Վարչական դատարանում այսօր կայացել է ՀՀ ԱԳՆ դեմ «Հայաստան» խմբակցության պատգամավորներ Քրիստինե Վարդանյանի, Աննա Գրիգորյանի, Արթուր Խաչատրյանի եւ Գեղամ Մանուկյանի բողոքի քննությունը։

Այս հայցով պատգամավորները պահանջում են ոչ իրավաչափ համարել ՀՀ արտգործնախարարի 2024 թ. մարտի 14-ի գրությունը, որով իրենց արգելվել էր ծանոթանալ Ադրբեջանի հետ քննարկվող պայմանագրի փոխանակվող նախագծերին։

Նախքան նիստի մեկնարկը՝ պատգամավոր Գեղամ Մանուկյանը լրագրողներին ասաց․ «Կա օրենք, ի վերջո, մենք ունենք իրավունք՝ ծանոթանալու փաստաթղթին։ Եվ նաեւ ուզում ենք ցույց տալ հանրությանը 2018 թվականի օգոստոսի 17-ի եւ այսօրվա Նիկոլ Փաշինյանի այդ ամբողջ խայտառակ տրանսֆորմացիան։ 2018 թվականի օգոստոսի 17-ին ասում էր՝ ցանկացած լուծում հրապարակում ժողովրդի հետ եմ քննարկելու, 3 մլն վարչապետ եք… Այսօր ոչ միայն 3 մլն վարչապետերը, նույնիսկ խորհրդարանի պատգամավորները զրկված են այդ ամբողջ գործընթացին ծանոթանալուց, որը միայն ու միայն զիջումների քաղաքականություն է»։

Նիկոլ Փաշինյանը, անդրադառնալով այն հարցին, որ պատգամավորներին արգելվել է ծանոթանալ փաստաթղթի նախագծին, ասել էր՝ «լավ եմ արել, արգելել եմ»։

Մանուկյանն ի պատասխան ասաց. «Իրականում նրա՝ «լավ եմ արել» արտահայտությանը պատասխան տրվել է հենց իրեն, որ դա իր հոր դուքյանը չէ, որ ոնց ցանկանա, այդպես էլ որոշի»։ Նա նշեց, որ դատարան դիմելու քայլն այս իշխանությունների դեմ պայքարի միջոցներից մեկն է։

Մանուկյանն ասաց, որ իրենք ուզում են ծանոթանալ այդ փաստաթղթին, որպեսզի տեղյակ լինեն բոլոր խութերի մասին։ Նախկինում, երբ հնարավորություն են ունեցել ծանոթանալ, անզեն աչքով երեւացել են այն բոլոր խութերը, որոնք այսօր կան։

«Այն փաստաթղթին, որը բանակցվում է, տողատակերով պետք է ամբողջությամբ ծանոթանալ։ Հասկանում ենք, որ այն նախնական տարբերակները, որոնք կային, դրանից բավականին բան է փոխվել։ Ամեն անգամ գաղտագողի փոխելով՝ նորանոր զիջումների են գնում»,- հավելեց նա։

Գեղամ Մանուկյանն անդրադարձավ Նիկոլ Փաշինյանի՝ ապաշրջափակման մասին այսօրվա հոդվածին։ Նա ասաց, որ դա անպատասխան հոդվածների շարք է, զառանցանքի շղթա։ «Այդպես անպատասխան հոդվածները գրվում են, փոխարենն Ադրբեջանից ստանում են սպառնալիքներ, նորանոր նախապայմաններ Հայաստանին»,- նշեց նա։

Ըստ Մանուկյանի՝ եւ Թուրքիայի, եւ Ադրբեջանի հետ պետք է բանակցել, հարցը բանակցության օրակարգն է։ «Ասում են՝ առանց նախապայմաններ ենք Թուրքիայի հետ բանակցում։ Մի՞թե առանց նախապայմանների է, եթե առանց նախապայմանների է, այդ դեպքում ինչո՞ւ է Թուրքիայի կողմից առաջադրված Հայոց ցեղասպանության միջազգային ճանաչումից հրաժարումն այս իշխանության քաղաքականությունը։ Առանց նախապայմանների են բանակցում, այդ դեպքում իրական ու պատմական Հայաստանի հակադրումը, Արարատի ու Արագածի հակադրումն ինչի՞ համար է, չէ՞ որ դրանք թուրքական նախապայմաններ են։ Նույն Ադրբեջանի հետ բանակցություններն իրականում միակողմանի զիջումների քաղաքականություն են»,- հավելեց Գեղամ Մանուկյանը։

ՀՀ ԱԳՆ դեմ «Հայաստան» խմբակցության պատգամավորների բողոքի քննությունից հետո, դատարանի բակում լրագրողների հետ զրույցում փաստաբան Հովհաննես Խուդոյանը ասաց՝ «Դատարանից սպասելիքները համապատասխանում են հայցադիմումին։ Ինչ հայցադիմում ներկայացրել ենք, ինչպիսի պահանջ ներկայացրել ենք, սպասում ենք պահանջի բավարարմանը։ Իսկ պահանջի բավարարումը նշանակում է, որ ճանաչվում է, որ նման գործելակերպն իրավաչափ չէ»:

Հովհաննես Խուդոյանի խոսքով՝ պատգամավորն այս դեպքում նաև լրացուցիչ ինֆորմացիա ստանալու իրավունք ունի, որը պետական գաղտնիքն է։

«Ես այն կարծիքին եմ, որ ցանկացած պաշտոնատար անձ, ով պատգամավորին մերժում է, պետք է քրեական պատասխանատվության ենթարկվի։ Բայց դա չի բացառում նաև այս՝ վարչական դատարանի գործիքի օգտագործումը»,- ասաց նա։

Փաստաբանը նշեց, որ այս ընթացքում պատգամավորները դարձյալ կդիմեն ԱԳՆ՝ տեղեկատվություն ստանալու։ Համապատասխան վերաբերմունքի դեպքում նաև քրեական գործիքակազմը կփորձեն աշխատեցնել։