«ԱԼԻՔ», Կ. Դ. – Հայաստանի ներքաղաքական եւ գործող իշխանութեան կողմից որդեգրւած ազգադաւ, ու հայրենակործան քաղաքականութեան մասին հանրութեանը լուսաբանումներ տալու նպատակով, երէկ՝ յուլիսի 21-ի երեկոյեան կազմակերպւել էր դասախօսական երեկոյ նախաձեռնութեամբ՝ Թեհրանի Հայ Դատի յանձնախմբի եւ համագործակցութեամբ՝ Հ. Մ. Մ. «Նայիրի» միութեան:

«Նոր զիջումներ. Հայաստանի դարպաս Սիւնիքի պայթիւնավտանգ կարգավիճակը» խորագրով դասախօսական երեկոյի դասախօսներն էին՝ «ԱԼԻՔ» օրաթերթի գլխաւոր խմբագիր Արամ Շահնազարեանը եւ Հայ Դատի յանձնախմբի նախագահ Իսակ Իւնանէսեանը: Թ. Հ. Թեմի առաջնորդ Տ. Սեպուհ արք. Սարգսեանի օգնական Տ. Առաքել աբղ. Գատեհճեանի միջոցով Տէրունական աղօթքով մեկնարկած երեկոյի բացման խօսքով Հ. Մ. Մ. «Նայիրի» միութեան վարչութեան նախագահ Սերոժ Օհանեանը՝ անդրադարձաւ Հայաստանի եւ հայութեան օրհասական օրերին եւ այդ մասին հանրութեանը իրազեկ դարձնելու հրամայականի անհրաժեշտութեանը:

Իսակ Իւնանէսեանը ցաւով արձանագրեց, որ ելնելով Հայաստանի եւ հայ ժողովրդի դէմ ծառացած գոյութենական բնոյթի մարտահրաւէրներից, որոնք արդիւնքն են Հայաստանի գործող իշխանութիւնների ապազգային քաղաքականութեան, անհրաժեշտ կը լինի կիսւել հայրենակիցների հետ: Նա ապա համապարփակ գծերով ներկայացրեց այն պայմանաւորւածութեան կէտերը, որոնք ձեռք են բերւել ՀՀ գործող վարչապետի եւ Ադրբեջանի նախագահի միջեւ Աբու Դաբիում կայացած բանակցութիւնների արդիւնքում: Նա ընդգծեց, որ յիշեալ համաձայնութիւնը միանշանակ յանգեցնելու է Հայաստանի եւ հայ ժողովրդի կործանման, քանզի դրա մէջ ներառւած կէտերը, այդ թւում՝ «Զանգեզուրի միջանցք»-ի հետ կապւած կէտը գերեզմանելու են ՀՀ ինքնիշխանութիւնն ու հայոց պետականութիւնը:

Արամ Շահնազարեանն իր հերթին ընդգծեց, որ եթէ վտանգւում է պետականութիւնը, եթէ վտանգւում է հայրենիքի գոյութիւնը եւ Հայաստանը՝ որպէս պետութիւն գոյութիւն ունենալը, ուրեմն վտանգւած է ողջ հայ ժողովուրդը:

Անդրադառնալով Հայաստանի ներքաղաքական կեանքի վերջին իրադարձութիւններին, մասնաւորապէս Հայ Առաքելական եկեղեցու եւ ՀՅԴ-ի դէմ ՀՀ գործող իշխանութիւնների սանձազերծած բռնութիւններին, նա նշեց, որ դա կատարւում է նպատակային, որպէսզի չէզոքացնեն Հայաստանի թուրանացման դէմ դիմադրութեան բոլոր հնարաւորութիւնները:

Նա ընդգծեց, որ այս արհաւիրքին դիմակայելու համար անհրաժեշտ է համախմբւել ու վերականգնել յանուն հայրենիքի եւ հաւատքի պայքարելու մամիկոնեանականութեան եւ նժդեհականութեան ոգին, եւ դէմ գնալ ազգադաւ իշխանութիւնների սադրանքներին:

Վերջում ներկաներին առիթ տրւեց հարցումների: