Այսօր, հունիսի 11-ին Ֆրանսիայի հրապարակից ընդդեմ քաղաքական բռնաճնշումների բողոքի երթ մեկնարկեց: Այն նախաձեռնել էին երիտասարդները՝ ի աջակցություն պայքարի ընթացքում ձերբակալվածների և կալանավորվածների։

Իշխանությունը բռնաճնշումներով չի կարողանալու կասեցնել պայքարը, այն անպայման հասնելու է իր նպատակին: Այս իշխանությունը Փաշինյանի գլխավորությամբ պետք է հեռանա. ասում էին երթի մասնակիցները:

Երեւանի կենտրոնական փողոցներով երթը շարժվեց դեպի Գլխավոր դատախազություն:

Մասնակիցների ձեռքին կային՝ «Ազատություն քաղբանտարկյալներին», «Բանտը դավաճանների տեղն է» եւ այլ գրություններով պաստառներ։

Նրանք վանկարկում էին «Միություն, Պայքար, Հաղթանակ», «Առանց Նիկոլ Հայաստան». հնչում էին հայրենասիրական երգեր:

Հայաստանում շուրջ 5 տասնյակ քաղաքական բանտարկյալներ կան. Դատախազության շենքի դիմաց հայտարարեց ՀՅԴ անդամ Սևակ Նազարյանը:

«Հայաստանում հարյուրավոր քաղաքական հալածյալներ կան, որոնց վրա բազմաթիվ քրեական գործերով այս իշխանությունը փարձում է լռեցնել, թույլ չտալ, որ քաղաքական տարակարծություն լինի Հայաստանում։ Մենք ասում ենք՝ այս իշխանությունը, որ եկել էր ժողովրդավարության, արդարադատության, հավասարության լոզունգներով՝ շեղվել է իր բոլոր սկզբունքներից և լոզունգներից»,-ասաց նա։

Ակցիայի մասնակիցները ձեռքներին ձեռնաշղթաներ էին հագցրել` ի նշան բողոքի ընդդեմ քաղաքական բռնաճնշումների:

Վերջիններս դրանք թողեցին Դատախազության շենքի մոտ՝ հայտարարելով. «Մենք չենք վախենում ձեռնաշղթաներից, սրանք թողնում ենք, որ տանեք երկրի դեմ դուրս եկած իրական թշնամիներին, իրական հանցագործներին»:

Բողոքի գործողության ավարտին երթը վերադարձավ Ֆրանսիայի հրապարակ:

https://youtu.be/F0mH3DfltK4