Այսօր, փետրվարի 26-ին «Էլիտ պլազա» բիզնես կենտրոնի «Մանթաշով» սրահում տեղի ունենեցավ Հայ Յեղափոխական Դաշնակցության 35-րդ Ընդհանուր ժողովի բացման պաշտոնական արարողությունը, որին մասնակցում էին աշխարհի շուրջ 30 երկրներից ներկայացուցիչներ, ինչպես նաեւ հրավիրյալներ հայաստանյան քաղաքական շրջանակներից։

Ժողովի բացման արարողությունը մեկնարկեց Հայաստանի Հանրապետության, Արցախի Հանրապետության եւ ՀՅԴ օրհներգներով։

Իր ելույթում ՀՅԴ ԳՄ ներկայացուցիչ Իշխան Սաղաթելյանը ասաց՝ Հայրենիքի պաշտպանությունը պետք է դառնա մեր գլխավոր ուղենիշը:

«Պայքար բոլոր ճակատներում ու ամենուր, պայքար հայ ժողովրդի իրավունքների վերականգնման համար․ սա է այն առաջարկը, որ ՀՅԴ-ն կարող է ներկայացնել իր ժողովրդին, պայքար, որի մեջ պետք է լինենք և՛ կազմակերպիչը, և՛ զինվորը, և՛ առաջամարտիկը, քանզի հայրենիքի ու Դաշնակցության ճակատագիրը միահյուսված է: Հայաստանի վերակառուցումը, հաշտեցումն ու նորոգումը, Հայաստան-Արցախ-սփյուռք եռամիասնության վերականգնումն այլընտրանք չունի»,-ասաց նա։

Տերունական աղոթք կարդաց Գերաշնորհ Տեր Նաթան արքեպիսկոպոս Հովհաննիսյանը ապա, դիմելով ներկաներին, ասաց. «Մայր Աթոռ Սուրբ Էջմիածնից իր օրհնությունն է հղում Վեհափառ Հայրապետը՝ հույսով ու հավատքով, որ այս հավաքն իր ներդրումը կունենա մեր հայրենական կյանքում»:

Նրա խոսքով՝ եթե մենք այսօր զիջեցինք մեր պատմությունը, զրկվելու ենք նաև վաղվա պատմությունից:

Մեծի Տանն Կիլիկիո կաթողիկոս Արամ Առաջինի ուղերձն ընթերցեց Արաբական միացյալ էմիրությունների, Քուվեյթի և հարակից շրջանների թեմի հոգևոր առաջնորդ և կաթողիկոսի ներկայացուցիչ Գերաշնորհ տեր Մեսրոպ արքեպիսկոպոս Սարգսյանը։

«Գտնվում ենք անդունդի եզրին։ Համապատասխան դիրքորոշումներ պետք է որդեգրենք՝ հեռու ամեն տեսակ անիրատեսական մոտեցումներից ու մակերեսային դատողություններից։

Եկեղեցին չի կարող անտարբեր մնալ, կրավորական ու հետևողի դերում լինել, երբ մեր հոգևոր, բարոյական ու ազգային արժեքներն են նահաջում, երբ ներքին ճեղքերը խախտում են մեր ազգի միասնակությունը, երբ ժամանակավոր ու խաբուսիկ խաղաղության դիմաց զիջման քաղաքականությունը վտանգում է Հայաստանի հողային ամբողջականությունը»,- նշված էր Արամ Առաջինի ուղերձում։

Իր եզրափակիչ խոսքում ՀՅԴ Բյուրոյի ներկայացուցիչ Հակոբ Տեր-Խաչատուրյանն ասաց, որ ՀՅԴ 35-րդ Ընդհանուր ժողովը Հայաստանում գումարում ենք տագնապահար հայության և վտանգված հայրենիքի բախտորոշ օրերին:

«Ակնհայտ է, որ աշխարհաքաղաքական, ռազմաքաղաքական և ներազգային խորքային վերափոխումների ներկա հանգրվանին Հայաստանը և ողջ հայությունը կանգնած են ճգնաժամի և լրջագույն մարտահրավերների առջև»-շեշտեց նա։

Հայ Յեղափոխական Դաշնակցության 35-րդ Ընդհանուր ժողովի բացման պաշտոնական արարողության նիստն ավարտվեց հյուրասիրությամբ։

Նշենք, որ Ընդհանուր ժողովը, որ ՀՅԴ համազգային կառույցի բարձրագույն ժողովն է, գումարվում է 4 տարին մեկ անգամ։ ՀՅԴ 35-րդ Ընդհանուր ժողովը կտեւի մինչև մարտի 6-ը։

https://youtu.be/OF5HGfs29_E

Ստորեւ՝ yerkir.am-ի պատրաստած տեսանյութը