Այսօր՝ դեկտեմբերի 13-ին ՄԱԿ-ի գրասենյակի դիմաց տեղի ունեցավ բողոքի ակցիա՝ հանուն Արցախի:

«Հայաստանում բազաթիվ քաղբանտարկյալներ եղան՝ ՀՀ-ում ՄԱԿ-ի գրասենյակը չարձագանքեց որևէ կերպ, Եռաբլուրում զոհվածների ծնողներին ծեծեցին, ՄԱԿ-ը որևէ կերպ չարձագանքեց, Արցախի դեմ պատերազմ սանձազերծվեց, խաղաղ բնակչություն ռմբակոծվեց ՄԱԿ-ը ոչինչ չարեց, ֆոսֆորային զենք կիրառվեց ոչինչ չարվեց,այսօր մեր հայրենակիցները շրջափակման մեջ են և հումանիտար աղետի առջև են կանգնած այսօր, արձանագրումներ արվելո՞ւ են:Հայ ժողովրդի դեմ ցեղասպան քաղաքականության դեմ ինչ- որ բան անելո՞ւ եք, թե՞ Ալիևի ու Նիկոլ Փաշինյանի հետ նույն թիմից եք»,- ակցիայի ժամանակ հայտարարեց ՀՅԴ անդամ Գոռ Սարգսյանը:

Իր հերթին ԱԺ «Հայաստան» խմբակցության պատգամավոր Ասպրամ Կրպեյանն ասաց. «Հումանիտար աղետի այս իրավիճակում ի՞նչ է անելու արժանապատիվ հայ մարդը. ունի մեկ առաքելություն՝ կանգնելու արցախցու, Արցախի մեր հայրենակիցների, մեր քույրերի և եղբայրների կողքին: Մենք ձեր կողքին ենք, ձեզ մենակ չենք թողնելու, ձեր ցավը, մեր ցավն է, ձեր պայքարը մեր պայքարն է»:

Մենք այժմ գտնվում ենք մի երկրի դեսպանության առջև, որ կարևորագույն դերակատարություն ունի և միջազգային հարաբերություններում, և անհերքելի դերակատարություն ունի Արցախի ժողովրդի անվտանգության ապահովման գործում. հայտարարեց ՀՅԴ «Նիկոլ Աղբալյան» ուսանողական միության ատենապետ Տարոն Ղազարյանը։

«Եվս մեկ անգամ մեր դաշնակիցների ուշադրությունն ենք ցանկանում հրավիրել Արցախում կատարվողի շուրջ։ Սա ադրբեջանաթուրքական տանդեմի հերթական ագրեսիան է, որը ուղղված է էթնիկ զտման ենթարկել Արցախը։ Այն ինչ տեղի է ունեցել մոտավորապես 107 տարի առաջ, մեր հայրենիքի արևմտյան հատվածում, նույն տրամաբանությամբ այս գործողությունները միտված են նույնը կատարելու, կրկնելու արցախահայության նկատմամբ։ Ադրբեջանը ոչ միայն ցանակություն ունի էթնիկ զտում իրականացնելու, այլև մենք խորապես համոզված ենք, որ այս գործողություններով, ագրեսիայով, Ադրբեջանը ցանկություն ունի հայ-ռուսական դարավոր բարեկամության միջև ևս սեպ խրելու»,- ասց նա։

ՄԱԿ-ի գրասենյակից ակցիայի մասնակիցներին լսելու դուրս եկած աշխատակցին ներկաները փոխանցեցին նամակ։

«Արցախի տասնյակ հազարավոր քաղաքացիներ չեն կարողանում տուն վերադառնալ ու այնտեղից դուրս գալ, քանի որ Ադրբեջանը շրջափակել է Արցախը։ Ցանկանում ենք, որ միջազգային հանրությունն իրական ջանքեր գործադրի խնդրի լուծման համար»,-դիմելով ՄԱԿ-ի ներկայացուցչին՝ ասած ՀՅԴ անդամ Սևակ Նազարյանը։

ՄԱԿ-ի գրասենյակի մոտից քաղաքացիները շարժվեցին դեպի տարբեր երկրների դեսպանատներ։