Այսօր, հուլիսի 15-ին Ֆրանսիայի հրապարակում մեկնարկեց «Դիմադրություն» շարժման հանրահավաքը:

Հանրահավաքի մասնակիցները մեկ րոպե լռությամբ հարգեցին Արմեն Գրիգորյանի հիշատակը, ով այսօր մահացել էր դատարանի դահլիճում, նիստի ժամանակ։

«Այսօրվա հանրահավաքի հիմնական թեման Արմեն Գրիգորյանն է, մարդ, ով հետպատերազմական շրջանում գիտակցելով այս իշխանության չարիքի աստիճանը, ամենօրյա պայքարի մեջ մտավ, իր գործունեությամբ փորձեց անել ավելին, քան մարդ անհատը կարող էր անել։

Կալանքի ենթարկված այս իշխանության հերթական զոհը դարձավ, և այն ապօրինությունները, որոնք կիրառվեցին, վստահեաբար խթան դարձան, որպեսզի սիրտը, առողջությունը չդիմանա»,- հայտարարեց ՀՅԴ անդամ Սևակ Նազարյանը։

Իրավապաշտան, Արմեն Գրիգորյանի պաշտպան Ռուբեն Մելիքյանը բարձրացավ հարթակ և ներողություն խնդրեց, որ ելույթ է ունենում, բայց մի քանի կարևոր պատճառ կա, որ հենց այստեղից ու հենց այսօր պետք է խոսի, պետք է խոսի Արմեն Գրիգորյանի նկատմամբ ակնհայտ քաղաքական հետապնդման մասին։

«Խնդիրն այն է, թե Արմեն Գրիգորյանին երբ և ովքեր են նստեցրել, ում հրամանով։ Նա ՔԿՀ-ում է հայտնվել բացառապես իր քաղաքական հայացքների համար, 2021 թվականի ապրիլին մի հաղորդման ժամանակ ասած մի քանի էմոցիոնալ խոսքի համար, որը հիշեցին մեկ տարի անց»,-ասաց Ռուբեն Մելիքյանը՝ դատապարտելով այն գործողությունները, որոնք հանգեցրին երիտասարդ հասարակական ու մշակութային տաղանդավոր գործչի մահվանը։

Իրավապաշտանն ընդգծեց՝ «Արմեն Գրիգորյանի մարդասպաններին պետք է փնտրել ոչ միայն գրիչի հարվածներ դնող քննիչների, դատախազների, դատավորների մեջ, այլ նրանց ամենաբարձր պատվեր տվողների մեջ»։

Արմենին սպանեցին Ֆրանսիայի հրապարակի համար»,- ասաց Ռուբեն Մելիքյանը։

Այնուհետեւ Ելույթներ ունեցան քաղաքական գործիչ Գառնիկ Իսագուլյանը, քաղաքացի Աշոտ Գրիգորյանը:

Ցուցադրվեց տեսանյութ նվիրված Արմեն Գրիգորյանին, որում նա նշում է, թե երբ ու ինչից հետո մենք կորցրեցինք մեր հայրենիքը։

Հարթակ բարձրացավ ՀՅԴ ԳՄ ներկայացուցիչ Իշխան Սաղաթելյանը:

Այսօրվա մեր հանրահավաքի օրակարգը, ելույթները փոխվեցին, նաև բովանդակությունը, որովհետև այսօր Հայաստանի այսպես կոչված իշխանությունների քաղաքաակն որոշման արդյունքում կրկին հայ մահացավ. ավելի ճիշտ՝ կրկին հայ սպանեցին. հայտարարեց նա:

«Արմեն Գրիգորյանը սպանվեց այս իշխանությունների ձեռքով, նրանց կամակատար քննիչի, դատավորի և դատախազի անմիջական մասնակցությամբ: Այն, մարդիկ, ովքեր զավթել են Հայաստանի իշխանությունը, շարունակում են խոնարհվել թշնամու առաջ, կզել, սպասարկել թշնամու օրակարգը, իսկ երկրի ներսում սպանել հայերին, բանտարկել, ճնշել, կալանավորել, հետապնդել բոլոր նրանց, ովքեր պայքարել և պաշտպանում են Արցախը, Հայաստանը և հայ մարդու անվտանգությունը:

Սրա վառ ապացույցներից մեկն էլ երեկ տեղի ունեցած դեպքն էր. Մուրադ Փափազյանը, ով ՀՅԴ Բյուրոյի անդամ է, Ֆրանսիայի հայկական կազմակերպությունների համակարգող խորհրդի համանախագահ, ով երկար տարիներ իր ողջ կյանքի ընթացքում ամբողջ Եվրոպայում հսկայական աշխատանք է իրականացրել Հայ դատի ուղղությամբ, պաշտպանել է Արցախը, ՀՀ-ն, նպաստել հայ-ֆրանսիական հարաբերությունների զարգացմանը, մեր պետության հզորացմանը, երեկ Հայաստանի օդանավակայանում նրան փոխանցել են ՀՀ իշխանությունների որոշումը, որ անցակալի անձ և արգելում են նրա մուտքը հայրենիք: Սա հստակ թուրքական իշխանությունների պահանջն է՝ չեզոքացնել, մեկուսացնել բոլոր այն հայերին, ովքեր պայքարել և պայքարում են Հայաստանի համար»,- ասաց Իշխան Սաղաթելյանը:

Նա հայտարարեց, որ երթով գնում են դեպի կառավարության շենք, Կենտրոն դատարան, որտեղ մահացել է Արմեն Գրիգորյանը, հետո կվերադառնան Ֆրանսիայի հրապարակ, կխոսեն հաջորդ շաբաթվա անելիքների մասին։

Երթը կանգ առավ Կառավարության շենքի մոտ, որտեղ կենտրոնացած էին մեծաքանակ ոստիկանական ուժեր:

«Նիկոլ դավաճան, Նիկոլ մարդասպան»,– վանկարկեցին երթի մասնակիցները։

«Այսօր բոլորիս աչքի առաջ Նիկոլ Փաշինյանը սպանեց հերթական հային, եւ այդպես շարունակվելու է այնքան ժամանակ, մինչեւ մենք այդ արյունարբուի ձեռքը չենք բռնել»,– հայտարարեց ԱԺ «Հայաստան» խմբակցության անդամ Արեգնազ Մանուկյանը։

Իշխան Սաղաթելյանն առաջարկեց ակիցայի մասնակիցներին «Նիկոլ, մարդասպան» պաստառները թողնել կառավարության շենքի մոտ, որպեսզի ոստիկանները տեսնեն, թե ում են ծառայում․ «Էդ պաստառները թող մնա էստեղ, որ ոստիկանները տեսնեն, թե ում են ծառայում, որ ծառայում են այս դավաճան, սրիկային, այլ ոչ թե օրենքին ու պետությանը»,- ասաց նա։

Երթը շարունակվեց դեպի Երեւանի Կենտրոնի դատարան։

Հասնելով այնտեղ, քաղաքացիները Դատարանի աստիճաններին ծաղիկներ խոնարհեցին եւ մոմավառություն կատարեցին Արմեն Գրիգորյանի հիշատակին։

Ֆրանսիայի հրապարակում հանրահավաքը շարունակվեց:

Իշխան Սաղաթելյանը հայտարարեց. մշակում ենք Չեղարկման հռչակագիր: Հաջորդ իշխանությունը հրատապության կարգով պետք է առ ոչինչ համարի Փաշինյանի ձեռք բերած ցանկացած գրավոր և բանավոր պայմանավորվածություն:

Նա ներկայացրեց հռչակագրի էությունն ու բովանդակությունը։

«Այս փաստաթուղթը վերջնական մշակելուց հետո առաջարկելու ենք, որ Հայաստանի բոլոր քաղաքական ուժերը, գործիչները ստորագրեն այդ փաստաթղթի տակ, և որ ամբողջ աշխարհը, այդ թվում՝ Ալիևը, Էրդողանը և բոլորը հասկանան՝ Նիկոլ Փաշինյանի հետ ձեռք բերած ցանկացած պայմանավորվածություն առ ոչինչ է և որևէ իրավական նշանակություն չունի հայ ժողովրդի համար»,- ասաց նա։

Հաջորդ հանրահավաքը տեղի կունենա հուլիսի 21–ին, 19։30–ին։

https://youtu.be/R-skM-S1bYI