Այսօր Կարեն Դեմիրճյանի անվան մարզահամերգային համալիրում տեղի ունեցավ Սրբազան շարժման բազմահազարանոց հավաքը, որի նպատակը վճռական պայքարի սկիզբը հայտարարելն էր:

Հավաքը մեկնարկեց Հայաստանի ու Արցախի պետական օրհներգերով: Տերունական աղոթք եւ օրհնության խոսք փոխանցեց Տավուշի թեմի առաջնորդ գերաշնորհ Բագրատ արքեպիսկոպոս Գալստանյանը:

Հավաքին ցուցադրվեց ֆիլմ՝ Սրբազան պայքարի նախորդ ամիսներին կազմակերպած գործողություններից;

ՀՅԴ Տավուշի Մարզային կոմիտեի ներկայացուցիչ, ԱԺ «Հայաստան» խմբակցության պատգամավոր Գառնիկ Դանիելյանը դիմելով հավաքի մասնակիցներին՝ ասաց. «Այդ կռիվը տվել ենք, մեր վրա մահակներ են կիրառել, նռնակներ նետել, բայց դուք աննահանջ կռվել եք մինչև վերջ: Ու ուզում եմ ասել, որ պայքարը չի ավարտվել և հենց հիմա շարունակում ենք և շարունակելու ենք ու հասնելու ենք հաղթական ավարտին, որովհետև դուք ոչ մեկից չեք վախենում։ Ո՛չ թշնամին, ո՛չ այս իշխանությունները չեն կարող մեզ հետ պահել մեր իղձերից ու նպատակներից»,-ասաց նա։

Գառնիկ Դանիելյանը դիմեց դահլիճում ներկա արցախցիներին. «Ես ուզում եմ մեր արցախցի քույրերին ու եղբայրներին ասել, որ իրենք այստեղ հյուր չեն, որ սա իրենց տունն է, մեր բոլորի հայրենիքն է և այս ապազգային իշխանություններին վռնդելուց հետո մենք վերադառնալու ենք մեր Արցախ, վերադառնալու ենք մեր տները»։

Հավաքի ժամանակ ցուցադրվեց տեսանյութ՝ Նիկոլ Փաշինյանի ստերի և չկատարած խոստումների մասին:

Ելույթ ունեցան 44-օրյա պատերազմի հերոս Մխիթար Գալեյանի մայր՝ Աստղիկ Գալեյանը, Genesis Armenia ուղեղային կենտրոնի հիմնադիր Աբրահամ Գասպարյանը, արցախցի Արեգա Հովսեփյանը:

Հավաքի ավարտին Բագրատ Սրբազանը հայտարարարեց. Մեր պայքարի ակտիվ շրջանը վերսկսում ենք, հոկտեմբերի 2-ին՝ ժամը 18։30 ին, հավաքվում ենք Հանրապետության հրապարակում։

«Մտնում ենք պայքարի ինտեսիվ և հետևողական փուլ, համառ, աննահանջ, համբերատար պայքարի փուլ, հաղթանակով երաշխավորված։ Բոլոր անհաջողությունները, թերացումներն ու սխալներն իմն են, բացառապես իմը, իսկ հաղթանակը՝ ձերը և միայն ձերը»,-հայտարարեց նա։

Հավաքից հետո Բագրատ Սրբազանն աջակիցների հետ երթով շարժվեց դեպի Ծիծեռնակաբերդ` հարգելու անմեղ զոհերի հիշատակը։

«Կոչում ունենք Ծիծեռնակաբերդ այցելել և ուխտ կնքել, որ այս պայքարի մեջ անդավաճան ենք մնալու»,-ասաց նա։

տեսանյութն այստեղ