Մուրադ Փափազյանը դեռ մայիսի 28-ին բարձրաձայնել էր, որ Նիկոլ Փաշինյանը պայմանավորվել, ապա, վերջին պահին հրաժարվել էր հանդիպել Փարիզի քաղաքապետ Անն Իդալգոյի հետ: Այս փաստը աղմուկ հանեց հասարակական-քաղաքական դաշտում: Շատ չանցած արգելվեց նաեւ Մուրադ Փափազյանի մուտքը հայրենիք:

Հայաստանի իշխանությունը փորձում է պառակտել նաեւ Սփյուռքը. ՀՅԴ Բյուրոյի ներկայացուցիչ Հակոբ Տեր-Խաչատուրյանի համոզումն է:

Որպես վկայություն հիշեցնում է Զարեհ Սինանյանի՝ Եվրոպայում հայկական նոր կազմակերպություն ստեղծելու քայլը, Ֆրանսիայում գործող ավանդական Հայկական կազմակերպությունների համակարգող խորհրդին զուգահեռ, որի համանախագահն է ՀՅԴ Բյուրոյի անդամ Մուրադ Փափազյանը:

«Մուրադ Փափազյանի անցանկալի անձ ճանաչումը ոչ միայն անարգանք է երկար տարիներ Հայաստանի, Արցախի եւ Հայ Դատի նվիրագործմանը լծված ընկեր Մուրադի եւ իր կուսակցության հանդեպ, այլեւ բոլոր Սփիւռքահայերի դէմ ուղղուած թշնամական արարք»՝ հայտարարեց Դաշնակցության Միացեալ Թագավորության կառույցը: Նմանատիպ դատապարտող հայտարարություններ տարածեցին նաեւ Մերձավոր Արեւելքի կառույցները, Հայ դատի գրասենյակները:

Սիրիայի հայ դատի հանձնախումբը հիշեցրեց, որ Մուրադ Փափազյանի մուտքն արգելված է նաեւ Թուրքիա եւ Ադրբեջան: ՀՅԴ Բյուրոյի ներկայացուցիչ Հակոբ Տեր-Խաչատուրյանը վստահ է՝ դաշնակցական գործչի մուտքի արգելքը կապ ունի Հայաստան-Թուրքիա հարաբերությունների կարգավորման արեւմտյան ծրագրի ընթացքի հետ: Նա հիշեցրեց՝ ՀՅԴ-ն դեմ է եղել նախապայմանների գնով հարցի կարգավորմանը, իսկ Հայաստան-Թուրքիա սահմանը փակել է Թուրքիան:

Փափազյանի մուտքն արգելելու հարցում թուրքական հետք տեսավ նաեւ Իրանի «Ալիք» օրաթերթի խմբագիր Դերենիկ Մելիքեանը:

Թուրքական հետախուզական ծառայությունների կողմից վաղուց հետապնդվելու օրինակ բերեց ԱԺ դաշնակցական պատգամավոր Գեղամ Մանուկյանը: Նա սոցիալական ցանցում մեջբերեց թուրքական գաղտնի ծառայության մասին գրքի դրվագը, որում հայտնի լրագրողը հրապարակել էր խիստ գաղտնի տեղեկանք՝ հայկական թիրախների՝ ակտիվ գործիչների դեմ կատարված ու ծրագրված հարձակումների մասին: Նրանց թվում էր Հանրի Փափազյանը՝ Մուրադ Փափազյանի հայրը: ՀՅԴ Բյուրոյի այդ օրերի անդամ Հանրի Փափազյանին թուրքերը ցանկացել էին պայթեցնել մեքենայի տակ ռումբ տեղադրելով՝ 1985 թվականին, ինչը կասեցվել էր Ֆրանսիայի իրավապահների զգոնության շնորհիվ: Մուրադ Փափազյանի մուտքի արգելքը դատապարտող հայտարարությամբ հանդես եկավ Ֆրանսահայ Կազմակերպությունների Խորհուրդը:

Դաշնակցական գործիչների դեմ հալածանքների շարքը սաստիկ զայրույթ է պատճառել ՀՅԴ Հունաստանի կառույցին: Արցախի, Կանադայի, Լիբանանի կոմիտեները եւս վրդովված են. հայտարարություններով բարձրաձայնել են հազարավոր հայրենակիցների մտահոգությունը. արդարության դեմ ինչպիսի՞ այլ ծայրահեղ ու քինախնդիր քայլերի կարող է դիմել Հայաստանի գործող իշխանությունը: Փափազյանի մուտքի արգելքը որակում են ժողովրդին թունավորելու եւ Սփյուռքն ու հայրենիքը պառակտելու գործողություն: Նրան՝ Հայաստանում անցանկալի անձ համարելը հիշեցրել է Լեւոն Տեր-Պետրոսյանի նմանատիպ կեցվածքը 1990-ականներին, երբ Հայաստանից արտաքսեց ՀՅԴ Բյուրոյի ներկայացուցիչ Հրայր Մարուխյանին:

Մանրամասները ներկայացնում է Լիլիթ Մանուկյանը
yerkirmedia.am