Այսօր՝ մայիսի 12-ին Հանրապետության հրապարակում մեկնարկեց «Տավուշը հանուն հայրենիքի» շարժման առաջնորդ Բագրատ Սրբազանի հրավիրած համազգային հանրահավաքը։

Մինչեւ հանրահավաքի սկսելը երիտասարդները Մատենադարանի մոտից երթով միացան հրապարակում հավաքված բազմահազար քաղաքացիներին:

Հանրահավաքը մեկնարկեց ՀՀ օրհներգով եւ Տերունական աղոթքով:

Այսօր այս բեմի, այս հարթակի վրա են մեր հանրության տարբեր շերտերի ներկայացուցիչեր, որոնք թե՛ մտքի, թե՛ հոգու և թե՛ ուժի կրողներն են. հայտարարեց Բագրատ սրբազանը:

«Ուզում եմ մեր խոնարհումը հայտնել վիրավորում ստացած մեր եղբայրներին, մեր տղաներին: Անդամալույծ են նրանցից շատերը: Ուզում եմ մեր զորակցությունը հայտնել բացարձակ անհայտության մեջ գտնվող մեր տղաների ծնողներին: Աղոթում և մաղթում ենք, որ նրանք գտնվեն և տուն վերադառնան: Նրանց թվում է նաև իմ հոգեզավակը` Հայր Մկրտիչ աբեղա Կարապետյանը: Մեր մաղթանքն է, որ մեր բոլոր տղաները տուն վերադառնան ու մխիթարություն բերեն իրենց ընտանիքներին ու բոլորիս»,- ասաց Սրբազանը, իր երախտիքի խոսքը հղելով պատերազմի մասնակիցներին ու նրանց հարազատներին:

Ապա Բագրատ սրբազանը բեմ հրավիրեց ԱԺ «Հայաստան» խմբակցության պատգամավոր ՀՀ ԱԺ պատգամավոր Գառնիկ Դանիելյանին:

«Սա մաքուր հայկական ազգային սրտով ու հոգով շարժում է: Բոլորիս նպատակը մեկն է, ունենալ խաղաղ, արժանապատիվ եւ ճշմարիտ Հայաստան եւ մենք կունենանք այդ Հայաստանը: Բոլորին միավորելու ենք մեկ նպատակի շուրջ հայրենիք ունենալու շուրջ, պատիվ ունենալու շուրջ», – իր ելույթում հայտարարեց Դանիելյանը:

«Այսօր մեր առջև խնդիր է դրված լինել Արևմտյան Ադրբեջան թե Հայաստան, մենք ընտրում ենք Հայաստանը, արժանապատիվ խաղաղությունը»,- ասաց նա:

Դիվանգետների համահայկական խորհրդի անդամ Վահագն Մելիքյանը իր խոսքում նշեց, որ օրեր առաջ իրենց հանձնարարվել է պատրաստել հակիրճ փաստաթուղթ Հայաստանի սահմաններին կատարվող զարգացումների, խաղաղության, Հայաստանի մարտահրավերների վերաբերյալ։

Փաստաթղթում ներկայացված են այն հետևանքները, որոնք կարող է ունենալ Հայաստանը, եթե կտրուկ չփոխվի իրավիճակը։

«Առաջին բաժինը սահմանագծման ու սահմանազատման մասին է, երկրորդը՝ խաղաղության։ Տավուշի մարզում սկսած գործընթացն առանց վերապահումների պետք է որակել սահմանազատման ու սահմանագծման անօրինական գործընթաց, ուժի սպառնալաիքի ներքո կամ կապիտուլյացիայի շարունակություն թվացյալ խաղաղության պայմաններում, դրա լավագույն ապացույցը Ալիևի հայտարարություն է, որ առանց մեկ կրակոցի իրենց թելադրած պայմաններով ադրբեջանական կողմը ստանում է տարածքներ, միաժամանակ անվտանգության որևէ երաշխիք չկա նոր պատերազմը կանխելու և հերթական ռազմական ագրեսիայի վտանգը շարունակում է կախված մնալ մեր ժողովրդի գլխին։ Այլևս հստակ է, որ չկան իրական բանակցություններ, գործընթացը տեղի է ունենում Հայաստանի կողմից միակողմանի զիջումների ճանապարհով»,-ասաց նա։

Դիվանագետը շեշտեց՝ սահմանազատման համար բացառապես Ալմա Աթայի հռչակագիրը որպես հիմք ընդունելը հակաիրավական է և քրեորեն պատժելի։

Հանրահավաքի ժամանակ մեծ էկրանի վրա ցուցադրվեց մի տեսանյութ՝ հիշեցնելով, թե ինչ սուտ խոստումներ է տվել Նիկոլ Փաշինյանը ու չի կատարել:

Բագրատ սրբազանը տեղեկացրեց, որ հանդիպել է անկախ պատգամավոր Իշխան Զաքարյանի հետ, իր կարծիքն իմանալու համար, և վերջինս չի մերժել միանալու այս գործընթացին։

«Այսինքն առաջին անգամ կարող ենք ասել, որ ընդդիմադիր խմբակցությունները հաղթահարել են առաջին փուլը, մնացել է չափազանց կարևոր երկու հարցերի լուծումը՝ վարչապետի թեկնածուի և պակասող 18 պատգամավորի աջակցության հարցը։ Առաջիկա օրերին մենք միասին պետք է լուծենք այս հարցերը»:

Ապա Բագրատ Սրբազանը ներկայացրեց, թե ինչպիսին պետք է լինի անցումային կառավարությունը.

Անցումային կառավարությունը պետք է դառնա հաշտության կառավարություն՝ ձևավորվելով բոլոր ունակ և ընդունակ բարձր մասնագիտության մարդկանցով, հնարավորություն տալով անկախ կուսակցական և այլ պատկանելիությունից մարդկանց ներգրավելու այդ հաշտության կառավարության մեջ»:

Նա նշեց, որ պետք է գերիշխի ներքին հաշտեցման մթնոլորտը՝ հիմնված արդարության սկզբունքի վրա։

Պետական կառավարման քաղծառայողների համակարգը պետք է լինի կայուն և ապահով ոչ թե սրա, նրա քմահաճույքով պայմանավորված, հարազատների, բարեկամների լցոնումներով պայմանավորված։

Պետք է երաշխավորի ազատ և արդար ընտրությունները գալիք կառավարության, մնայուն կառավարության համար։

Մինչև նոր ընտրությունները չպետք է լինեն որևէ կերպով սահմանադրության ամբողջական փոփոխությունների մասին խոսակցություններ։

Պետք է հանձնառու լինել շարունակել խաղաղ բանակցությունները։

Պետք է մերժել հականերով արտաքին քաղաքականությունը՝ հրաժարվելով գործիք դառնալ, զարգացնելով իր սեփական, հայկական օրակարգը, բարեկամների փնտրտուքով, բայց ոչ երբեք հույսը միայն բարեկամների վրա դնելով, այլ ապավինելով սեփական ժողովրդի ուժականությանը և կամքին։

Չճանչելով որևէ ուժով ձևավորված որևէ իրողություն, չլեգիտիմացնելով ուժի կիրառված իրողությունները, բոլոր կարգավորումները պետք է տեղի ունենան բանակցությունների արդյունքներով, միջազգային իրավունքի, արդարության սկզունքի հիման վրա։

Ոչ ոք չի կարող պարտադրել մեզ փոխել մեր հայկական օրակարգը՝ իր բոլոր ենթատեքստերով։

Մեր տարածշարջանի և հարևանների ստեղծած թշնամական իրադրությունը մեզ ստիպում է լինել ոչ «սովորական», այլ դառնալ հատուկ պետություն, որից պետք է բխեն բոլոր հայեցակարգային դրույթները տարածված ողջ համակարգերի վրա։

Կառավարման համակարգ պետք է վերադառնան բոլոր փորձառու մասնագետները՝ դիվանագտներ, զինվորականներ, պետական ծառայության մեջ գտնվող բոլոր անձինք, ովքեր ինքնկամ հեռացել են կամ անադարացիորեն հեռացվել են նույնիսկ մեկ «լայք» դնելու պատճառով։

Պետք է նոր հայեցակարգ մշակել Սփյուռքի հետ հարաբերության համար։

Հայաստանը պետք է մուտք գործի հետպատերազմյան ապաքինման, զարգացման փուլ, որը ենթադրում է նոր բարքեր, նոր վարքագիծ: Սկսած չաղտոտելուց մեր հայրենիքը, մինչև ամենաքաղաքական, ռազմական հարցերի արծարծումը:

Պետք է կասեցվի մի շարք վիճակահարույց, անհեթեթ ծրագրերի իրականացումը՝ Ակադեմիական քաղաք կոչված, հայոց լեզուն գիտության ոլորտից դուրս մղելու կառավարության որոշումը, տրանսորտի թանկացում…

Պետք է բանտերից ազատ արձակվեն բոլոր քաղաքական հայցքներով բանտարկյալները, ինչպես նաև ամբողջ ջանքը ներդրվի վերադարձնելու Արցախի Հանրապետության ռազմաքաղաքական ղեկավարությանն ու բոլոր գերեվարված տղաներին։

Զարգացնել և մշակել նոր ռազմական դոկտրին։

Հանրահավաքի վերջում Բագրատ Սրբազանը երիտասադրներին կոչ արեց վաղն առավոտյան ժամը ութից անել տոտալ դասադուլներ, գործադուլներ, պարալիզացնել ամբողջ քաղաքը եւ ՀՀ զանազան տարածքներ՝ անհամաձայնություն հայտնելով ստին եւ չարիքին: Նա նաեւ տեղեկացրեց, որ ամեն օրվա ավարտին կհանդիպեն Սուրբ Աննա եկեղեցու բակում, ամփոփելու օրը և հայտարարելու հաջորդ օրվա անելիքների մասին:

Սրբազանը նշեց, որ վաղը առավոտյան ինքն այցելելու է ստեղծագործական միություններ՝ Գրողների միություն, Նկարիչների միություն, Գիտությունների ազգային ակադեմիա, Պատմության ինստիտուտ եւ այլ հաստատություններ։

Տեսանյութն՝ այստեղ