Լավրովն իրավունք չունի վերջնագրերի լեզվով խոսելու Հայաստանի հետ
06 Մարտ 2024Սերգեյ Լավրովը այնպիսի սխալ հայտարարությունների հեղինակ է, այդ թվում նաեւ Արցախի հետ կապված՝ կիրառելով նույն Նիկոլ Փաշինյանի խոսքերը, որ ես չեմ էլ ուզում անդրադառնալ իր արտահայտություններին: Այս մասին, այսօր՝ մարտի 6-ին, ԱԺ-ում լրագրողների հետ զրույցում ասաց ՀՅԴ անդամ, ԱԺ «Հայաստան» խմբակցության քարտուղար Արծվիկ Մինասյանը:
Դիտարկմանը, որ Ռուսաստանի ԱԳ նախարարը, ըստ էության, հայտարարել է, որ Հայաստանը պետք է կողմնորոշվի, կամ մեզ հետ եք, կամ մեզ հետ չեք, ընդդիմադիր պատգամավորն ասաց. «Այդպիսի հարցադրումները պետք է ուղղակի մերժվեն: Հայաստանը օբյեկտիվորեն չի կարող այս տարածաշրջանում անտեսել ՌԴ-ի դերակատարությունը։ Սա նշանակում է թուրք-ադրբեջանական տանդեմին ճանապարհ բացել նոր արհավիրքների համար, ոչնչացնել Հայաստանը: Եվ, ոչ թե Լավրովի ասած ուլտիմատումի լեզվով եմ ուզում արձագանքելն, այլ նա ինքը իրավունք չունի ուլտիմատում դնի, ինքն էլ պետք է հասկանա, որ ՌԴ-Հայաստան հարաբերությունները անձով պայմանավորված չէ։ Նիկոլ Փաշինյանը կամ իր խմբակն է իշխանության, թե ոչ:
Ո՞նց կարող է Հայաստանի կամ հայ ժողովրդի դիրքորոշումը հարցնի Նիկոլ Փաշինյանից։ Ես կարծում եմ, որ սա նաև Ռուսաստանի համար ճիշտ մոտեցում չէ։ Ի՞նչ է նշանակում, կողմնորոշվեք՝ կա՛մ…, կա՛մ…։
Երբ Լավրովը հիմնավորում է այս իշխանությունների դավաճանական գործողությունները, դրանով ինքը հայ ժողովրդին օգնո՞ւմ է, թե՞ չէ»,-ասաց Մինասյանը՝ նշելով, թե անընդունելի են Լավրովի այն հայտարարությունները, թե Հայաստանն անվերադարձ կորցրել է Արցախը:
Մեզ դեռևս չի հաջողվել հանրային գիտակցության մեջ այնքան վստահություն ներշնչել, որ կարողանանք այս իշխանություններից ձերբազատվել. ասաց Արծվիկ Մինասյանը:
«Երևի դա է պատճառներից մեկը, որ շարունակվում է այս իշխանության ապազգային, հակահայկական վարքագիծը»,-ասաց պատգամավորը։
Մինասյանի խոսքով՝ այն, ինչ անում են իշխանությունները, ուղղակի խայտառակություն է. «Հայաստանի անվտանգությունը ևս մեկ անգամ տեղափոխում են այնպիսի աննորմալության դաշտ, որ ցանկացած պահի բոլոր կողմերից Հայաստանը հարվածներ է ստանում։ Ուղղակի թշնամացնել դաշնակցին և, առհասարակ, զրոյացնել Հայաստանի անվտանգության արտաքին համակարգերը, նշանակում է, որ այս մարդիկ ևս մեկ անգամ ցույց են տալիս, որ ոչ միայն կապ չունեն պետական կառավարման հետ, այլև ոնց որ թե բացարձակ կապ չունեն նաև հայ ժողովրդի անվտանգության նվազագույն երաշխիքներ ստեղծելու հետ»։
Այն, ինչ անում է ՀՀ իշխանությունը, ուղղակի խայտառակություն է, Հայաստանի անվտանգությունը եւս մեկ անգամ
տեղափոխում են այնպիսի աննորմալության դաշտ, որ ցանկացած պահի Հայաստանը բոլոր կողմերից հարվածներ է ստանում. ասաց Արծվիկ Մինասյանը:
«Նրանք ուղղակի թշնամացնում են դաշնակցին, ավելին եղած անվտանգության համակարգն աշխատեցնելուն ուղղված ավելի դաշնակցային մոտեցումը փոխարինել թշնամական մոտեցումով եւ առհասարակ զրոյացնել Հայաստանի անվտանգության արտաքին համակարգերը, սրանով այս մարդիկ եւս մեկ անգամ ցույց են տալիս, որ ոչ թե բացարձակ կապ չունեն պետական կառավարման հետ, այլ նաև կապ չունեն նաեւ հայ ժողովրդի անվտանգության նվազագույն երաշխիքներ ստեղծելու հետ»,- ընդգծեց ընդդիմադիր պատգամավորը։
Հարցին, թե ի՞նչ վատ բան կա, որ Հայաստանը զուգահեռաբար հարաբերությունները խորացնի նաեւ ԵՄ-ի հետ, Արծվիկ Մինասյանն պատասխանեց. «Չկա նման բան: Հայաստանը երկար տարիներ GSP+ համակարգի արտոնությունների համակարգում գործող պետություն է: Մենք այստեղ ունենք լուրջ սահմանափակումներ եվրոպական շուկաներում: Եվրոպական տարբեր ստանդարտները, նաեւ միջազգային խոշոր խաղացողներն ուղղակի ճանապարհ չեն թողնում, որ հայկական ապրանքները կամ ծառայություններն ազատորեն մուտք գործեն այդ շուկաներ: Այսօր Հայաստանի շրջանառության հսկայական հատվածը կապված է Ռուսաստանի հետ: Մոռանալ, անտեսել այս ամենը եւ սին հույսեր փայփայել եվրոպականացման գործընթացի մեջ, նշանակում է ուղղակի չհասկանալ, ապրել միայն սեփական բարեկեցիկ աշխատասենյակում, սեփական փոքր խմբի հետ վայելքների մեջ: Սա նշանակում է, որ ոչ մի բանի դիմաց դու փոխարինում ես քո քիչ, թե շատ եղած անվտանգության համակարգերը»,-ասաց Մինասյանը:
Նիկոլ Փաշինյանի խմբակն ամեն գնով փորձում է Հայաստանը դարձնել գործիք Ռուսաստան-Արեւմուտք առճակատման հարցերի լուծման ուղղությամբ. ասաց Արծվիկ Մինասյանը:
«Սա ամենա վտանգավոր գործընթացն է: Չի կարելի արհեստականորեն ստեղծել մի իրավիճակ, երբ Ռուսաստանը Հայաստանին դիտարկի որպես թշնամի, կամ Իրանը Հայաստանին դիտարկի որպես ոչ վստահելի հարեւան պետություն եւ այլն:
Հայաստանի իշխանությունը սկուտեղի վրա մատուցել է Հայաստանը որպես երկու կենտրոնների վեճի հարթակ, դաշտ:
Սրանից պետք է դուրս գանք: Ինչո՞ւ ես արհեստականորեն տանում մի տեղ, որտեղ շանս չունես փրկվելու: Լինելով շախմատիստ, մտնում ես բոքսի հրապարակ ու փորձում ես բոքս կպնել, այն էլ մերկ ձեռքերով: Իր խոսքերով, ցլերի դեմ ենք դուրս գալիս: Ցլերը քիչ էին, հիմա էլ արջի՞ն է հանում մեր դեմ»,-ասաց նա:
Մանրամասները՝ տեսանյութում