Այսօր Երևանում կրկին բողոքի ու իրազեկման ակցիաներ են անցկացվել։ «Տավուշը հանուն հայրենիքի» շարժման մասնակիցները կարճ ժամանակով փակել են Սայաթ–Նովա–Նալբանդյան և Սայաթ–Նովա–Աբովյան խաչմերուկները։

«Հայ, Հայաստան, Հայրենիք ու Աստված» վանկարկումներով քաղաքացիները քայլել են մայրաքաղաքի փողոցներով՝ կոչ անելով մարդկանց միանալ իրենց, հորդորելով աշակերտներին ու ուսանողներին դասադուլ անել:

Երիտասարդներին միացած և ճանապարհը փակած վարորդներից մեկին ոստիկաններն իջեցրել են մեքենայից և բերման ենթարկել։

Երիտասարդների հետ էին նաև ԱԺ ընդդիմադիր պատգամավորներ Արթուր Խաչատրյանը և Գեղամ Մանուկյանը։

Ակցիայի մասնակիցները վանկարկում էին են. «Հայ. Հայաստան. Հայրենիք ու Աստված», «Նիկո՛լ, հեռացիր», «Պայքար», «Միացե՛ք»։

Աբովյան փողոցում խաղաղ ակցիա իրականացնողներին բերման են ենթարկել մայթերից։ Կարմիրբերետավորները բերման են ենթարկել ակցիայի մասնակիցներին, նաեւ «Հայկական ցեղասպանության արդարության մարտիկներ» գաղտնի կազմակերպության անդամ, թուրք դիվանագետի սպանության համար դատապարտված Համբիկ Սասունյանին, որին հետո ազատ են արձակել:

Հանրապետության հրապարակում կարմիրբերետավորների մեծ ուժեր էին կենտրոնացած: Երբ բազմամարդ երթը Աբովյան փողոցով hասավ հրապարակ՝ կարմիրբերետավորները կրկին սկսեցին բերման ենթարկել երթի մասնակիցներին:

«Ադրբեջանից, Թուրքիայից հանձնարարական է եկել, որ «Հայկական ցեղասպանության արդարության մարտիկներ» գաղտնի կազմակերպության անդամ Համբիկ Սասունյանին բերման ենթարկեն»,- Հանրապետության հրապարակում, լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը։

Նա նշեց, որ «Ալիևը զանգել է իր այստեղ նստած գանձին, ասել է Համբիկ Սասունյանին բերման ենթրակել»։

«Համբիկ Սասունյանին կարող են բերման ենթարկել թուրքերին ու ադրբեջանիցները, մեկ էլ կարմիր բերետավորները։

Հանձնարարարական են ստացել, որ պետք է ազգային մարդկանց բերման ենթարկեն»,- ասաց Դանիելյանը։

Նա նշեց, որ տարեցներին, երեխաներին, կանանց բռնի բերման են ենթարկում. «Սրանք կարմիր գծեր ունե՞ն»։

Քիչ առաջ Հանրապետության հրապարակից երթ սկսվեց Տավուշի թեմի առաջնորդ Բագրատ Սրբազանի գլխավորությամբ: Երթը շարժվեց Խանջյան փողոցով: Բագրատ Սրբազանն այցելելու է ԵՊՀ եւ Ժուռնալիստների միություն, ապա մետրոյով՝ Գարեգին Նժդեհի հրապարակ։

Այսօր երեկոյան ժամը 19։00-ին Բագրատ սրբազանը Սուրբ Աննա եկեղեցու բակում կհանդիպի «Տավուշը հանուն հայրենիքի» շարժման մասնակիցներին՝ ամփոփելու օրը եւ հայտարարելու հաջորդ օրվա անելիքների մասին:

Նշռնք, որ Ժամը 13:30-ի դրությամբ ոստիկանական բաժիններ բերման է ենթարկվել անհնազանդության ակցիա իրականացնող 63 քաղաքացի:

Բաժիններում նրանց այցելեն փաստաբանները և ընդդիմադիր պատգամավորները: