Պաղեստինյան ՀԱՄԱՍ շարժման կողմից ռազմական գործողությունների հետևանքով Երուսաղեմի հայ համայնքի շրջանում տուժածներ չկան, իսկ իրավիճակը Երուսաղեմում հանդարտ է. տեղեկացրել է Հայ դատի Երուսաղեմի հանձնախմբի անդամ Հակոբ Սևանը:

«Այս պահին Երուսաղեմում իրավիճակը հանդարտ է: Բախումները տեղի են ունենում հիմնականում Իսրայելի հարավում, իսկ Երուսաղեմը այդ կենտրոններից բավականին հեռու է: Առավոտյան միայն պայթյունների ձայներ է լսվել, փորձ արվել է ռմբակոծել Երուսաղեմը, սակայն չի հաջողվել: Երուսաղեմում իրավիճակը հանդարտ է, և հայ համայնքի շրջանում տուժածներ չկան»,- նշել է Հակոբ Սևանը:

Նշենք, որ Հայ դատի Երուսաղեմի հանձնախմբի անդամը ավելի վաղ NEWS.am-ի հետ զրույցում ասել էր. «Հայկական եկեղեցու վրա հարձակումները, քրիստոնյաների վրա թքելը վերջին շրջանում ծայրահեղ հրեաների հարձակումների շղթայի մի մասն է: Այս հարձակումները հատկապես քաջալերվում են Նեթհանյահուի կառավարության գալուց հետո, ոչ միայն հայկական եկեղեցու, այլ քրիստոնեական այլ կառույցների վրա նույնպես»,-ասաց նա՝ նշելով, որ այսօրվա միջադեպից մանրամասների չի տիրապետում»:

Պաղեստինյան ՀԱՄԱՍ շարժումը հոկտեմբերի 7-ին կատարել է Իսրայելի վրա վերջին տարիների ամենամեծ հարձակումը։ Նրանք Գազայի հատվածից հրթիռներ են արձակել Իսրայելի ուղղությամբ։ ՀԱՄԱՍ-ի զինյալները Իսրայելի տարածք են ներխուժել պարապլաններով և պիկապներով։ Իսրայելում ռազմական դրություն է մտցվել և մոբիլիզացիա հայտարարվել։ Իսրայելի վարչապետ Բենյամին Նեթանյահուն հայտարարել է, որ ՀԱՄԱՍ-ը Իսրայելին պատերազմ է սկսել Իսրայելի դեմ և ամենախիստ պատասխանին կարժանանա։