցները կառավարության 3-րդ մասնաշենքից երթով վերադարձան Ֆրանսիայի հրապարակ։

«Առաջին օրվանից ասել եմ՝ այս պայքարը պահանջում է համառություն, տոկունություն, զոհաբերություն»,- երթի ընթացքում հայտարարեց Իշխան Սաղաթելյանը։

https://youtu.be/065l50cGjLc