Մայիսի 10-ին Հանրապետության հրապարակում մեկնարկեց «Տավուշը հանուն հայրենիքի» շարժման առաջնորդ Բագրատ Սրբազանի հրավիրած հանրահավաքը: Այն մեկնարկեց տերունական աղոթքով։

Բագրատ Սրբազանը ներկայացրեց Համազգային շարժման հետագա անելիքները՝ Նիկոլ Փաշինյանի հրաժարականին հասնելու ճանապարհին։

Դիվանագետների նորաստեղծ խորհրդին Սրբազանը հորդորեց մշակել և կազմել սահմանազատման և սահմանագծման շուրջ բանակցությունների հստակ հայեցակարգ, որպեսզի այն հանրայնացվի և մարդիկ հստակ համեմատության մեջ հասկանան՝ ինչ է առաջարկվում իրենց եղածի համեմատ։

Պահեստազորի սպաներին Սրբազանը հորդորեց, որ պետական անվտանգության բարձրացման, անվտանգային համակարգի հայեցակարգ ներկայացնեն։

«Երրորդ քայլը ձերն է, ժողովուրդ, առաջիկա օրերին, մինչև մյուս ուրբաթ բոլորդ խաղաղ, բարեկիրթ զրույցներ անցկացրեք ՔՊ անդամների հետ։ Առանց հայհոյանքի, ագրեսիայի։ Շատ կարևոր է, որ կարողանանք բացատրական աշխատանքներ տանել։ Սա սկիզբն է, վերջը չի։ Համբերությամբ, ինքնավստահությամբ, փոխադարձ վստահությամբ զինված՝ քայլ առ քայլ առաջ ենք գնալու»,- ասաց Սրբազանը։

«Հասնելու ենք մեր նպատակին, այլ ելք չկա»,- ասաց նա:

Հանրահավաքին ելույթ ունեցան «Հայաստան» խմբակցության պատգամավոր Գառնիկ Դանիելյանը, «Տավուշը հանուն հայրենիքի» շարժման նախաձեռնող խմբի անդամ, քաղաքագետ Սուրեն Պետրոսյանը, «Ջենեսիս Արմենիա» ուղեղային կենտրոն-հիմնադրամի ղեկավար Աբրահամ Գասպարյանը, դերասանուհի Անաիս Սարդարյանը, այլոք:

Երեկ 100 000 մեր հայրենակիցներ ցույց տվեցին, որ տեր են մեր հայրենիքին, որ մեր ժողովուրդը միասնական է և որ մենք հաշտ չենք ստեղծված իրավիճակի հետ. հանրահավաքի ժամանակ ասաց ԱԺ «Հայաստան» խմբակցության պատգամավոր Գառնիկ Դանիելյանը։

Նա ուղերձ հղեց նաև այսօր խաղաղ անհնազանդության գործողություններին միացած երիտասարդներին՝ ուսանողությանը, որոնք այսօրվանից դասադուլ են հայտարարել:

«Այսօր ապացուցեիք, որ ուսանողությունը, երիտասարդությունը հայրենիք ունի, որ ուսանողությունը, երիտասարդությունը մեր վաղվա գալիքը ապահովելու է։ Բռնաճնշումներն արդյունք չտվին: Ուսանողությունը դուրս է եկել և ասել՝ տեր է իր հայրենիքին»,- ասաց Գառնիկ Դանիելյանը։

Վաղը հանրահավաք չի նախատեսվում. 10 տեղերում՝ Երևանում ու մարզերում, խաղաղ անհնազանդության, գործողություններ են իրականացվելու։ Իսկ հանրահավաք կլինի կիրակի` 18։30–ին, այդ օրը կներկայացվի շարժման քայլաշարը։

Նշենք, որ մայիսի 10-ի վաղ առավոտից մեկնարկել են խաղաղ անհնազանդության ակցիաները: Դասադուլ են սկսել տարբեր համալսարանների ուսանողները, փակվել է Կիրանց-Ոսկեպար ճանապարհը:

Բագրատ Սրբազանի առաջնորդած շարժումը երթով այցելել է համալսարաններ, կոչ արել ուսանողներին միանալ համազգային շարժմանը։ Սրբազանին են միացել ԵՊՀ-ի, Ագրարային համալսարանի, ՀԱՊՀ-ի ուսանողները։ Սրբազանն այցելեց նաև Կոնսերվատորիա: