Այսօր՝ վաղ առավոտից քաղաքացիները փակել էին Արմավիր-Գյումրի միջպետական ճանապարհը՝ ի աջակցություն Տավուշի։

Ակցիայի մասնակիցների կողքին էին ԱԺ «Հայաստան» խմբակցության պատգամավորներ Գեղամ Մանուկյանը եւ Մհեր Սահակյանը: Քաղաքացիները վանկարկում էին՝ «Նիկոլ դավաճան»:

Ոստիկանության ներկայացուցիչը հայտարարել է, որ պետք է բացել ճանապարհը. «Երկու րոպե ժամանակ ենք տալիս, եթե ճանապարհը չբացվեց, դրանից հետո ստացվում է, որ ոստիկանի օրինական պահանջը չեք կատարում: Ոչ ոք իրավունք չունի ուրիշի ազատ տեղաշարժը սահմանափակել»:

Գեղամ Մանուկյանը նկատել է. «Հասարակական կարգը խախտվում է ամբողջ Հայաստանում, նաեւ անվտանգային, որովհետեւ Նիկոլ Փաշինյանի գլխավորությամբ անօրինական կերպով սահմանակետեր են տեղադրվում: Այսօր բոլոր ոստիկանները իրականում հարգելով ՀՀ սահմանադրությունը, պետք է լինեին կառավարության շենքի դիմաց եւ ձերբակալեին ամենամեծ հասարակական կարգը խախտող Նիկոլ Փաշինյանին»:

Չնայած ոստիկանների պահանջներին՝ ակցիայի մասնակիցները երկար ժամանակ փակ են պահել ճանապարհը՝ հիշեցնելով, որ գործում են հանուն հայրենիքի:

Իրավիճակն այստեղ հաճախ լարվել է: Երթևեկությունը մի պահ վերականգնվել է, սակայն ակցիայի մասնակիցները կրկին փակել են ճանապարհը։

Ի աջակցություն Տավուշի` այսօր առավոտյան Երևանում բեռնատարը՝ «Միացիր կամ հանձնիր» գրություններով փակել է Մյասնիկյան պողոտան:

Նշենք, որ հանգստյան օրերին եւս քաղաքացիներն օրվա տարբեր ժամերի փակել են փողոցներ եւ ակցիաներ իրակնացրել` բնակիչների ուշադրությունը հրավիրելով իշխանությունների նախաձեռնած միակողմանի զիջումների վտանգավոր հետեւանքների վրա:

Ապրիլի 28-ին իրազեկման ակցիաներ են տեղի ունեցել Շիրակի մարզում: Տավուշի իարզեկման ակցիաների շրջանակներում քաղաքացիները Արթիկ, Ամասիա և Գյումրի քաղաքներում փակցրել են «Արցախ հանձնողը Տավուշ էլ կհանձնի», «Նիկոլ հողատու», «Տավուշը հայրենիք է», «Ոտքիˊ քանի չի հանձնել», «Տավուշը հանձնողին կհանձնենք հողին» և այլ գրություններով պաստառներ:

Ի սատարումն տավուշցիների` Գյումրիում անցկացվել է իրազեկման երթ:

ՀՅԴ ՀԵՄ Երիտասարդներն ի աջակցություն Տավուշի՝ «Դավաճանը հող է հանձնում», «Հայրենիքը բոլորիս կարիքն ունի» գրությամբ պաստառներով ակցիա են իրականացրել Արամ Խաչատրյան համերգասրահում և Հակոբ Պարոնյանի անվան Երաժշտական Կոմեդիայի Պետական թատրոնում։

Երևանի փողոցներում են հայտնվել Տավուշում տեղադրված սահմանային սյուների մակետներ՝ իբրեւ զգուշացում, որ միակողմանի զիջումները կհասնեն նաև Երևան։