Բագրատ սրբազանը Սուրբ Աննա եկեղեցու բակում «Տավուշը հանուն հայրենիքի» շարժման անդամների ու աջակիցների հետ ամփոփեց օրը:

Այսօր ամբողջ Երևանում և մարզերում տեղի են ունեցել անհամաձայնության ակցիաներ. հայտարարեց ԱԺ «Հայաստան» խմբակցության պատգամավոր Գառնիկ Դանելյանը:

«Օրվա ընթացքում փակվել են` Նալբանդյան – Սայաթ-Նովա խաչմերուկում, Աբովյան փողոցը, Մոսկովյան փողոցը, Երվանդ Քոչար փողոցը, Հանրապետության փողոցը, Տերյան փողոցը Թումանյան-Խանջյան խաչմերուկը, Եղվարդի խճուղին, Աբովյան փողոցը «Մոսկվա» կինթոատրոնի հատվածում, Սայաթ-Նովայի պողոտան, Արմավիր քաղաքում` Չարենցի փողոցը: Իրազեկման ակցիա Գյումրիում, Բաղրամյան պողոտան Մաշտոց-Պուշկին խաչմերուկ, Մաշտոց-Արգիշտի խաչմերուկ, Լոռու մարզում իրականացվել է իրազեկման ավտոերթեր, իրազեկման ակցիա է իրականացվել Մետրոպոլիտենի տարբեր կայարաններում: 63 քաղաքացի բերման է ենթարկվել այդ թվում նաև անչափահասներ։ Նրանց բոլորին ցուցաբերվել է փաստաբանական աջակցություն, բոլորն այս պահին ազատության մեջ են։

Բագրատ Սրբազանը հավաքվածներին հայտնեց, որ վաղը ժամը 16:00 պետք է ներկա լինեն Ազատության հրապարակում, այնտեղ ժամը 17:00-ին տեղի կունենա միջազգային տնտեսական համաժողով, որին կմասնակցի նաև Նիկոլ Փաշինյանը։

«Ժամը 16:00 պետք է ներկա լինենք Ազատության հրապարակում և մեր խաղաղ, բայց հուժկու ընդվզումը հայտնենք Նիկոլ Փաշինյանին»,- հայտնեց Սրբազանը։

«Այս պայքարը նյութական ակնկալիք չունենալու պայքար է, ոչ պաշտոն, ոչ փող, ոչ աթոռ, ոչ մի ակնկալիք չկա այս պայքարից։ Հայրենիք և պատիվ ունենք ստանալու այս պայքարից, ուրիշ ոչ մի բան։

Ինչպես միշտ ասել եմ Հոգևոր Հայաստանը պետք է հաղթի Նոր Հայաստանին»,- ասաց նա։

«Հոծ թվով մարդիկ պետք է այնտեղ լինեն եւ ընդվզում հայտնեն, որ անընդունելի է մեզ համար այս ապօրինի սահմանազատումը»։

Նա նաեւ հայտարարեց, որ մայիսի 15-ի որոշակի ջրբաժան կա, եւ վաղը կհայտարարի հետագա անելիքների մասին. «Ամսի 15-ին կհասկանանք ինչ է տեղի ունենում եւ անմիջապես կասեմ, թե ամսի 16-ին ինչ ենք անելու: Ամեն դեպքում մենք ավելի մեծ մասնակցությամբ անելիքներ ունենք»:

Սրբազանը տեղեկացրեց, որ Երկու օր առաջ հանդիպել է երկու տարբեր կազմակերպությունների, կուսակցությունների հետ, այսօր հանդիպել է նախկին երեք վարչապետերի հետ՝ Վազգեն Մանուկյանի, Հրանտ Բագրատյանի եւ Խոսրով Հարությունյանի հետ․ «Մեր պատկերացումներ ենք ներկայացրել, առաջարկներ լսել»։ Սրբազանը նաեւ նշեց, որ հանդիպել է ԱԺ «Պատիվ ունեմ» դաշինքի եւ ՀՀԿ –ի ներկայացուցիչների հետ: Բոլորն էլ ներքին ոգևորություն ունեն, որովհետև տեսնում են՝ փողոցում ինչ է կատարվում, տներում ինչ է կատարվում, ամեն տեղ։ Եվ մենք պարզապես կոչված ենք այս ամբողջ էներգիան կամ այսօր ամբողջ հոսանքը հասցնել արդյունքի։ Թե այդ արդյունքն ինչ տեսքով կլինի, ճանապարհային քարտեզի մի կարևոր մասն է կազմում։

Եվ այդ արդյունքը պիտի լինի հաղթանակը՝ ճշմարտության հաղթանակը։ Մենք ուրիշ տարբերակ չունենք»,- ասել է Բագրատ Սրբազանը։

«Վաղը կհանդիպենք մեր ՀԿ-երի և քաղաքական կուսակցությունների ներկայացուցիչների հետ։ Հավանաբար մեկ-երկու օրից լրիվ ամփոփումը կունենանք, եզրակացությունները, գործողությունները հստակ կերպով կլինեն»,- ասաց Բագրատ Սրբազանը։

Մայիսի 15-ի առավոտյան կշարունակվեն խաղաղ, անհնազանդության գործողություններ ՀՀ ողջ տարածքում:

տեսանյութն՝ այստեղ