Ֆրանսիայի հրապարակից այսօր, հունիսի 10-ին մեկնարկեց Նիկոլ Փաշինյանի հրաժարականի պահանջով «Դիմադրություն» շարժման երթը։

Այս անգամ երթի կանգառը Բաղրամյան 26-ն էր, որտեղ անցկացվում է ՀԱՊԿ արտգործնախարարների խորհրդի հերթական նիստը:

Նախքան երթը ՀՅԴ անդամ, «Հայաստան» խմբակցության պատգամավոր Գեղամ Մանուկյանը հայտարարեց, որ իրենց ձայնն են բարձրացնում ասելու մեկ բան՝ «Նիկոլն ու իր իշխանությունը չունի որևէ մանդատ, լեգիտիմություն հանդես գալու Հայաստանի անունից, խոսելու արցախահայության անունից, ստորագրելու որևէ փաստաթուղթ։

«Ամեն անգամ մեր ներկայությամբ այդ ուղերձը հղել ենք աշխարհին, հղել ենք տարբեր միջազգային կազմակերպություններին»,- ասաց նա։

«Միություն, Պայքար, Հաղթանակ», «Նիկոլ, դավաճան», «Առանց Նիկոլ Հայաստան» վանկարումներով երթը հասավ Բաղրամյան պողոտա, սակայն չկարողացան հասնել Բաղրամյան 26, քանի որ մեծաթիվ ոստիկաններ մի քանի շարքով փակել էին Բաղրամյան 26 տանող ճանապարհը:

Բաղրամյան պողոտայում ընդդիմադիր պատգամավորները հանդես եկան ելույթներով։

«Ես շարունակում եմ կարծել, որ ՀԱՊԿ-ը Հարավային Կովկասում Հայաստանի համար որպես ռազմաքաղաքական դաշինք այլընտրանք չունի»,- հայտարարեց ԱԺ «Պատիվ ունեմ» խմբակցության պատգամավոր Տիգրան Աբրահամյանը:

Նրա խոսքով, այլ բան է, որ պետք է հասկանալ, թե ինչպես արդյունավետ դարձնել ՀԱՊԿ մեխանիզմները և ինչպես պետք է հայկական շահն արտահայտված լինի կազմակերպության ընդհանուր քաղաքականությունում։

«Այն պետությունները, որոնք կարծում են, որ չեն կարող իրացնել ՀԱՊԿ կանոնադարությամբ սահմանված իրենց առաքելությունը, ովքեր չեն իրականացնում ՀԱՊԿ որոշումները, դրա մասին պետք է անկեղծ խոսել, քանի որ չի կարող սահմանվի մի բան, որը շոշափում է անդամ երկրների շահերը, բայց դրանք չեն իրականացվում»,- ասաց նա։

ԱԺ «Հայաստան» խմբակցության պատգամավոր Արամ Վարդևանյանը իր խոսքում ասաց․ Մենք ունենք հերթական անգամ միջազգային պատվիրակություն ՀՀ-ում և ինչպես պայմանավորվել էինք՝ մենք նման դեպքերում Հայաստանում առկա քաղաքական ճգնաժամը լսելի ենք դարձնելու ցանկացած նման միջոցառման ժամանակ։

«Այսօր ՀԱՊԿ ձևաչափով է քննարկումը։ Սա այն բացառիկ կառույցներից է, որ կարող է անվտանգային սպառնալիքիների ժամանակ ձեռք մեկնի ՀԱՊԿ անդամ երկրներին; ՀԱՊԿ անդամ երկիր էՀՀ-ն։ Բայց ի՞նչ իրավիճակ ունենք՝ արդեն տարուց ավելի է թշնամու զորքերը գտնվում են Սյունիքում։ Հարց է առաջանում օրվա իշխաությունները դիմե՞լ են ՀԱՊԿ-ին»,-ասաց Վարդևանյանը։

Մենք Բաղրամյան պողոտայում հնչեցրեցինք մեր կարեւոր ուղերձը. հիմա թե Բաղրամյան 26-ում ընդունելություն կանի, ընթրիք կտա, մի երկու մեդալ էլ կբաժանի, բայց ցանկացած պատվիրակություն հասկանում է, որ Հայաստանում իրավիճակ է փոխվել. այս մարդկանց հետ չի կարելի երկարատեւ ապագա պլանավորել․ ասաց Գեղամ Մանուկյանը։

«Այս երկրում իրավիճակ է փոխվել, կա քաղաքական ճգնաժամ, այդ ճգնաժամը «Դիմադրության» շարժումը հանգուցալուծելու է»,-հայտարարեց նա:

Երթը վերադարաձավ Ֆրանսիայի հրապարակ։

Նոյեմբերի 9-ի այդ կապիտուլյացիոն հայտարարության մեջ 3 տարվա ժամկետով նախանշվում էր շրջանցող Հայաստանի և Արցախի միջև կապ ապահովող այլ ճանապարհի կառուցում․ Ֆրանսիայի հրապարակում Yerevan.Today-ի հետ զրույցում ասաց Գեղամ Մանուկյանը՝ անդրադառնալով շրջանառվող լուրերին, որ առաջիկայում իշխանությունները պատրաստվում են տալ ոչ միայն Բերձորի ճանապարհը, այլ նաև Բերձոր քաղաքն ու հարակից գյուղերը:

«Այդ առումով մի քանի անգամ խորհրադարանում հատկապես Արթուր Խաչատրյանը պարբերաբար հարցեր է ուղղել ՀՀ կառավարությանը: Դրանց հիմնականում պատասխանել է փոխվարչապետ Մհեր Գրիգորյանը և միշտ լղոզված անորոշ պատասխաններ է տվել: Բայց այդ ընթացքում պարբերաբար Արցախ կատարած այցերի ընթացքում միշտ հետքրքրվել ենք , կային տեղեկություններ, նաև փաստական տվայալներ, որ այլընտրանքային ճանապարհ է կառուցվում, սակայն մինչև հիմա Արցախի իշխանությունների և Հայաստանի իշխանությունների կողմից որևէ հստակ պարզաբանում, թե ինչ երթուղով է կառուցվում ճանապարհը, ինչ նպատակով, ինչ ձևաչաով է լինելու այդ շրջանցիկ ճանապարհը, հստակ պատասխան չի եղել: Արցախի իշխանությունների հետ ոչ պաշտոնական հանդիպումներում նրանք խոսում են տարբերակների մասին, մինչև հիմա հստակ վերջնական պատասխան այդ առումով չկա, և ցավոք սրտի, նման ռազմավարական հարցը ասեկոսեների կամ հասարակության փորձագիտական շրջանակների մակարդակով է»:

Նշենք, որ այսօր երեկոյան Ֆրանսիայի հրապարակում հանրահավաք-երթ նախատեսված չէ։ Ժամը 20-00-ին կլինի քննարկում, որից հետո տեղի կունենա մշակութային ծրագիր։

https://youtu.be/6fKnon2IqyM