Հայաստանի իշխանությունը դեմ է Հայաստանում Արցախի պետական ինստիտուտների պահպանմանն ու գոյությանը. նոյեմբերի 16-ին ԱԺ -ում լրագրողների հետ ճեպազրույցում հայտարարել է ԱԺ նախագահ Ալեն Սիմոնյանը։

Նա նշել է, որ մեր երկրում պետական ինստիտուտներ պահելու, զարգացնելու նպատակ չի տեսնում և համարում է, որ դա Հայաստանի անվտանգությանը ուղիղ սպառնալիք է և հարված։

ՀՅԴ Հայաստանի ԳՄ ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը վստահեցնում է, որ մեր պետության համար «միակ ու գլխավոր սպառնալիքը Նիկոլ Փաշինյանն է, որը վաղուց սպասարկում է թշնամու շահերը»։

«Այն, ինչ ասել է Ալեն Սիմոնյանը, իրենց քաղաքականության տրամաբանական շարունակությունն է՝ հայաթափել Արցախը, այն հանձնել թշնամուն, հիմա էլ փորձել ոչնչացնել Արցախի պետականության վերջին մասնիկները»,- նշել է նա։

Եվ այս քաղաքականությունն ամբողջապես իրագործելու համար, ըստ Իշխան Սաղաթելյանի, ՀՀ իշխանությունը շարունակում է մարդկանց վախեցնել Ալիևով։

«Ու այս իրավիճակում շատ կարևոր է, որ նախ պահպանվի Արցախի ժողովրդի սուբյեկտայնությունը, դրա համար էլ անհրաժեշտ է, որ նախագահական ինստիտուտն ու ժողովրդի կողմից ընտրված ԱԺ-ն պահպանվեն։ Եվ հիմա ակնկալում ենք, որ ԱԺ նախագահն ու ԱԺ-ն շատ հստակ ու հասցեական դիրքորոշում հայտնեն»,- նշել է Իշխան Սաղաթելյանը։

Նա ասել է նաև, որ իրենք բազմաթիվ հանդիպումներ են ունեցել տարբեր օղակների հետ, իրենց դիրքորոշումը հայտնել ու ասել են՝ «Արցախի սուբյեկտայնույթյան պահպանումն կարևորել ու կարևորում են», դրա համար էլ, հստակ, պետք է պահպանել Արցախի պետական կառույցները։

Նարե Գնունի