Օգոստոսի 10-ին Հայ համայնքի ներկայացուցիչները փակել են Գլենդել-Բըրբանք մայրուղին եւ հանդիպում պահանջել ԱՄՆ կոնգրեսական Ադամ Շիֆի հետ:

Նրանք պահանջել են նաեւ, որ Ադամ Շիֆը ժամանի Հայաստան, այցելի Լաչինի միջանցք եւ անձամբ համոզվի, որ Արցախ տանող ճանապարհը փակ է, եւ Միացյալ Նահանգների Կոնգրեսում ներկայացնի իրավիճակը:

Նշենք, որ նախորդ օրերին, ի պաշտպանություն Արցախի, ամերիկահայերը անհնազանդության ակցիա էին արել Բըրբանք քաղաքում: Նրանք պահանջում էին կոշտ արձագանքել Ադրբեջանի գործողություններին եւ պարտադրել նրան բացել Արցախի ճանապարհը, որն արդեն 8 ամիս է՝ փակ է: Ամերիկահայերը երեք օր նստացույց էին արել Ադամ Շիֆի գրասենյակի առաջ՝ պահանջելով գալ Հայաստան եւ տեղում ծանոթանալ իրավիճակին։

Կոնգրեսականը համաձայնել է ընդունել հայերին` ԱՄՆ Արեւմտյան հայոց թեմի առաջնորդ Տեր Հովնան արքեպիսկոպոս Տերտերյանի միջնորդությամբ: Այս մասին հայտարարել են Գլենդել-Բըրբանք մայրուղին փակած հայերը, որոնք 4-րդ օրն է՝ ի պաշտպանություն Արցախի՝ անհնազանդության ակցիաներ են իրականացրել Բըրբանք քաղաքում, որտեղ տեղակայված է Շիֆի գրասենյակը:

«Այդ հանդիպմանը պետք է հասկանանք, թե մեր աշխատանքները ինչքան են շարունակվելու, ինչքանով ենք կարողանալու Միացյալ Նահանգներին պարտադրել, որ թույլ չտա նոր ցեղասպանություն, որը կատարվում է նույն ժողովրդի կողմից նույն ազգի դեմ: Հերի՛ք է: Մենք պատրաստ ենք մեր աշխատանքները շարունակել այնքան՝ մինչեւ կհասկանանք, որ մեր Արցախն ապահով ձեռքերում է»,- հայտարարել է ակցիայի մասնակիցներից մեկը: