Ֆրանսիայի հրապարակում այսօր, հունիսի 14-ին մեկնարկեց «Դիմադրություն» շարժման հանրահավաքը։

Հանրահավաքի մեկնարկին «Հայաստան» խմբակցության պատգամավոր Գեղամ Նազարյանը փոխանցեց շաբաթներ շարունակ վարչախմբի նենգ կամքով Արթիկ ՔԿՀ-ում գտնվող շարժման անդամների՝ Գոռ Սարգսյանի, Արսեն Մարտոյանի, Տարոն Մանուկյանի, Գևորգ Մուրադյանի ուղերձը.

«Տղերքը ձեզ փոխանցում են, որ բանտի պատերը իրենց կամքը չեն կարող կոտրել, քանի որ նրանք իրականում եղել են շատ ավելի բարդ տեղերում։ Տղերքը փոխանցում են, որ իրենց հավատն ու կամքը անսասան է ու իրենք հավատում են, որ ի վերջո Հայաստանը լինելու է արժանապատիվ ու ուժեղ։ Տղերքը բանտից խնդրում են, որ լինեք այստեղ էլ ավելի պինդ ու միասնական։ Տղերքը իրենց ընկերներին ու հարազատներին խնդրում են իրենց փոխարեն լինել հրապարակներում, մասնակցել հանրահավաքներին ու տարբեր միջոցառումներին»,- ասաց Նազարյանը։

Այնուհետեւ ելույթներ ունեցան ՀՅԴ Երիտասարդական միության անդամ Գառնի Պետրոսյանը, ՀՀ արտակարգ և լիազոր դեսպան, ՀՀ ԱԳՆ նախկին գլխավոր քարտուղար Վահագն Մելիքյանը, «Պատիվ ունեմ» խմբակցության պատգամավոր Հայկ Մամիջանյանը:

Ցուցադրվեց տեսահոլովակ՝ շուրջ երկամսյա սպայքարի մասին։

Բեմահարթակ բարձրացավ ՀՅԴ ԳՄ ներկայացուցիչ Իշխան Սաղաթելյանը:

«Այստեղ ենք՝ շատ կարևոր հարցերի պատասխանելու, միասին որոշում ընդունելու, առաջ գնալու համար։ Այդ որոշումները պետք է ապահովեն մեր շարժման հետագա ընթացքը, զարգացումը, նպատակների վերջնական իրագործումը։ Նպատակը նույնն է՝ կանխել Արցախի հայաթափումը և Հայաստանի թրքացումը, չեզոքացնել Հայաստանի ինքնիշխանությանը սպառնացող վտանգները, իսկ դրան հասնելու համար պետք է հեռացնել այս չարիքի իշխանությանը, ձևավորել ազգային իշխանություն, որը կկասեցնի պետականության կործանման այս ընթացքը, կապահովի երկրի սահմանների անձեռնմխելիությունը, տարածքային ամբողջականությունը, կհաստատի արժանապատիվ խաղաղություն, պետականությունը կվերադարձնի ժողովրդին, Հայաստանը կդարձնի արժանապատիվ և բարեկեցիկ երկիր։

Ուստի այս շարժման նպատակը և առաքելությունը սրբազան են, ու քանի դեռ վերը նշված հարցերը չեն լուծվել, այս շարժումը դադար չունի»,-իր ելույթում ասաց Իշխան Սաղաթելյանը։

«Ընդդիմությունը վաղվանից հավաքում է Ֆրանսիայի հրապարակի վրանները»,- ասաց նա:

Ֆրանսիայի հրապարակն այլևս Դիմադրության շարժմանն է պատկանում՝ անկախ նրանից՝ այստեղ վրաններ կլինեն, թե ոչ։ Մեր ժողովուրդն արդեն նվաճել է Հայաստանի և ՀՀ մայրաքաղաքի բազմաթիվ հրապարակներ։ Մենք ցույց ենք տվել, որ մեզ համար փակ փողոցներ գոյություն չունեն»,- ասաց Իշխան Սաղաթելյանը։

Շարժման անելիքները պետք է բխեն առաջադրված խնդիրներից։ Պետք է պայմաններ ստեղծել, որպեսզի կանխենք կապիտուլյացիոն նոր պայմանագրի ընդունումը

Հասնել Նիկոլի հեռացմանը՝ հրաժարականի կամ պաշտոնանկության միջոցով։ Պայքարն այս երկու ուղղություններով պետք է լինի զուգահեռ»,- ասաց Սաղաթելյանը։

Նա ներկայացրեց պայքարի հետագա գործողությունները.

Ամենշաբաթյա միջոցառումներ, այդ թվում՝ փողոցային ակցիաներ, մասնագիտական քննարկումներ, պարտադիր ժամանակացույցով և գրաֆիկով հանդիպումներ։

Շարժման տարածքային և ճյուղային ստորաբաժանումների ձևավորում՝ այդ թվում՝ Արցախում և Սփյուռքում։

Հայաստանում հավատարմագրված դիվանագիտական ներկայացուցչությունների և միջազգային կազմակերպությունների հետ ծրագրավորված աշխատանք։

Ապօրինաբար ձերբակալված և կալանավորված շարժման մասնակիցների իրավունքների պաշտպանության ուղղությամբ հետևողական աշխատանք»,- ասաց նա։

Իշխան Սաղաթելյանն ընդգծեց՝ այս ամենին զուգահեռ պետք է պատրաստ լինել վճռորոշ զարգացումների, որոնց պետք է արագ արձագանքել, հակազդել ու անմիջապես վերադառնալ փողոցային պայքարի 24-ժամյա ռեժիմին։

Նա այնուհետեւ առաջարկեց երթ իրականացնել Երեւանի կենտրոնական փողոցներով եւ վերադառնալ Ֆրանսիայի հրապարակ՝ ամփոփելու հանրահավաքը։

Հանրահավաքի ավարտին Իշխան Սաղաթելյանը ներկայացրեց «Դիմադրություն» շարժման առաջիկա օրերի անելիքները.

«Հինգշաբթի՝ հունիսի 16-ին, 19։30-ից, Արաբկիրի եկեղեցու մոտից տեղի է ունենալու իրազեկման երթ, երթով գալու ենք Ֆրանսիայի հրապարակ։ Մինչ այդ ամփոփելու ենք մեր աշխատանքներն ու պատրաստվելու ենք շաբաթ օրվա համապետալան հանրահավաքին, որտեղ խոսելու ենք՝ ինչպիսի Հայաստան ենք կառուցելու, ինչ մեխանիզմներով, ինչ սկզբունքներով և ինչպես»,- ասաց նա։

https://youtu.be/4MHlIo20M1k