Այսօր՝ հունիսի 17-ին Բաղրամյան փողոցում ընթացող հանրահավաքի ժամանակ Բագրատ սրբազանը հայտարարեց՝ հունիսի 12-ը, երբ ժողովրդի նկատմամբ բիրտ ուժից բացի, կիրառվեցին նաև լուսաձայնային նռնակներ, նոր խարան է՝ գործող իշխանության ճակատին։

«Հունիսի 12-ը ևս մի անջնջելի խարան է այս իշխանության և նրա ստախոս ղեկավարի ճակատին։ Եվ դա վկայում է, որ ՀՀ քաղաքացին գտնվում է մի մեծ կալանավայրում, մեծ բանտում»,- ասաց Բագրատ Սրբազանը։

Նա հավելեց՝ ամբողջ իրավապահ համակարգը, իր իրական գործունեության փոխարեն, պարզապես լծված է մեկ անձին՝ Նիկոլ Փաշինյանին ծառայելով:

«Հունիսի 12-ը հավասար է մարտի 1-ին։ Այս մարդկանց ճակատից այդ խարանը պիտի դուրս չգա։ Այո, հունիսի 12-ը նոր մարտի 1-ն է։ Այն մարդն էր բացակայում բեմից, ով մարտի 1-ին աղաղակում էր՝ ասելով՝ երկաթներ վերցրեք, ոստիկաններին ջարդեք, հոգիս փառավորվում է․․․ Ուղղակի դա էր բացակայում։ Միայն։ Բայց նույն գործողությունը նույն կերպով, նույն ոգով դրսևորած այս մարդը իրագործեց դա նաև այդ օրը։ Իրագործեց՝ այս անգամ գտնվելով ԱԺ պարիսպների թիկունքում»,- ասաց Բագրատ Սրբազանը՝ հիշեցնելով 2008-ի մարտի 1-ին Նիկոլ Փաշինյանի կոչերը, հայտարարություններն ու վարքը և զուգահեռներ տանելով 2024-ի հունիսի 12-ին նրա գործողությունների, հայտարարությունների հետ։

«Այն, ինչ գործել է, հավասարազոր է մարտի 1-ին, և միակ մեղավորն առաջին հերթին ստախոսն է՝ Նիկոլ Փաշինյան անունով»,- ասաց Բագրատ Սրբազանը՝ մատնանշելով նաև մյուս պատասխանատուներին ու մեղավորներին։

Նա ընդգծեց՝ այդ օրվա բոլոր դեպքերն արձանագրված են, իրենք իրավական գործընթաց են սկսելու։

Բագրատ Սրբազանը խոսելով ընդդիմադիր պատգամավորների մանդատները վայր դնելու հավանականության մասին, ասաց. «Շատ է խոսվել այդ մասին. բոլոր լուծումները քննարկված են: Մենք ժամանակի, նպատակահարմարության և արդյունավետության հարց ունենք: Մի՛ փորձեք շահարկել այս թեման, քննարկե՛ք, բայց մի՛ շահարկեք: Այդ թեման առկա է, այն կգործի՝ ըստ նպատակահարմարության և ճիշտ ժամանակի: Ոչ ոք դա չի բացառել: Բոլոր քաղաքական լուծումները և՛ առաջարկված են, և՛ քննարկված: Բոլորիս միտքը մեկն է՝ այդ քայլը պիտի ունենա առավելագույն արդյունավետություն, դա չպիտի լինի պարզապետ էֆեկտի համար: Մենք պիտի սովորենք զգացմունքից մտքին անցնելուն»,-հավելեց նա:

Փաստաբան Սերգեյ Հարությունյանը տեղեկացրեց, որ այս օրերին 27 ձերբակալված անձինք ազատ արձակվեցին:

«Այսօր պատգամավոր Գեղամ Մանուկյանն էր այցելել կալանքում գտնվող տղաներին։ Բոլորն ասել էին, որ կալանքից դուրս գալուց հետո միանալու են շարժմանը։ Իսկ 27 տղաներն, որոնք արդեն ազատվել են՝ այստեղ են»,- ասաց նա։

Չափազանց մտահոգիչ է, որ որևէ ոստիկան պատասխանատվության չի ենթարկվել հունիսի 12-ի դեպքերով։

«Կադրերում երևում է, թե ինչպես է ոստիկաններից մեկը բռնում երիտասարդի մազերից քաշում, անասելի դաժանություն է, ողջունում եմ գնդապետ Ազիզյանին, որը կանխեց դա»,- ասաց նա և հավելեց, որ չեն կարող չընդունել, որ ոստիկանների շարքերում կան նաև պատվով ոստիկաններ։ Փաստաբանը վստահեցրեց, որ սահմանն անցած ոստիկանները ենթարկվելու են պատասխանատվության։

Հարությունյանը հայտնեց, որ հունիսի 12-ի գործով կա 8 կալանավորված անձ. «Ունենք դաշնակցական տղաներ, որոնք կալանավորվել են, սա էլ արդեն որերորդ անգամ ՀՅԴ կուսակցության նկատմամբ սկսում են այսպիսի բռնություններ»։

Այս պայքարին այլընտրանք չկա. հայտարարեց ԱԺ «Հայաստան» խմբակցության պատգամավոր Գառնիկ Դանիելյանը։

«Մեր վրա կրակել են, մեզ փորձել են վախեցնել, սպառնացել են զենքով ու բանտերով, մարդկանց ապօրինաբար անազատության մեջ են պահել, աշխատանքից ազատման սպառնալիքի տակ՝ փորձել են հետ պահել պայքարին մասնակցելուց, արցախցիներին են թիրախավորել, բայց մենք ցույց ենք տվել, որ բոլոր այդ սպառնալիքների վրա կներեք, բայց թքած ունենք։

Ոչ ոք և ոչինչ մեզ չի կարող հետ պահել մեր պայքարից»,- ասաց Գառնիկ Դանիելյանը։

Նա ընդգծեց նաև՝ պայքարի մասնակիցները վաղուց են ապացուցել, որ վճռական են։

«Մենք երբեք չենք փախել, այլ մեզնից են փախել, ճողոպրել, թաքնվել բունկերներում ու փոխել իրենց պլանները․ է՛լ Սարդարապատի հուշահամալիր չեն եկել, է՛լ կառավարության նիստն են հետաձգել, է՛լ հատուկ միջոցներ են կիրառել, որ ճողոպրեն, բայց մենք չենք ընկճվել ու չենք էլ ընկճվելու։ Մենք ցույց ենք տվել մեր աննահանջ պայքարը»,- ասաց նա։

Հանրահավաքի ավարտին Բագրատ սրբազանը տեղեկացրեց, որ շաբաթ օրը տեղի կունենա երիտասարդական մեծ հավաք: Նա իր վճռականությունը հայտնեց` գնալու ենք մինչեւ հաղթական ավարտ: Նաեւ հայտարարեց, որ երկու օրը մեկ հավաքվելու են Սուրբ Աննա եկեղեցու բակում` ամփոփելու են իրավիճակը: Ակտիվ հանդիպումներ են ունենալու, խմբեր են կազմելու եւ մեկնելու են մարզեր:

Մեր շարժումը կանգ չի առել և չի առնելու։ Մենք պատկերացնում ենք` սեփական ժողովրդի դեմ նռնակ կիրառած իշխանությունը հեշտ հեռացող չէ, բայց հաստատ հեռացող է։

Կեղտոտ համակարգի դեմ պետք է գործի արդար և ժողովրդային շարժման համակարգը։ Մեզ համար նահանջ գոյություն չունի, մենք հաղթանակի կհասնենք»,- ասաց Սրբազանը։

«Հայ, Հայաստան, Հայրենիք ու Աստված» վանկարկեցին հանրահավաքի մասնակիցները:

Նշենք, որ հունիսի 17-ին Նիկոլ Փաշինյանի և կառավարության հրաժարականի հարցով խորհրդարանական ընդդիմության հրավիրած արտահերթ նիստը չկայացավ։ 54 պատգամավորի փոխարեն գրանցվել էր 34-ը։ ՔՊ-ն չմասնակցեց նիստին։