Թուրքիա-Հայաստան հարաբերությունների կարգավորման հարցով հատուկ ներկայացուցիչ Սերդար Քըլըչի Հայաստան այցի առնչությամբ այսօր ՀՅԴ Հայաստանի Երիտասարդական միությունը բողոքի ակցիա է իրականացրել կառավարության առջեւ:

Ցուցարարներին էին միացել նաև հանրային ու քաղաքական դաշտի տարբեր ներկայացուցիչներ:

Երիտասարդների ձեռքում կային Բաքվի բանտերում պահվող Արցախի ռազմաքաղաքական ղեկավարության նկարներ, « Ո՛չ ուրացմանը» գրությամբ պաստառներ։ Մասնակիցները հայտարարություններ արեցին հայերեն եւ անգլերեն:

«Հայաստան է ժամանել Թուրքիայի հատուկ ներկայացուցիչ Սեյդար Քըլըչը՝ Հայաստան-Թուրքիա միջպետական ճանապարհների կարգավորման անվան տակ, սակայն, բոլորս հասկանում ենք, որ այս հանդիպումը քաղաքական կողմի նախապայմանները բավարարելու համատեքստում են. ակցիայի ժամանակ հայտարարեց ՀՅԴ ՀԵՄ Կենտրոնական վարչության ներկայացուցիչ Ժորա Ավդալյանը:

Դրա վառ ապացույցն է ՀՀ Կառավարության՝ այցի ժամանակացույցն ու օրակարգը գաղտնի պահելը: Մենք այստեղ ենք՝ ասելու, որ դեմ ենք ուրացման քաղաքականությանը», – ասաց նա։

Ժորա Ավդալյանի խոսքով, Թուրքիայի քաղաքականությունը 100 տարի առաջ և հիմա չի փոխվել, նրանք պատրաստ չեն Հայաստանի հետ երկխոսության՝ առանց նախապայմանների:

«Հայաստանում կա սերունդ, որը պահանջում է Ցեղասպանության ճանաչում և հատուցում, ուստի հայտարարում ենք՝ այս իշխանությունների հետ ձեռք բերված ցանկացած պայմանավորվածություն առ ոչինչ է: Ո՛չ ուրացմանը», – ասաց նա:

Մասնակիցները վանկարկեցին՝ «ոչ ուրացմանը»։

«Ես ցեղասպանությունից մազապուրծ եղած ընտանիքի սերնդից եմ: Ո՛չ ես, ո՛չ իմ ծնողները, ո՛չ էլ իմ սերունդները հնարավորություն չեն ունեցել ծնվելու մեր պատմական հայրենիքում: Դրա միակ մեղավորը Օսմանյան կայսրության ոճրագործ քաղաքականությունն էր եւ նրա ժառանգ Թուրքիան: Դրա մեղավորը պատմության դասերին չառերեսվելն է ու այսօր դեռ չչորացած արյան վրա խաղաղություն փորձել հաստատելը,- ասաց ՀՅԴ Նիկոլ Աղբալյան ուսանողական միության վարչության անդամ Շահանե Չոբանյանը:

ՀՅԴ Երեւան քաղաքային կոմիտեի ներկայացուցիչ Գոռ Սարգսյանը հայտարարեց, որ Քըլըչը չի եկել հանդիպելու ՀՀ ներկայացուցիչների հետ, այլ հանդիպելու է եկել Թուրքիայի քաղաքականությունը կիսողների հետ: Նրա խոսքով՝ լավ կլիներ, որ թուրք բանագնացը ոչ միայն Փաշինյանի եւ նրա խմբի հետ հանդիպեր, այլեւ հայ ժողովրդի այն հատվածի հետ, որոնք իրականությունն են ներկայացնում:

Մանրամասները՝ տեսանյութում

https://youtu.be/lNEiEpwyETU