ԱԺ իշխող «Քաղաքացիական պայմանագիր» խմբակցությունը Իշխան Սաղաթելյանին ԱԺ փոխնախագահի պաշտոնից հետ կանչելու եւ Վահե Հակոբյանի՝ որպես Տնտեսական հարցերի մշտական հանձնաժողովի նախագահի լիազորությունների դադարեցնելու օրակարգով հուլիսի 1-ին ԱԺ արտահերթ նստաշրջան է հրավիրել:

Այդ կապակցությամբ «Դիմադրություն» շարժումը այսօր բողոքի ակցիա է իրականացրել Ազգային ժողովի։

Ակցիայի մասնակիցները դեմ են ընդդիմադիր պատգամավորներին պաշտոններից զրկելու որոշմանը։ «Առնվազն 270 հազար քաղաքացի ձայն է տվել «Հայաստան» դաշինքին՝ առաջին հերթին ՔՊ-ից ազատվելու համար, հետևաբար, դաշինքի ընդդիմադիր պայքարը պետք է գնահատի դաշինքին ընտրած քաղաքացին, և ինքը գնահատական տա՝ օրենքով ընդդիմությանը բաժին ընկնող այդ խորհրդարանական պաշտոններին արժանի՞ են նրանք, թե՞ ոչ»,- նշել են նրանք։

Մասնակիցների ձեռքին կային՝ «Մանդատներ ընդդիմությանը տվել է ժողովուրդը», «Ես իմ ձայնը տվել եմ ընդդիմությանը, որ անի այն ինչ անում է», «Հայկական Բերձոր» եւ այլ գրություններով պաստառներ։

ԱԺ արտահերթ նիստին ընդառաջ Ոստիկանությունը մեծաթիվ ուժեր էր կենտրոնացրել Դեմիրճյան փողոցում։ Ոստիկանները շղթա էին կազմել ու փակել Բաղրամյան պողոտայից դեպի Դեմիրճյան փողոց մտնող հատվածը։

Այս իշխանությունների գործունեությունը ոչ այլ ինչ է, քան դավաճանություն»,- Ազգային ժողովի մոտ բողոքի ակցիայի ժամանակ ասաց «Դիմադրություն» շարժման անդամ Սևակ Նազարյանը։

Նա նշեց, որ այսօր էլ փորձ է կատարվում Բերձորի, Աղավնոյի հանձնման պրոցեսին զուգընթաց ԱԺ-ում կեղծ օրակարգ բերել և ընդդիմադիր պատգամավորներին, ովքեր ընդդիմությանը բաժին հասնող խորհրդարանական պաշտոններ են զբաղեցնում, փորձեն հեռացնել այդ պաշտոններից՝ դրանով իսկ հրճվանք մատուցելով իրենց կուսակցությանը և այն մարդկանց, ովքեր ապրում են նայելով միայն, թե այս իշխանությունն ընդդիմադիրներին ինչ ճնշումների է փորձում ենթարկել։

Սեւակ Նազարյանը հիշեցրեց, որ ընդդիմությունն Արցախի, հայ-թուրքական, Շուշիի հռչակագրի հարցով արտահերթ նիստեր էր հրավիրել, այս իշխանությունը չէր մասնակցել։

Սևակ Նազարյանն ասաց, որ Հայաստանի օրակարգն այն չէ, ինչ անում է այս իշխանությունը.

«Մեր երկրի օրակարգը հայկական Բերձոր քաղաքի ու հարակից գյուղերի ճակատագիրն է, որովհետև այդ ճանապարհից է նաև կախված Հայաստանի ու հայության ճակատագիրը»-ասաց նա։

Ակցիայի ավարտին մասնակիցները որպես խորհրդանիշ հայկական Բերձորի նկարները թողեցին խորհրդարանի մոտ՝ ևս մեկ անգամ արձանագրելով, որ սա Հայաստանի և հայության այսօրվա առաջնային օրակարգն է։

Այսօր երեկոյան ժամը 19։30-ին` Ֆրանսիայի հրապարակում տեղի կունենա «Դիմադրության» շարժման հանրահավաքը։

https://youtu.be/m3yiytYvmSY